Amos 3 - O Debleskro Lab 2024 (Sinte-Manouche)

¹ Shounenn, t'mer Israelitarya, hoy o baro Devel pral t'mende rakras, pral o tselo kheer Israel peskre tsele familyentsa, kolen yob vin anas dran o them Egiptia:

² Mank i tsele natsyone ap kay phoub han t'mer kokres kolla, kolen mange vin rodom, oun ap lende yak dom. Doleske hi t'mari doosh yaake baro, oun me hounte dap t'men i phagi.

O Debleskro rakepaskri boudi

³ O Amos penas: Nay denn pen douy morsha khetne ap i drom, oun kran gar vin, kay te taprenn le pen? Na-a!

⁴ Dell i levo gole an o veesh, te hatsas lo kek rhapen? Na-a! Dell i terno levo gole an leskro khatepen, te tapras lo či? Na-a!

⁵ Perell i čirklo an i netsa, te kras kek koy netsa bourhlo? Na-a! Stell i saster pre, te taprell lo i kermuso, te peras či koy pre? Na-a!

⁶ Phourdell yek an i kourepaskri trompeta an o foro, oun i menshe lenn kek daar? Na-a! Vell i bibarht pral o foro, hoy o baro Devel bičras gar? Na-a!

⁷ Čačepah, o baro Devel, maro ray, krell či, te rakras lo gar glan kova koy pral ap peskre rakepangre, kay leske koy hi.

⁸ O levo dell gole – kones hi kek daar? O baro Devel, maro ray, rakrell, koon nay rikrell man pale, te penap leskre laba doureder?

O foro Samaria djal tele

⁹ Denn vin gole an i shoukar khera an o foro Ashdod oun an o them Egiptia: Avenn khetne ap i berge troul o foro Samaria, oun dikenn, har divyo oun čilačo i menshe kote hi, oun har yek o vavares zoryah tele rikrell.

¹⁰ Yon dikenn gar ap o čačepen, penell o baro Devel. Yon lenn penge bravlepen khetne an pengre khera, hoy čoran le oun lan le zoryah i vavarendar krik.

¹¹ Doleske penell o baro Devel, maro ray, ap i menshende an Samaria: Kourepangre venn troul t'maro them, pandenn les dren, phagenn i zorele massurya tele, oun randenn t'mare khera vin.

¹² Kova penell o baro Devel: I bakro, kay an o leveskro mouy hi, kolestar nay tserdell o bakrengro gar boudeder vin har douy herya oder i kotar kand. Yaake djal i Israelenge, kay hi kanna beshdo an Samaria ap shoukar beshepangre oun ap pernitse dran phar. Lendar ačell gar boud pral.

¹³ O baro Devel, ko ray pral o bolepen oun i phoub, penell: Shounenn kal laba, oun penenn i menshenge dran o Yakobeskro kheer: Kova hi čačo:

¹⁴ Ap ko dives, kay dau i Israelenge i phagi lengro čilačepaske, dau me i rhačepangre an Betel paash. Lengre shinga venn tele phagedo, oun perenn ap i phoub.

¹⁵ Me dau lengre niyalengre khera khetne, oun ninna lengre vendengre khera. Oun khetne perenn kol khera, hoy shoukar kerdo hi i dandentsa foun i elefante; hako baro kheer vell paash dino, penell o baro Devel.