5. Mose 33 - O Debleskro Lab 2024 (Sinte-Manouche)

O Mose penell o Debleskri barht vin pral o Israel

¹ Oun glan peskro merepen rakras o Debleskro morsh, o Mose, i Debleskri barht vin pral i Israelitarya, oun penas:

² O baro Devel vas oun rakras mentsa pash i berga Sinay. Yob vas yaake har o kham pre djal pral i berge Seir. Mer dikam leskro raylepen har hams pash i berga Paran. Khetne leha van boud zerya bolepangre. Ap leskri čači rig his i yag.

³ O baro Devel kamell peskre menshen o djiyestar. Yob rikrell peskro vast pral halauterende, kay leske hi. Yon beshenn pen pash leskre pire, oun shounenn ap leskre laba.

⁴ O Mose sikras mende o Debleskro drom. Kal čačepaskre laba hi o Israeleskro bravlepen.

⁵ Oun o baro Devel vas o ray pral o Yeshourun, har i Israelitarya pengre pralstunentsa khetne van.

⁶ Palle penas o Mose pral o kheer Ruben: O Ruben te djivell oun merell gar vin, ninna te hi leskre menshe kanna gar boud.

⁷ Pral o kheer Youda penas lo: Baro Devel, shoun, hoy o Youda toutar mangella! An les pale pash peskre phralende! Kre leskre vasta zoreles! Ab ap leskri rig, te kourell lo pes kolentsa, kay čingrenn leha!

⁸ Oun pral o kheer Levi penas lo: Baro Devel, de i Levitaryen kol barra, hoy sikrenn, hoy tou kameh, te vell kerdo! Yon rikran ap toute pash i panya Massa oun Meriba, har kamal te djinell: Shounenn le ap toute, ninna te vell kova lenge phares?

⁹ Yon rikran boudeder ap toute har ap pengre dadende oun dayende, pengre phralende oun čavende. Oun dan yak ap tiro lab, oun rikran pen ap koy sovel, hoy tou lentsa dren djal.

¹⁰ Yon sikrenn i Israelitaryen tiro drom, ava, o Yakobeskre čaven tiro čačepen. Soungepaskro koova anenn le glan toute, oun rhačrenn firhen touke ap tiri rhačepaskri.

¹¹ Baro Devel, kre len zorelo! Oun dik lačes ap kova, hoy le krenna! De kolen khetne, kay hadenn pen pral lende, oun djan rholyah ap lende pre! Mouk kolen bouder gar pre te stell!

¹² Ap o kheer Benyamin penas lo: Tou hal kova, koles o baro Devel peskro tselo djiyeha kamell, oun peskre vasta pral leste rikrell! O tselo dives dell lo ap toute yak, oun djivell mashkral toute.

¹³ Pral o kheer Yosef penas lo: O baro Devel hi lačo leske, oun dell les doha brishin ap leskro them, oun panya, hoy venn dran i phoub.

¹⁴ O kham moukell leske lačo koova bares te vell, oun lačo djob an o čačo čon!

¹⁵ Mou venn i phoure bare oun tikne berge čakedo roukentsa, hoy lače roukengre hidjrenna!

¹⁶ Mou vell o them pherdo o feteder koova, yaake boud, te hi les boudeder har doha. Ko Devel, kay djivas an i soubyengre bourra, mou čivell peskro lačepen ap leste! O Yosef vas vi-rodedo mank peskre phralende, te vell lo lengro pralstouno.

¹⁷ Leskri zoor hi yaake baro har i gouroumeskri zoor. Kolla, kay lestar venna hi har shinga i divye gourmendar. Kolentsa tradenn le i menshen dran vavar themma bis an i doureder themma ap i phoub. Kova krenn i menshe, kay venna o Yosefeskre douy čavendar: kol 10.000 (deesh-zerya) dran o kheer Efrayim, oun kol zerya dran o kheer Manasse.

¹⁸ Ap i khera Zabulon oun Naftali penas lo: Tou, Zabulon, vess bravelo, te oulereh ap o baro pani oun pareh tiro koova! Oun tou, Issakar, vess bravelo an tire plarhtene khera.

¹⁹ Yon denn vavar menshen gole ap pengri Debleskri berga, oun kote anenn le firhen o Debleske, hoy leske čačo hi. Lengro bravlepen hatsenn le an o baro pani, oun kouč koova lenn le dran i santa.

²⁰ Oun pral o kheer Gad penas lo: Sharedo vell o baro Devel, kay dell o Gades i bourhlo them. O Gad hi čiddo har i levo, hoy lourell ap i firhes, te dandrell lo leske i moussya oun o shero tele.

²¹ Yob rodas peske o feteder kotar them vin. Har i pralstoune pral Israel khetne van, dan le leste ko kotar them, hoy i pralstuneske hi. Oun khetne i pralstunentsa pral Israel kras yob o čačepen yaake vin, har o baro Devel kova kamas, te djivenn i Israelitarya pal o baro Debleskre laba.

²² Pral o kheer Dan penas lo: O Dan hi i terno levo, kay vin stell dran peskro khatepen an Bashan.

²³ Pral o kheer Naftali penas lo: Ap o Naftali hi o baro Debleskri barht čiddo. Yob das leste boud lačo koova. Leskro them djal dour tele o baro panyestar ap koy rig, kay o kham pralstounes tardo hi.

²⁴ Pral o kheer Asser penas lo: Ap o Asser hi boud Debleskri barht čiddo. O baro Devel mou dell les boudeder bravlepen har leskre phralende. Leskre djeteskre rouka anenn leske yaake boud djet, te nay thovals lo peskre pire an djet.

²⁵ Yob mou djivell kek daryah pal voudya, hoy hi pandlo sasteha. Oun an peskro tselo djipen mou ačell leske leskri zoor!

²⁶ Israel, kek devel hi har tiro Devel. Pherdo raylepen hi lo beshdo ap volke oun djal pral o bolepen, te vell lo ap tiri rig.

²⁷ Hako tsiro his lo koy. Pash leste nay khatreh tout. Hako tsiro rikrell lo peskre moussya pral toute. Yob tradas kolen glan toute vin, kay kouran pen touha, oun penas touke: Mare len!

²⁸ Oun yaake nay djivell o Israel kek daryah kote. Kek kamell čingepen o Yakobeskre čaventsa. An lengro them vell djob oun mool baro. Oun o bolepen dell doha brishin.

²⁹ Barhtelo han t'mer, Israelitarya! Koon hi yaake har t'mer? T'men kokres las o baro Devel dran o pandepen vin. Yob vell ap t'mari rig, oun rikrell peskro vast pral t'mende. Yob kourell pes t'menge, oun krell, te venn t'mer zorleder har kolla, kolentsa kourenn t'men. Yon hounte vitsrenn pen tele glan t'mende, oun t'mer djan pral lende vergel.