5. Mose 7 - O Debleskro Lab 2024 (Sinte-Manouche)

I Israelitarya hounte venn o baro Debleske kokres koy

¹ T'maro baro Devel anell t'men an ko them, hoy t'maro vell. Oun yob tradell boud menshen glan t'mende vin: I Hetarya oun i Girgasharya oun i Amorarya oun i Kanaanitarya oun i Perisarya oun i Hivarya oun i Yebousarya. Kolla hi efta natsyone, kay hi bareder oun zorleder har t'mer.

² Te dell t'maro baro Devel len an t'mare vasta, oun t'mer denn len, palle hounte marenn len halauteren. T'mer hounte krenn gar lentsa vin, te venn lengre mala, oun hounte sikrenn kek lačepen ap lende.

³ Ma romedinerenn kek lentsa! T'mare čen denn gar lengre morsh čavende! Oun lengre čen lenn gar t'mare morsh čavenge, te romedinerenn le len.

⁴ Kol ča anens t'mare morsh čaven o baro Debleskro dromestar tele, yaake te mangens le vavar deblen an. Palle vals o baro Debleskri rholi pral t'mende, oun sik marals yob t'men.

⁵ Doleske krenn kava lentsa: Vitsrenn kol pre-čidde barra trouyel, kay marenn le oun rhačrenn le firhen lengro debleske. Phagenn kol bare barra paash, hoy le leske pre-čivan! Oun denn kol kashta tele, hoy sikrenn i debletsa Ashera. Oun rhačrenn lengre figuren pre.

⁶ T'mer han menshe, kay hi o baro Debleske kokres koy. T'men rodas lo vin dran i menshen an i tsele themma, kay ap i phoub hi, te venn t'mer leskre menshe.

⁷ Kova kras lo gar doleske, kay hans boudeder har kol vavar. Na-a, t'mer han i tikneder natsyona har kol vavar.

⁸ Dran peskro kamlepen t'menge rodas o baro Devel t'men vin, te rikrell lo peskri sovel dren, hoy yob t'mare phourende das. Doleske anas lo t'men peskro zorelo vasteha vin dran o them, kay pandlo hans, dran o vast o Faraestar, ko rayestar pral Egiptia.

⁹ Djinenn: t'maro baro Devel hi kokres o čačo Devel. Yob rikrell peskro lab, oun hoy lo t'mentsa vin kras. Lačepen oun kamlepen dell lo kolende, hoy les o djiyestar kamenn oun krenn, hoy lo penell. Ninna lengre čavenge, kay pal lende venna, hi lo lačo, yaake rah har seri familye yek pal i vavar djivenn.

¹⁰ Oun kolen, kay kamenn lestar či te djinell, dell lo i phagi, oun marell len sik. Kek tsiro moukell lo pes, te anell lo lenge lengro čilačepen pale ap lengre sherya.

¹¹ Yaake rikrenn t'men hako tsiro ap leskre laba, krenn, hoy lo t'mendar kamell, oun djivenn pal leskre čačepaskre laba, hoy kava dives t'menge penau.

O baro Debleskro čivell peskri barht ap kolende, kay shounenn ap leste

¹² Te shounenn t'mer leskro čačepen, oun rikrenn t'men ap leskre laba, oun djivenn pal lende, palle rikrell t'maro baro Devel, hoy lo t'mare phourentsa vin kras, oun peskro vast pre das, oun vell t'menge lačes.

¹³ Dran peskro kamlepen dell yob t'men barht oun boud čaven, ninna boud djob, mool oun djet. Oun t'mare groumya oun bakre venna boud an o them, kolestar yob glan t'mare phourende pes sovel das, te dell lo les t'mende.

¹⁴ Kek vavar menshe an i tsele themma lenn yaake boud barht. Kek hi mank t'mende, vitar gar mank t'mare firhende, kay nay lell kek ternepen.

¹⁵ Oun o baro Devel lell hako nasslepen t'mendar, oun anell kek savo nasslepen ap t'mende, hoy ap i menshende an o them Egiptia van, oun hoy t'mer prindjrenn. Na-a gar ap t'mende čivell lo len, ap hakeneste, kay ap t'mende pre djal, čivell lo len.

¹⁶ T'mer hounte marenn i tsele natsyone, hoy t'maro baro Devel an t'mare vasta dell. Yon hounte khaytenn t'men gar, oun lengre deblen hounte mangenn gar an. Yon anans t'men an i bibarht.

¹⁷ Te penenn t'mer an t'mare djia: “Kal natsyone hi bareder har mer, har nay tradas mer len vin?”

¹⁸ Palle ma darenn lendar! Ma bistrenn, hoy t'maro baro Devel ap o Farao oun ap i tsele Egiptarya kras.

¹⁹ T'mer dikan, har lo peskri bari zoor sikras, oun kras sau koova, hoy kek vavar nay krell, oun anas boud bibarht ap i Egiptaryen. Peskro zorelo vasteha oun peskri pre-hadedi moussyah anas lo t'men vin. Yaake krell t'maro baro Devel i menshentsa an i tsele themma, kolendar t'mer darenn.

²⁰ Kote pashel bičrell t'maro baro Devel bari bibarht oun daar ap lende bis te kolla, hoy pral ačenn oun pen glan t'mende khatrenn, ninna maredo van.

²¹ Doleske, ma dare lendar! T'maro baro Devel hi mashkral t'mende, ko baro zorelo Devel, glan koleste hakenes i daar taprell.

²² Yob tradell kal menshen vin glan t'mende, yek pal o vavar, oun hakeno peskro tsireske. T'mer nay denn len gar ap yek kopo moulo. Palle vans i divye firhe boudeder oun djans ap t'mende.

²³ T'maro baro Devel dell len an tire vasta oun krell lenge dineles i daryatar, bis te halauter moulo dino hi.

²⁴ Oun yob dell t'men lengre bare rayen an o vast. Oun t'mer marenn len, oun lengre laba venn bistedo. Kek nay vell zorleder har t'mer. T'mer marenn len halauter.

²⁵ Rhačrenn i figure lengre deblendar! Ko roup oun ko sonakay, hoy ap lende hi, lenn gar tele t'menge, te venn t'mare djia gar pandles ap kova. Savo koova vals djoungeles glan t'maro baro Debleskre yaka.

²⁶ T'mer hounte anenn kek savi figura an t'mare khera, te venn t'mer gar lentsa khetne moulo dino. Čačepah, dikenn ap lende har ap i djoungelo koova, oun denn len paash.