5. Mose 27 - O Debleskro Lab 2024 (Sinte-Manouche)

I barra i čačepaskre labentsa

¹ Oun o Mose khetne i phoureder morshentsa dran Israel penas ap i Israelitarya: Denn yak ap i tsele laba, hoy me t'menge kava dives penom!

² Ap ko dives, kay t'mer pral o lengsto pani Yordan vergel djan an ko them, hoy t'maro baro Devel t'men dell, palle lenn bare barra, oun čivenn len yek ap o vavar, oun makenn len parnes.

^3-4 Oun činenn kol tsele laba pre, hoy sikrenn, har te djan miro drom. Oun čivenn kal barra pre ap i berga Ebal! Kova krenn ap ko dives, kay venn an ko them, kay baro Devel t'men dell. Yob hi o Devel, koles t'mare phoure an-mangan. Oun yaake har yob lenge penas, hi kova i them, an koleste thoud oun gvin nashell.

⁵ Oun kote ap i berga Ebal čivenn t'maro baro Debleske i rhačepaskri pre dran barra, hoy gar i sasteha dino van!

⁶ Kol barrentsa, hoy gar dino van, krenn i rhačepaskri, oun marenn oun rhačrenn firhen kote t'maro baro Debleske, save firhen, kay venn tseles rhačedo,

⁷ oun vavar, kolengro rat leske vin čoredo vell, oun kolengro mass t'mer khetne rhan, oun barhteles han glan leste.

⁸ Oun ap kol pre-čidde barra činenn i tsele čačepaskre laba yaake, te nay dikell yek len mishto.

⁹ Oun o Mose oun i rashaya dran o kheer Levi penan ap i tsele Israelitaryen: “Ačenn Oun shounenn, t'mer Israelitarya! Kava dives van t'mer o baro Debleskre menshe. Yob hi t'maro Devel.

¹⁰ Doleske shounenn ap leste, oun rikrenn t'men ap leskre laba oun ap leskro čačepen, hoy t'menge kava dives penau!”

O Praasepen

¹¹ Ap kava dives penas o Mose i menshenge, hoy te krenn le. Yob penas:

¹² Te djan t'mer vergel o panyestar Yordan, hounte djan i menshe dran i khera Simeon, Levi, Youda, Issakar, Yosef oun Benyamin ap i berga Garizim, te shounenn le havi Debleskri barht pral i menshende vin rakedo vell.

¹³ Oun i menshe dran i khera Ruben, Gad, Asser, Zabulon, Dan oun Naftali kolla djan ap i berga Ebal, te shounenn le, havo praasepen nay vell pral i menshende vin rakedo.

¹⁴ Oun i Levitarya hounte denn ap i tsele morshende an Israel gole, oun penenn:

¹⁵ “Praasedo vell kova, kay krell pes i sasterni figura, ninna i kashteni figura, te mangell lo lat čorrhanes an! Savi figura kerdi mensheskre vastentsa hi djoungeles glan o baro Debleskre yaka.” Oun i tsele menshe hounte penenn: Amen!

¹⁶ “Praasedo vell kova, hoy ap peskro dadeste oun peskri date tele dikell!” Oun i tsele menshe hounte penenn: Amen!

¹⁷ “Praasedo vell kova, hoy i barra ap i rig čivell, hoy sikrenn har baro o vavareskro kotar them hi.” Oun i tsele menshe hounte penenn: Amen!

¹⁸ “Praasedo vell kova, kay anell i koreles ap i rhorheno drom.” Oun i tsele menshe hounte penenn: Amen!

¹⁹ “Praasedo vell kova, kay dell kek čačepen kolenge, kay venn dran i vi-them, kol čavenge, kolen kek dad bouder hi, oun kol romyenge, kolengro rom meras.” Oun i tsele menshe hounte penenn: Amen!

²⁰ “Praasedo vell kova, hoy i romyah peskro dadestar sovell, oun yaake ladj ap peskro dadeste anell.” Oun i tsele menshe hounte penenn: Amen!

²¹ “Praasedo vell kova, kay i firheha sovell!” Oun i tsele menshe hounte penenn: Amen!

²² “Praasedo vell kova, kay peskri phenyah sovell, pash i čate peskro dadestar oder peskri datar!” Oun i tsele menshe hounte penenn: Amen!

²³ “Praasedo vell kova, kay i romyah peskri romyakro dadestar sovell.” Oun i tsele menshe hounte penenn: Amen!

²⁴ “Praasedo vell kova, kay i vavares čorrhanes moulo dell!” Oun i tsele menshe hounte penenn: Amen!

²⁵ “Praasedo vell kova, kay i vavarestar love lell, te dell lo koleske i vavares moulo, ap koleste kek doosh hi.” Oun i tsele menshe hounte penenn: Amen!

²⁶ “Praasedo vell kova, kay rikrell gar kal tsele čačepaskre laba.” Oun i tsele menshe hounte penenn: Amen!