5. Mose 5 - O Debleskro Lab 2024 (Sinte-Manouche)

O Debleskre deesh laba

¹ Oun o Mose das i tsele menshen Israel khetne gole, oun penas ap lende: Shoun Israel kova, hoy o baro Devel kamell t'mendar, leskre tsele čačepaskre laba, hoy kava dives glan t'mare kanna penom. Rikrenn len an o shero, oun denn yak ap lende, oun djivenn pal lende!

² Maro baro Devel djas mentsa i sovel dren pash i berga Horeb.

³ Gar mare phourentsa kokres djas lo koy sovel dren, na-a mentsa lauterentsa, kay kava dives djivah oun kate ham.

⁴ Kote ap i berga rakras yob dran i yag vin, yak an yak t'mentsa.

⁵ Oun me homs mashkral t'mende oun o baro Debleste tardo an ko tsiro, te penap t'menge, hoy lo penas. T'mer daran i yagatar oun djan gar ap i berga pre. Oun o baro Devel penas:

⁶ Me, o baro Devel, hom tiro Devel, koon tout vin las dran o them Egiptia, kay tou i pandlo boudepaskro hals.

⁷ Oun tout vell kek vavar Devel har man.

⁸ Oun tou kress touke kek devel, hoy vi-dikell har čomone an o bolepen, vitar gar har čomone ap i phoub oun vitar gar har čomone an i pani tel i phoub.

⁹ Tou vitsress tout gar glan i vavar debleste tele, oun mangess les gar an. Me, o baro Devel, hom tiro Devel, oun kamau, te kamess man kokres. Kolen, kay kamenn mandar či te djinell oun anenn doosh ap pende, dau me i phagi. Me dau ninna i phagi lengre čavende oun kolengre čavende yaake rah har triin-te-star familye yek pal i vavar djivenn.

¹⁰ Lačepen oun kamlepen dau me ap kolende, hoy man o djiyestar kamenn oun krenn, hoy me penau. Ninna lengre čavenge, kay pal lende venna, hom lačo, yaake rah har zerya familye yek pal i vavar djivenn.

¹¹ Ma le miro lab baro Devel čičeske an tiro mouy! Me, o baro Devel, hom tiro Devel oun dau i phagi hakenes, koon kova krella.

¹² Rike o Debleskro dives! Ma boude ap leste. Yaake penas touke tiro baro Devel.

¹³ Shob divessa dja ap tiri boudi oun kre tiri tseli boudi!

¹⁴ O eftato dives hi mange, tiro baro Debleske. Ap ko dives kress tou kek boudi, vitar gar tire čave oun ča, vitar gar tiro boudepaskro oun tiri boudepaskretsa, vitar gar tiri groumni, tiri bourika tire vavar firhe, vitar gar kol vi-themarya, kay an tiro foro djivenna. Yaake har tou hounte boudress gar, hounte boudrenn tire boudepangre vitar gar.

¹⁵ Ma biste, kay hals i boudepaskro an o them Egiptia, oun me, tiro baro Devel, las tout vin miro zorelo vasteha oun pre-hadedi moussyah. Doleske penau me touke: Rike miro dives yaake.

¹⁶ Dik ap tiro dadeste oun ap tiri date, te djal lenge mishto. Yaake djiveh i rah djipen an ko them, hoy tout tiro baro Devel della.

¹⁷ Ma mare kekes!

¹⁸ Romeha, ma dja i vavar djouvyah! Romniya, ma dja i vavar morsheha!

¹⁹ Ma čore!

²⁰ Ma an kek rhorhepen pre ap yekeste!

²¹ Ma rode gar, har nay less tou kova touke, hoy i vavares hi: leskri romni, leskro kheer, leskri phoub, leskro boudepaskro, boudepaskretsa, groumni, bourika, či, hoy i vavares hi.

²² Kal laba rakras o baro Devel ap t'mende halauter, har van khetne pash i berga. Dran i yag vin, dran koy kali pessi folka vin rakras lo bari golyah. Kek vavar lab čivas lo pashel. Oun yob činas len ap douy barra oun das len mande.

O Mose hi tardo mank o Debleste oun i Israelitaryen

²³ Oun har shounan t'mer ko rakepen dran ko kalepen oun dikan har i berga rhačas, koy van t'mare pralstoune pral i deesh-te-douy bare familyende oun t'mare phoureder pash mande,

²⁴ oun penan: “Dik, maro baro Devel sikras men peskro raylepen oun barepen. Oun mer shounam leskro rakepen dran i yag vin. Kava dives hayvam mer, te rakrell o baro Devel i menshentsa, oun o yon ačenn djides.

²⁵ Oun kanna, hoske meras mer? Kay bari yag rhal men pre. Te shounah mer o rakepen maro baro Deblestar gomme doureder, palle merah mer.

²⁶ An kek tsiro nay shounas i mensho o rakepen o djido Deblestar dran i yag vin, yaake har mer, oun ačas djides?

²⁷ Dja tou koy, oun shoun halauter, hoy maro baro Devel penell, oun pen kova menge. Halauter, hoy maro baro Devel touke penell, kamah te shounell oun les krell.”

²⁸ Oun o baro Devel shounas t'mare laba, hoy t'mer ap mande penan. Oun o baro Devel penas ap mande: “Me shounom, hoy kal menshe touha rakran. Lauter, hoy yon penan, hi mishto yaake.

²⁹ Har kamoms, te ačans lengre djia hako tsiro yaake, te rikrenn le man glan pengre yaka, oun te denn le yak ap mire tsele laba! Palle djals lenge oun lengre čavenge mishto o tselo tsireske.

³⁰ Dja pash lende oun pen lenge: Djan an t'mare plarhtene khera pale!

³¹ Tou, ač kay pash mande! Oun me penau touke o tselo lab, halauter hoy t'mendar kamau, oun mire tsele čačepaskre laba. Kolla lauter peness lenge, te djivenn le pal lende an ko them, hoy me dau lende, te lenn le les lenge dren.”

³² Kanna denn yak, te krenn halauter yaake, har t'maro baro Devel kova t'menge penas. Rikrenn leskre tsele laba. Čivenn kek lendar ap i rig.

³³ Djan yaake ap leskro drom, har yob t'menge sikras! Palle ačenn djido, oun djal t'menge mishto. Oun t'mer nay djivenna i rah tsiro an ko them, hoy t'mer dren lenn, te vell lo t'maro.