5. Mose 29 - O Debleskro Lab 2024 (Sinte-Manouche)

¹ Oun o Mose moukas i tsele Israelitaryen gole te dell, oun penas ap lende: T'mer dikan halauter, hoy o baro Devel glan t'mare yaka kras an o them Egiptia, ap o Faraeste oun ap leskre bare morshende, oun ap o tselo them:

² Koy phari bibarht, hoy anas lo ap lende, hoy sikras, te hi yob o Devel, dikan t'mer t'mare yakentsa, savo baro oun zorelo koova, hoy kek vavar nay krell.

³ Oun bis ap kava dives das o baro Devel t'men gomme gar djia, hoy hayvenn oun yaka, hoy nay dikenn oun kanda, hoy nay shounenn.

⁴ 40 (star-deesh) bersha djas lo glan t'mende an o moulo tato them: T'mare koola djan gar paash, oun t'mare kirrha ap t'mare pire nashan pen gar tele.

⁵ T'men his kek maro te rhal, oun kek mool oun vavar zorelo pipen te piyell. O baro Devel das t'men rhapaske, te hayvenn t'mer, te hi yob t'maro Devel.

⁶ Oun har van t'mer ap kay platsa, kote djas o Sihon, ko ray pral o foro Heshbon oun o Og, ko ray pral Bashan vin, te kourenn le pen mentsa. Oun mer dam len.

⁷ Oun mer lam lengro them dren oun dam les i menshende dran o kheer Ruben oun dran o kheer Gad oun i paash familyate Manasse, te vell ko them lengro them.

⁸ Doleske denn yak ap kal laba, hoy t'maro Devel t'mentsa vin krell. Djivenn pal lende, te djal t'menge halauter mishto, hoy t'mer krenna.

⁹ Kava dives han halauter glan t'maro baro Debleste tardo: I pralstoune pral t'mare bare familyende, t'mare phoureder oun kolla, kay pral t'mende penepaske hi, hake morsha,

¹⁰ t'mare čave oun t'mare djouvya oun kol vi-themarya kolla mank t'mende djivenn, ninna kolla, kay t'menge o kasht tiknes denn oun o pani anenna.

^11-12 Kava dives han kate, te djan t'maro baro Debleha koy sovel dren, te venn t'mer leskre menshe, oun yob t'maro Devel, yaake har lo t'menge glan i tsiro penas, oun ninna t'mare phourenge penas, o Abrahameske, o Isaakeske oun o Yakobeske. Oun yob krell t'mentsa vin, hoy lo t'mendar kamella.

^13-14 Koy sovel djal lo gar t'mentsa kokres dren, kay han kava dives kate glan leste tardo. Na-a, ninna t'mare čaventsa, kay gomme gar boldo hi, djal lo koy sovel dren.

¹⁵ T'mer djinenn, har djivan an o them Egiptia, oun har djan mashkral kol themma, kay vavar menshe djivenn.

¹⁶ Kote dikan t'mer kolengre djoungele deblen, hoy pash lende hi, figure dran kasht oun bar, dran roup oun sonakay.

¹⁷ Doleske denn t'men yak, te vell kava dives mank t'mende kek morsh oun kek djouvel, vitar kek dadeskro kheer oun kek bari familya, kay rissrenn pen tele maro baro Deblestar, te mangenn le i deblen kol vavar menshendar an. Dran savo koova vals bibarht oun merepen menge halauterenge.

¹⁸ Kek te vell mank t'mende kava dives, kay shounell har kava praasepen vin rakedo vell, oun penell koy pashel an peskro dji: “Kova hi gar mange. Mange djal mishto, ninna te djau pal miro shero.” Kova vals djoungeles t'menge halauterenge, i lačenge har i čilačenge.

¹⁹ Ap saveste dikell o baro Devel gar lačes, na-a, pral koleste rhačell leskro dji i rholyatar. Oun ko tselo praasepen oun i tseli bibarht, hoy an kava liil činlo hi, vell ap leste čiddo. Oun o baro Devel krell, te vell yob oun leskri familya bistedo ap i tseli phoub.

²⁰ Yob čivell les infam, te hi lo kek Israelitari bouder. Oun ap leste vell koy bibarht, hoy koles taprell, kay tel o praasepen hi doleske kay rikras lo pes gar ap kova, hoy peskro baro Devel leha vin kras, yaake har an kava čačepaskro liil činlo hi.

²¹ Oun t'maro them vell pherdi bibarht oun pherdo nasslepen, hoy o baro Devel ap leste čivell. Oun an ko tsiro, hoy vella, dikenn kova t'mare čave oun kolla, kay lendar venna, ninna kol vi-themarya, kay dran dour themma venna.

²² Yon dikenn: O them hi rhačedo, i phoub pherdo loon oun shvefla. Lauter dikell vin har i forya Sodom oun Gomorra, Adma oun Seboyim, har o baro Debleskri bari rholi ap lende vas oun yon rhačedo van. Kek nay vitsrell djob an i phoub. Či vell bares. Kek zenlepen djal pre.

²³ Palle penenn i menshe dran i tsele vavar themma: “Hoske kras o baro Devel kava kau themeha? Hoske vas lo yaake rhoyedo?”

²⁴ Oun lenge vell penlo: Doleske, kay phagan le koy sovel, hoy o baro Devel, ko Devel lengre phourendar, lentsa dren djas, oun rikran pen bouder gar ap kova, hoy yob lentsa vin kras, har yob len dran o them Egiptia vin anas.

²⁵ Oun yon mangan vavar deblen an, oun vitsran pen glan lende tele, save deblen, kolen yon gar prindjran oun kolendar yob lenge gar penas, te mangenn le len an.

²⁶ Doleske rhačas o baro Debleskri rholi pre pral ko them, yaake te anas lo koy tseli bibarht pral leste, kolatar an kava liil činlo hi.

²⁷ Oun bari rholyah tradas len o baro Devel vin dran lengro them. Les khaytan le gar. Yob vitsras len an i vavar them, yaake har kova kava dives hi.

²⁸ Kova hoy khatedo hi, djinell kokres maro baro Devel. Mende sikras lo, hoy lo mendar kamell, te djivas mer pal kal tsele laba, hoy an kava čačepaskro liil činlo hi. Kova hi menge oun mare čavenge hako tsireske.