5. Mose 32 - O Debleskro Lab 2024 (Sinte-Manouche)

O Moseskri gili

¹ Tou bolepen, shoun, hoy penau! Tou phoub, de yak ap i laba, hoy venna dran miro mouy!

² Kova hoy me t'men sikrau, hi har o brishin ap o zenlepen. oun miro rakepen har i sapeno dourho ap o khass.

³ Sharau o baro Debles. Penenn halauter: Maro Devel kokres hi baro!

⁴ Yob hi maro zorelo rikepaskro. Lauter, hoy yob krell, hi mishto. Leskre tsele dromma hi čačo. Maro Devel rikrell peskro lab; an leste hi kek čilačepen. Rhorhepen djinell lo gar.

⁵ T'mer moukan leskro drom, oun han bouder gar moldo te kharenn leskre čave. Pherdo čilačepen oun rhorhepen han t'mer.

⁶ T'mer dinele menshe, kolen kek gosvepen hi, parkrenn t'mer t'men yaake pash t'maro baro Debleste? Hi yob gar t'maro dad, kay kras t'men? Kova, kay kras t'mendar i natsyona?

⁷ Moukenn t'menge kol phoure tsirya an o shero te djal, har t'mare phoure djivan! Poučenn t'mare dada, har kova his! Poučenn t'mare phoureden, oun yon penenn les t'menge,

⁸ har o pralstouno Devel i menshen pengro them das. Yob moukas i natsyone kote djivenn, kay lo kamas. Peskre čaven Israel das lo hakenes i them bares doha leskre menshenge.

⁹ I Israelitarya hi leskre menshe. Yon, o Yakobeskre čave, hi kolla, kay rodas lo peske vin.

¹⁰ Yob hatsas i Israelitaryen an o moulo them, kote kay či bares vell. Oun yob rikras peskre vasta pral lende, oun das kote yak ap lende, yaake har yob ap peste kokres yak dals.

¹¹ Yob his har i adlari, kay peskre ternen vin anell dran lengri nesta, oun pral lende djal. Te venn le khino, djal lo tel lende, krell peskre moussya bourhles pre, oun hidjrell len ap peskre moussya.

¹² Yaake kras kova lentsa o baro Devel, yob kokres, kek vavar devel his leske ap i rig.

¹³ Yob moukas len o ray te vell pral o pralstouno them. Oun yon nay rhan o djob ap i harhetikri phoub. Gvin moukas lo len te hatsell mank i bare barra, oun djet te lell i roukendar, hoy ap barrengri phoub bares van.

¹⁴ Len his khil i groumyendar oun i thoud i bakrendar, ninna o mass i tikne bakrendar, oun pesse bakre oun bouzya; I Israelitarya rhan o lačeder djob, oun piyan goudli loli mool.

¹⁵ O Yeshourun djivas i shoukar djipen, his čalo oun bravelo. Har vas lo pesso, phourdas lo pes pre. Oun moukas o Debles, kay les kras, oun vitsras les ap i rig. Leskro zorelo rikepaskro his leske či moldo.

¹⁶ O Debleskre menshe nashan vavar deblen palla, oun doukan pengro Debles. Ko djoungelo koova, hoy le kran, kras les rhoyedo.

¹⁷ Yon anan firhen save deblenge, kay kek debla hi. Kolen prindjran yon glan kova gar. Kolla van neves pre. I phoure mangan len gar an.

¹⁸ Ko Devel, kolestar t'mer van, oun kova, kay rikras t'men, koles čivan t'mer ap i rig. Ko Devel, kay kras t'men, koles bistran t'mer.

¹⁹ O baro Devel dikas kova, oun vas rhoyedo pral peskre čavende oun čende, kay kaman či bouder lestar te djinell.

²⁰ Oun yob penas peske: Me rikrau man pale lendar, kamau te dikell, har lentsa doureder djal, kolentsa, kay pal pengro shero djan, oun či bouder mandar kamenn te djinell.

²¹ Yon doukan oun rhoyran man, har mangan le kolen an, kay kek debla hi. Yaake kamau me les ninna lentsa te krell, oun lau mange vavar menshen, te zilverenn le oun rhoyrenn pen pral menshende, kay prindjran man gar.

²² Miri rholi rhačell pre har i yag, oun rhačrell i tseli phoub, oun halauter, hoy ap late bares vas, oun rhačell tele bis an o telstunepen, oun vell bis tele pash i berge.

²³ Pale te pale anau me bibarht pral lende; me dau mire tsele fayle karye an lende.

²⁴ I bokatar merenn le, oun o fibro rhal len pre. Pharo nasslepen marell len. Me bičrau divye firhe oun čilače sapa mank lende, kay dandrenn len moulo.

²⁵ Ap i dromma marell len o rharo, oun an i khera i traash. Hakenes taprell o merepen: o terno morshes oun i terni čat, o ternepen oun kolen parne ballentsa.

^26-27 Te daroms me gar o sapen kolendar, kay hi rhoyedo pral lende, penoms me: “Me marau len halauteren, te vell lengro lab bistedo ap i phoub.” Kova krau gar, te phourdenn pen kolla gar pre, kay kouran pen lentsa, te nashte penenn yon gar: “Dran mari zoor vas kova. O baro Devel kras kava gar.”

