Amos 1 - O Debleskro Lab 2024 (Sinte-Manouche)

¹ Kava hi, hoy sikras o Devel o Amoseske pral o kheer Israel an ko tsiro, kay o Usiya o baro ray his pral o them Youda. Oun o Yerobeam, koleskro dad o Yoash hi, his o baro ray pral Israel. His douy bersha glan ko tsiro, kay i phoub zoreles trissas oun pre phagas. O Amos vas dran o foro Tekoa oun his yek kolendar, kay dan yak ap i bakrende.

² O Amos penas: O baro Devel dell bari gole i berga Sion pral tele. Leskri gole hi har i gole, hoy i levo della, oun vell shounlo dran Yerusalem. O bakrengro them vell trouk, oun o khass ap i berga Karmel vell djelto.

O Debleskri rholi vell ap i themma Syria

³ O baro Devel penell: I menshe an o foro Damaskus kran pale te pale djoungelo koova. Baro čilačo koova kran le ap i menshende an Gilead. Doleske lenn le pengri phagi, oun khaytenn man gar.

⁴ Me bičrau i yag an i shoukar khera, hoy o ray Hasael peske kras. Oun rhačrau i zorele khera tele, kay o baro ray Ben-Hadad djivas.

⁵ Me phagau i bare voudya o forestar Damaskus paash, oun moukau i rayen dran Bikat-Aven oun Bet-Eden moulo te dell. Oun i menshe dran o them Syria venn pandles krik anlo an o them Kir. Ko penell o baro Devel.

Filistia

⁶ O baro Devel penell: I menshe dran o foro Gaza kran pale te pale djoungelo koova. Yon lan i menshen dran tsele gaba pandlo, oun bikran len an i vasta kolendar dran o them Edom, te venn le lengre boudepangre. Doleske lenn le pengri phagi oun khaytenn man gar.

⁷ Me bičrau i yag ap i massurya troul o foro Gaza, hoy rhačrell leskre zorele khera tele.

⁸ Oun moukau i raya pral i forya Ashdod oun Ashkelon moulo te dell, oun dau o fores Ekron. Oun i tsele Filistarya, kay pral ačan, merenna.

Tirus

⁹ O baro Devel penell: I menshe dran o foro Tirus kran pale te pale djoungelo koova. Yon dan i tsele pandlen an i vasta kolendar dran o them Edom, oun bistran, kay hi i pandle lengre phrala, oun kay phrala hounte rikrenn khetne. Doleske lenn le pengri phagi oun khaytenn man gar.

¹⁰ Me bičrau i yag ap i massurya troul o foro Tirus, hoy rhačrell leskre zorele khera tele.

Edom

¹¹ O baro Devel penell: I menshe an o them Edom kran pale te pale djoungelo koova. Lengre phralen, i Israelitaryen lan le palla o rhareha, oun len his kek dji lenge. Hako tsiro hi le rhoyedo ap lende oun moukenn gar tele lengri rholyah. Doleske lenn le pengri phagi, oun khaytenn man gar.

¹² Me bičrau i yag an o foro Teman, oun rhačrau i zorele khera tele an o foro Bozra.

Ammon

¹³ O baro Devel penell: I menshe an o them Ammon kran pale te pale djoungelo koova. Har kouran le pen an o kourepen, te lenn le i bareder them, činan le djouvyen pre, kay vavarčandes his an o them Gilead. Doleske lenn le pengri phagi, oun khaytenn man gar.

¹⁴ Me bičrau i yag ap i foreskre massurya o forestar Rabba, hoy rhačrell leskre zorele khera tele, ap ko dives, kay vell o kourepaskri gole dino, oun o kourepen vin phagell har i baro phourdepen.

¹⁵ Lengro baro ray peskre pralstunentsa vell pandlo oun krik anlo an i vavar them. Ko penell o baro Devel.