Amos 6 - O Debleskro Lab 2024 (Sinte-Manouche)

I doosh i pralstunendar

¹ Djungeles djal kolenge, kay djivenn i shoukar djipen ap i berga Sion! Djungeles djal kolenge, kay djivenn an o foro Samaria, oun krenn pen kek shero! Djungeles djal t'menge, kay han i raya pral Israel – koy an-dikli natsyona, pash kolende i Israelitarya venna!

² [T'mer penenn ap i menshende:] Djan an o foro Kalne! Oun dikenn, har ko foro hi! Oun kotar djan doureder pash o baro foro Hamat! Palle djan tele pash i Filistarya an o foro Gat! Hi le zorleder har kal themma Youda oun Israel? Hi lengro them bareder har t'maro them? Na-a!

³ T'mer patsenn, kay hi o čilačo dives dour krik t'mendar. Djinenn: Kova, hoy krenn, moukell ko dives sikeder te vell, kay čilače raya pral t'mende venn.

⁴ Har djoungeles djal t'menge, kay han kanna čiddo ap čibya shoukar kerde i dandentsa foun i elefante, oun moukenn t'menge koy lačes te djal. T'mer denn t'men o per pherdo o masseha i tikne bakrendar oun terne thoulle groumyendar,

⁵ oun bashenn ap i harfa oun krenn gilya har o David.

⁶ Mool piyenn t'mer dran khore, oun makenn t'men dren o feteder djeteha. Oun t'men hi gar ropaske pral o kheer Yosef, hoy paash dino vell.

O foro Samaria vell paash dino

⁷ Doleske venn t'mer i glanstoune kolendar, kay venn pandles krik anlo. T'maro shoukar djipen oun pipaskro tsiro hi trouyel.

⁸ O baro oun zorelo Devel, ko ray pral o bolepen oun i phoub, das pes sovel pash peskro djipen oun penas: Me hom rhoyedo pral o pre-phourdepen o Yakobeskre čavendar, oun nay dikau lengre shoukar khera bouder gar glan i yaka. Doleske dau o foro oun lauter, hoy koy dren hi, an i vasta vavar menshendar.

⁹ Ninna te ačenn deesh morsha djido an yek kheer, hounte merenn le.

¹⁰ Te vell palle o kako yekestar lendar, oun lell les, te paskrell lo les, oun dell gole an o kheer: Hi gomme yek an o kheer? Oun te hi i vavar khatedo kote, penell lo: Na-a! Kek, kokres me. Palle penell o kako: Ač, mer hounte rakras gar o baro Debleskro lab vin!

¹¹ Djinenn: O baro Devel, te penell yob: O baro kheer hounte perell khetne, palle perell lo khetne. Oun te penell yob: O tikno kheer hounte perell an kotya, palle perell lo an kotya.

¹² Nashenn i graya ap i bare barra? Na-a! Nashte boudrenn i harhe koy pre i groumyentsa? Na-a! T'mer rissrenn o čačepaskre laba yaake, te venn le har čomone, hoy marell, oun o čačo drom yaake, te hi lo har i shoutlo pipen!

¹³ T'mer phourdenn t'men pre pral o foro Lo-Dabar, oun penenn: Mari zoryah lam o foro Karnayim dren.

¹⁴ “Doleske”, penell o baro Devel, ko ray pral o bolepen oun i phoub, “bičrau i natsyona, hoy djal ap t'mende, kay han dran o kheer Israel. Kolla menshe lenn t'maro them dren foun Lebo-Hamat bis pash o lengsto pani an o telstouno them.”