²⁸ I Israelitarya hi menshe, kay lenn gar ap o dji, hoy lenge penlo vell. Kek gosvepen hi an lende.

²⁹ Har kamaus, te vans le gosevo! Palle hayvans le, hoy ap lende vella.

³⁰ Har nay las yek lourdo i zero (1.000) Israelitaryen palla? Har nay tradan douy lourde deesh-zerya (10.000) Israelitaryen yaake, te nashan le penge i daryatar? Kova vas, har o baro Devel, lengro rikepaskro, len an kolengre vasta das.

³¹ Kolengre debla hi gar har maro Devel. Kova djinenn oun penenn ninna kolla, kay kouran pen mentsa.

³² Yon molenn gar boudeder har i menshe dran Sodom oun Gomorra, oun hi har drakengre rouka, hoy hidjrenn djoungele drake, kolendar yek nasselo vell.

³³ Lengri mool hi har o čounger i sapestar, hoy marell oun nasselo krell.

³⁴ O baro Devel bistrell gar, hoy kolla kran, oun djinell, hoy kamell lo lentsa te krell.

³⁵ Yob penell: Me hom kova, kay dau len halauter ap lengro shero pale an ko tsiro, kay trissenn lengre herya. Gar dour hi o dives, kay vell lengri bibarht pral lende. Oun kova, hoy ap lende vell, kova vell sikepah.

³⁶ Čačepah o baro Devel dell peskre menshende lengro čačepen. Te dikell lo, har leskre boudepangre nashran pengri zoor, khaytenn le les. Te dikell lo, har kek ap lengri rig hi, krell yob peskro dji lenge pre.

³⁷ Oun yob poučell lendar: Kay hi kol zorele debla, pash kolende kaman t'mer t'men te khatrell?

³⁸ T'mer dan len o thulepen t'mare firhendar te rhal, oun čoran mool glan lende vin pipaske. Mou stenn le pre, te venn le ap t'mari rig, oun lenn t'men koy vin!

³⁹ Dikenn kanna dren, te hom me kokres o Devel, dell kek vavar Devel har man! Me marau oun me krau djido, me doukrau oun me krau sasto, oun dell kek, kay yekes dran miro vast nay vin lell.

⁴⁰ Me hadau miro vast oun dau man sovel pash miro djipen:

⁴¹ Me krau, te činell miro rharo mishto, te vell o čačepen kerdo. Oun me dau o čilačepen ap kolengre sherya pale, kay kouran pen mantsa. Oun miri rholi vell ap kolende, kay hi rhoyedo ap mande rhoyedo.

⁴² Kol fayle, kolentsa karye dau, lendar perell o rat tele – ko rat kolendar, kay me moulo dau, ninna kol pandlendar. Miro rharo rhal o mass kolendar, kay kouran pen mantsa, oun dell lengre sherya paash.

⁴³ T'mer menshe dran i vavar themma, sharenn o baro Debleskre menshen! Kolla, kay maran leskre boudepangre, kolenge dell yob halauter pale ap lengre sherya. Oun yob dell kolen halauter pale, kay kouran pen leha. Oun lell krik o praasepen, hoy ap o them peskre menshendar hi.

O Mose dell i menshen trad

⁴⁴ O Mose oun o Yosua, koleskro dad o Noun his, rakran kay gili glan i kanda i menshendar Israel.

⁴⁵ Har o Mose kal tsele laba glan i tsele Israelitarya vin rakras, penas lo ap lende:

⁴⁶ Denn yak ap kal tsele laba, hoy t'menge kava dives penom. Penenn len ninna t'mare čavenge, oun denn len trad, te rikrenn le pen ap kol tsele čačepaskre laba, oun djivenn pal lende.

⁴⁷ Kalla hi laba, hoy t'menge boud moldo hi. Yon hi t'maro djipen. Djivenn pal lende, oun t'mer djivenna i rah tsiro an ko them vergel o panyestar Yordan, kay kanna dren djan, te lenn les t'menge dren.

O baro Devel penell o Moseske, te nay dikell yob o them Kanaan

⁴⁸ Oun ap ko emligo dives rakras o baro Devel ap o Mose oun penas:

⁴⁹ “Dja pre ap kal berge Abarim an o them Moab ap i berga Nebo, hoy vergel o foro Yericho čiddo hi! Oun dik o them Kanaan. Kava them dau me i Israelitaryen, te vell ko them lenge.

⁵⁰ Oun tou mereh ap koy berga, ap koya tou pre djal, oun tou veh paskedo, har tiro phraal Aron meras ap i berga Hor oun kote paskedo vas.

⁵¹ T'mer douy nay djan gar an o them dren doleske, kay shounan gar ap mande, har hans pash ko pani, hoy kharell Meriba-Kadesh an o moulo them Tsin. Oun i Israelitarya dikan, har hadan t'mer man gar, oun moukan man gar te sikrell, te hom me o čačo Devel.

⁵² Tou dikeh o them glan toute, hoy me dau i Israelitaryen, dren djah tou gar.”