Amos 5 - O Debleskro Lab 2024 (Sinte-Manouche)

I ropaskri gili pral Israel

¹ Shounenn t'mer menshe an Israel, shounenn koy ropaskri gili, hoy givau pral t'mende:

² Koy terni čay Israel peras, te stell li bouder gar pre. Mouklo hi li čiddi ap i phoub, oun kek hi koy, kay hadell lat pre.

³ O baro Devel, maro ray, penell: An o foro, kolestar zero lourde vin djan an o kourepen, venn kokres sheel pale. An o foro, kolestar sheel vin djan an o kourepen, venn kokres deesh pale an o them Israel.

⁴ O baro Devel penell ap o kheer Israel: Rodenn man, palle djivenn!

⁵ Ma djan an Betel, vitar gar an Gilgal! Ma krenn t'men ap o drom an Beersheba! Me penau t'menge: I menshe an Gilgal venn pandles krik anlo. O foro Betel, hoy kharell Debleskro kheer, vell i foro, kay i benga khere hi.

⁶ Te kamenn djido te ačell, palle rodenn o baro Debles. Te krenn kova gar, t'mer dran o kheer Yosef, vell yob pral Betel har i bari yag, hoy kek nay vin krella.

⁷ Bibarht ap t'mende, t'mer rissrenn o čačepaskre laba, oun stakrenn ap o čačepen trouyel!

⁸ O baro Devel kras o bolepangre momlia, kol momlia, hoy sikrenn: o vend vell oun i niyal vell. Dran i rat krell yob o dives, oun dran o dives i rat. Dran o baro pani lell yob o pani oun čorell les ap i phoub. Yob kharell Baro Devel.

⁹ Pral o zoreleste anell yob bibarht, oun o zorelo foro phagell lo tele.

¹⁰ Rhoyedo han t'mer ap koleste, kay t'menge o čačepen penell, oun t'mende sikrell, kay kova gar mishto hi, hoy kran.

¹¹ Kova krenn t'mer: I čorvelen rikrenn tele, oun lenn lendar boudeder djob har čačo hi. Doleske vell yaake: An kol shoukar neve khera, hoy t'menge kran, djivenn t'mer gar. Oun i mool kol neve drakengre roukendar, hoy an i phoub čivan, piyenn t'mer gar.

¹² Me djinau ko boud čilačo koova, hoy kran t'mer. Oun dikau, har baro t'mari doosh hi. T'mer rikrenn t'men gar pale, lače menshen palla te lell, oun moukenn t'men te ginell. Kek čačepen denn t'mer i čorvelen.

¹³ An sau čilačo tsiro hi ko mensho gosevo, koon penell kek lab koy pral.

¹⁴ Rodenn kova, hoy lačo hi! Oun hoy čilačo hi, ma krenn! Yaake ačenn djido. Oun o baro Devel, ko ray pral o bolepen oun i phoub, ačell t'mentsa, yaake har t'mer penenn.

¹⁵ Dikenn čilačes ap kova, hoy čilačo hi, oun dikenn lačes ap kova, hoy lačo hi! Dikenn koy pre, te lell kova peskro čačepen, koon an o čačepen hi! Palle nay vell o baro Devel lačes kolenge, kay dran o kheer Yosef pral ačenn. Yob hi o ray pral o bolepen oun i phoub.

¹⁶ Oun pral t'mari doosh penell o baro Devel, ko ray pral o bolepen oun i phoub: Ap i tsele platse venn ropaskre gilya shounlo, oun ap i tsele dromma denn le gole: Havi grerha, havi grerha! Ninna i harhe venn dren gole dino, te rovenn le pral kolende, kay meran. Oun lauter, kay ropaskre gilya hayvenn, venn kharedo, te givenn le ropaskre gilya!

¹⁷ Ninna an i tsele drakengre themma givenn le ropaskre gilya. Kova lauter vell pral t'mende, te vau me, te dap t'men i phagi. Kova penau me, o baro Devel.

An ko dives, kay o Devel vell, vell i phagi vi-rakedo

¹⁸ Djungeles djal kolenge, kay penenn: O baro Debleskro dives te vell sik! Hoy patsenn t'mer, hoy palle vell? Ko dives anell t'menge kali rat oun kek momeli!

¹⁹ Kova hi har te nashals yek peske glan o levo, oun i vavar baro divyo firho taprals les. Yob khatrell pes an i kheer, čivell peskro vast ap i vanta, oun i sap dandrell les.

²⁰ Ava, o baro Debleskro dives anell tamlepen oun kek momlia. I kalo dives hi lo – kalo har i rat.

²¹ O baro Devel penell: Rhoyedo hom me pral kol bare divessa, kay venn t'mer khetne. Mange hi le i čadepen.

²² Ninna te rhačrenn t'mer mange firhen oun rhapen, hom gar barhtelo pral kova. Kol thoulle firhen, hoy mange marenn oun glan mande rhan, nay dikau bouder gar glan i yaka.

²³ Moukenn tele koy gole t'mare gilyendar! T'maro bashepen ap i harfe kamau bouder gar te shounell.

²⁴ Krenn lauter, te vell hakeneske peskro čačepen! Moukenn o čačepen te nashell an o tselo them har i lengsto pani, hoy les hako tsiro pani hi.

²⁵ T'mer Israelitarya, har hans an o moulo tato them kol star-deesh bersha, poučom t'mendar kek firhen oun rhapen, hoy hounte rhačrans mange.

²⁶ Kanna hi yaake, t'mer kran t'menge douy figuren, te mangenn len an: o Sakkut, koles kharenn baro ray oun o Kayvan, koles kran har i sterna. Doleske hounte hidjrenn t'mer kolen t'mentsa

²⁷ an ko tsiro, kay anau t'men pandles an i them, hoy hi čiddo pal o foro Damaskus. Me, o baro Devel, ko ray pral o bolepen oun i phoub, penau kova.