5. Mose 3 - O Debleskro Lab 2024 (Sinte-Manouche)

I Israelitarya lenn o them o baro rayestar Og dren

¹ Kote rissram oun lam o drom, hoy an o them Bashan pre djal. Oun o Og, ko baro ray pral Bashan, djas vin peskre tsele lourdentsa, te kourenn le pen mentsa pash o foro Edrei.

² Oun o baro Devel penas ap mande: “Ma dare lestar, me dom les oun leskre tsele lourden oun leskro them an tiro vast. Kre leha har kova o Sihoneha kral, ko baro rayeha pral i Amorarya, kay an o foro Heshbon djivas.”

³ Oun o baro Devel das ninna o Og, ko baro rayes pral Bashan peskre tsele lourdentsa an mare vasta. Oun mer dam len yaake rah bis te kek lendar bouder pral ačas.

⁴ An ko tsiro lam ko tselo kotar them Argob dren an o them Bashan, pral kova o Og o ray his, oun leskre tsele forya. Das kek foro lestar, hoy mer gar dren lam. Kolla his 60 (shob-deesh) forya.

⁵ Hako foro his i zorelo foro, koles bare massurya troul peste his. An lende his bare voudya, hoy sasterentsa pandlo van. Ninna his kote boud gaba, kolen kek massurya his.

⁶ Oun mer dam hakenes moulo, kay kote djivell: morsha oun djouvya oun čave, yaake har les ninna o baro rayeha Sihon an Heshbon kram.

⁷ Lengre firhe oun ko kouč koova, hoy an i forya his, randam menge.

⁸ Yaake lam menge an ko tsiro ko them dren, hoy his an i vasta kol douy bare rayendar pral i Amorarya, – ko them, hoy ap i vavar rig o lengsto panyestar Yordan čiddo hi, mank o lengsto pani Arnon oun i berga Hermon.

⁹ [Ap i berga Hermon penenn i menshe dran o foro Sidon berga Siryon. Oun i Amorarya penenn Senir ap late.]

¹⁰ Kolla his i tsele forya an o pralstouno them, ninna o tselo them Gilead, oun o them Bashan bis pash i forya Salka oun Edrei. Kol tsele forya pral kolende o Og dran Bashan o ray his, lam menge dren.

¹¹ Kokres o Og, ko baro ray pral Bashan, ačas djido kol bare menshendar, kay rise kharedo van. Har meras lo, vas lo paskedo an i barrengro morhton. Kova hi yaake star metarya baro oun douy metarya bourhlo, oun hi tardo an o foro Rabba an o them Ammon.

O them i familyenge Ruben oun Gad oun i paash familyake Manasse

¹² Kava tselo them lam mer an ko tsiro menge dren. Ko them, hoy hi čiddo serves o forestar Aroer oun o lengsto panyestar Arnon dom me i familyake Ruben oun i familyake Gad. Ninna dom me len o paash them Gilead oun kol forya koy dren.

¹³ Oun ko vavar paash o themestar Gilead oun o tselo them Bashan, kay o Og o ray his, kova dom i paash familyake Manasse. Kova his o tselo kotar them Argob. [Kava tselo them Bashan vell kharedo o them foun i rise.

¹⁴ O Yayr dran i familya Manasse las ko tselo kotar them Argob bis pash o them, kay i Geshourarya oun i Maakatarya djivenn. O Yayr kharas kol gaba an o them Bashan pal peskro lab o Yayreskre gaba. Oun yaake kharenn le gomme kava dives.]

¹⁵ O them Gilead dom me o morsheste Makir dran i familya Manasse.

¹⁶ Oun i menshenge dran i familya Ruben oun dran i familya Gad dom me ko kotar them čačes o themestar Gilead bis pash o lengsto pani Arnon – bis mashkral an kava pani. Ap koy rig, kay o kham pre djal, djas lengro them bis pash o lengsto pani Yabbok. Ap leskri vavar rig hi o them Ammon.

¹⁷ Ap i rig, kay o kham tele djal, djal o them bis pash o lengsto pani Yordan, oun kote foun o pani Génésareth bis pash o Londo Baro Pani, oun bis tella pash i berga Pisga, kote kay o kham pre djal.

¹⁸ An ko tsiro penom i morshenge dran kol familya Ruben, Gad oun Manasse: “T'maro baro Devel das t'men kava them, te lenn les t'menge dren. Kanna lenn t'maro kourepaskro koova oun djan t'mare phralenge, kol vavar Israelenge glan vin.

¹⁹ Moukenn t'mare djouvyen oun t'mare čaven an t'mare forya, hoy me dom t'men. Ninna t'mare firhen moukenn kote. Djinau, t'men hi boud firhe.

²⁰ T'mer kourepangre, avenn t'mare phralenge pash o vast yaake rah bis te lan le ko them dren, hoy o baro Devel len della ap i vavar rig o panyestar Yordan, oun bis te moukell lo len kote te djivell kek kourepah, yaake har yob ninna t'menge kras. Palle nay djan t'mer pale an t'maro them, hoy t'mende dom.”

²¹ An ko tsiro penom ap o Yosua: “Tire yaka dikan kova halauter, hoy t'maro baro Devel kal douy rayentsa kras. Oun yaake krell o baro Devel hako rayeha an hako them, kay tou djah.

²² Ma dare lendar! T'maro baro Devel hi kova, kay kourell pes t'menge.”

O Mose vell gar an o them Kanaan

²³ An ko tsiro mangom o baro Debles miro tselo djiyeha oun penom:

²⁴ “Baro Devel, miro ray, tou sikral man, tiro boudepaskres, tiro barepen oun tiro zorelo vast. An o bolepen oun ap i phoub hi kek vavar devel, kay nay krell savo baro koova an savi bari zoor har tou.

²⁵ Mangau tout, mouk man pral o pani Yordan vergel te djal oun ko lačo them te dikell, hoy kote hi, kol shoukar berge oun o Libanon.”

²⁶ O baro Devel his rhoyedo pral mande dran kova har t'mer hans, oun shounas doleske gar ap mande. Oun penas: “Mouk tele! Kanna hi doha! Rake mange gar bouder pral ko koova!

²⁷ Dja pral pre ap i berga Pisga, oun dik tout trouyel, dik serves oun čačes oun glan oun pal toute! Dik lauter mishto an! Tou djiness, te djas tou gar pral o Yordan vergel.

²⁸ Oun pen ap o Yosua: Ma traash, ab zoreles! Yob hi kova, kay djal glan i Israelitaryen vergel o pani Yordan, oun anell len dren an ko them, hoy tou dikeh, te lenn le les penge dren.”

²⁹ Oun mer ačam an o telstouno them, ap i vavar rig o forestar Bet-Peor.