5. Mose 34 - O Debleskro Lab 2024 (Sinte-Manouche)

O Mose merella

¹ Oun o Mose djas dran o telstouno them, kay i Moabarya djivenn, oun djas pre ap i berga Nebo, bis pral pre ap ko pralstouno kotar, hoy kharell Pisga oun hi čiddo ap i vavar rig o forestar Yericho. Oun o baro Devel moukas les kote o tselo them te dikell: o them Gilead oun doureder pre bis pash o them Dan,

² oun o tselo them Naftali, oun o tselo them Efrayim oun Manasse, oun o tselo them Youda bis pash o baro pani kote, kay o kham tele djal;

³ ninna ko moulo them Negev oun ko telstouno them mashkral i forya Yericho oun Soar. O foro Yericho vell ninna Palmtikro foro kharedo.

⁴ Oun o baro Devel penas ap leste: “Kava hi o them, kolestar penom oun me man sovel dom glan o Abraham, o Isaak oun o Yakob, te dap kava them lengre čavende, kay pal lende venna. Me moukom les tout tire yakentsa te dikell. Pral vergel djas tou gar.”

⁵ Oun o Mose, koles o baro Debleskro čačo vast hi, meras kote an o them Moab, yaake har o baro Devel les penas.

⁶ Oun yob paskras les an i tala an o them Moab ap i vavar rig o forestar Bet-Peor. Bis ap kava dives djinell kek, kay lo kote paskedo hi.

⁷ O Mose his sheel-te-biish (120) bersha, har yob meras. Leskre yaka his gomme zoreles, oun yob nashras gar peskri zoor.

⁸ Oun i Israelitarya rovan pral o Mose triyanda (30) divessa an o telstouno them Moab. Yaake rah djas o ropaskro tsiro o Moseske.

⁹ Oun o Yosua, koleskro dad o Noun his, vas pherdo gosvepen. Kova vas, har čivas o Mose peskre vasta ap leste. Oun i Israelitarya shounan ap leste oun kran yaake har o baro Devel o Moseske penas, te hounte krenn le.

¹⁰ An kek tsiro his an Israel i vavar Debleskro rakepaskro har o Mose, koleha o baro Devel yak an yak rakras.

¹¹ Kek vavar Debleskro rakepaskro kras savo baro oun zorelo koova har yob, har o baro Devel les bičras, te sikrell lo o Debleskri zoor ap o rayeste Farao an o them Egiptia, oun ap koleskre bare morshende oun ap o tselo them.

¹² Oun kek vavar djas glan i Israelitaryen savo zorelo vasteha oun kras savo baro zorelo koova glan lengre yaka, har kokres o Mose.