5. Mose 6 - O Debleskro Lab 2024 (Sinte-Manouche)

Israel, tou kamess tiro Debles o tselo djiyestar

¹ Oun kava hi o lab, lauter, hoy t'maro baro Devel t'mendar kamella, oun leskre čačepaskre laba, hoy lo mande das, te penap len t'menge, te nay djivenn pal lende an o them, an kova t'mer kanna djan, te lenn les t'menge dren,

² yaake te rikrenn t'maro baro Debles glan i yaka t'maro tselo djipen, oun denn yak ap halauter, hoy lo t'mendar kamella, ap leskre tsele laba, hoy me t'menge penau, te rikrenn t'men ap lende, t'mer oun t'mare čave oun čavengre čave. Yaake djivenn t'mer i rah tsiro an t'maro them.

³ Yaake shoun kanna, Israel, oun de yak te kress kova halauter, te djal touke mishto. Oun t'mer venn i bari natsyona an ko them, kay hi boud thoud oun gvin, yaake har o baro Devel, o Devel t'mare phourendar, kova t'menge penas.

⁴ Shoun Israel! O baro Devel hi maro Devel, yob kokres oun kek vavar!

⁵ Tou kamess les tiro tselo djiyestar oun tiro tselo djipah oun tiri tseli zoryah.

⁶ Oun kol laba, hoy me touke kava dives penau, less an tiro dji,

⁷ oun peness len ninna tire čavenge, te bistrenn le len gar. Rake lendar, te hal khere beshdo, oun te djah ap o drom, oun te čiveh tout tele oun te steh pale pre.

⁸ Pande kol laba ap i pandepen troul tiro vast oun troul tiro shero pral i yaka, te bistress len gar.

⁹ Oun tou činess len ap i pesse kashta čačes oun serves pash tiro khereskro voudar oun ap i voudar pral.

¹⁰ O baro Devel, kay tiro Devel hi, anell tout an ko them, kay yob pes pash o Abraham, o Isaak oun o Yakob sovel das, te dell lo les toute. Kote hi bare oun shoukar forya, hoy tou gar kral,

¹¹ ninna khera pherdo lačo koova, hoy tou gar khetne lal, oun vi-dine brounne, hoy tou gar dran o bar vin dal, ninna drakengre rouka oun djeteskre rouka, hoy tou gar an i phoub čival. Oun palle, te rhah kolestar lauter oun veh čalo,

¹² palle de yak, te bistress gar o baro Debles, kay anas tout vin dran o pandepen dran o them Egiptia.

¹³ Tou mangess o baro Debles an, oun rikress les glan tire yaka pash halauter, hoy kreh. Te deh tout sovel, dess tiri sovel pash leskro lab.

¹⁴ Ma dja vavar deblenge palla, kolen i menshe dran i themma troul t'mende, an-mangenn.

¹⁵ Tiro baro Devel hi mank t'mende oun kamell te kamess les kokres. Te rikreh gar pash leste, vell leskri rholi pral toute, oun yob lell tout krik i phoubyatar.

¹⁶ Ma krenn yaake, har te vals o baro Devel gar pash t'mende oun dals t'men gar kova, hoy t'men hounte vell djipaske, yaake har kova kran, har hans an o foro Massa!

¹⁷ Rikrenn mishto o baro Debleskre laba oun djivenn yaake, har t'maro Devel t'menge sikras. Krenn, hoy yob t'mendar kamell!

^18-19 Te krenn, hoy čačo oun lačo hi glan leskre yaka, djal t'menge mishto. Oun t'mer venn dren an ko lačo them, kolestar o baro Devel t'mare phourenge penas, te tradell lo kolen glan t'mende kote vin, kay t'men gar kamenn. Oun yob das ninna peskro vast koy pre.

²⁰ Te vell ko tsiro, kay poučell tout tiro čavo: Hoske hounte rikras kol laba, hoy sikrenn, har te djivas, oun hoy maro baro Devel mendar kamell, oun hounte djivas pal leskre čačepaskre laba?

²¹ Palle peness tou ap tiro čaveste: “Mer hams boudepangre o baro rayestar an o them Egiptia. Oun o baro Devel anas men vin dran Egiptia peskri bari zoryah.

²² Oun o baro Devel kras baro oun zorelo koova, hoy kek vavar nay krell oun anas bari bibarht pral i Egiptarya oun pral o baro rayeste oun koleskro tselo kheer. Kova dikam mare yakentsa.

²³ Oun men las lo koy vin, te anell lo men an kava them, yaake har yob pes sovel das glan mare phourende, te dell lo men kava them.

²⁴ Oun maro baro Devel penas, te kras kova lauter, hoy yob mendar kamell, oun te rikras les glan mare yaka pash halauter, hoy krah, te djal menge mishto an maro tselo djipen, yaake har kova kava dives ninna hi.

²⁵ Mer te krah pal kal tsele laba oun shounah ap kova, hoy maro baro Devel menge penas, palle ham glan leste an o čačepen tardo.”