5. Mose 25 - O Debleskro Lab 2024 (Sinte-Manouche)

Vavar čačepaskre laba

¹ Te vell i čingepen mashkral morsha pre, oun yon glan čačepangre morshende stakrenn, oun o čačepen vell vin kerdo, palle vell pral koleste, kay an o čačepen his, glan halauterende vin rakedo, te hi yob an o čačepen. Oun pral koleste, koles doosh his, vell glan halauterende vin rakedo, te hi les doosh.

² Oun te his leskri doosh yaake, te hounte lell lo dava, palle penell o čačepaskro morsh, te čivell lo pes tele, oun moukell les yaake boud dava te dell glan leskre yaka, kitse dava hounte lell lo koy doshake.

³ Star-deesh dava nay moukell lo les te dell, oun kek dap boudeder. Te moukals lo leske boudeder dava te dell, nay dikans i vavar tele ap leste.

⁴ Te stakrell tiro gouroum o djob vin, pandess tou leske gar o mouy, te nay rhal lo gar!

⁵ Te djivenn phrala khetne, oun yek lendar merella, oun koles his kek morsh čave, palle hounte djal leskro phraal pash leskri romyate oun romedinerell lat, oun kek vavar morsh.

⁶ Oun ko ersto čavo, koles yoy ap i phoub anell, kharell har ko phraal, kay meras, yaake te merell koleskro lab gar vin an Israel.

⁷ Te kamell ko phraal koy djouvyat gar te romedinerell, palle djal li pash i phoureder morshende an o foro, oun penell ap lende: O phraal miro romestar, kay meras, kamell man gar te romedinerell, yaake te merell o lab miro romestar an i Israel gar vin.

⁸ Palle denn i phoureder ko forestar les gole oun rakrenn leha. Oun yob te penell pale Me kamau gar te romedinerap lat,

⁹ palle stakrell koy djouvel glan leste, oun glan i yaka kol phoureder morshendar rivell li leske yek kirrha vin. Oun čoungrell leske an o mouy, oun penell: “Yaake hounte vell kerdo ko morsheske, kay kamell gar peskro phraleste i čaves te dell.”

¹⁰ Oun leskro kheer kharell an Israel o kheer o pirkeneskro morshestar.

¹¹ Te čingrenn pen morsha khetne, oun i romni ko yekestar vell pashel, te lell li peskro romes dran o vast kolestar, kay les dell. Oun yoy taprell peskro vasteha mashkral i herya ko vavar morshestar,

¹² palle vell lake ko vast tele dino. Yoy hounte khaytell t'men gar.

Ma rhorhe pash o bikepen oun pash o ginepen!

¹³ Te bikreh čomone, ma čip i tikneder bar ap i vaga, har te gineh čomone! Te gineh čomone, ma čip i bareder bar ap i vaga!

¹⁴ Te kameh te dikell, har boud čomone hi, hounte less gar i tikneder piri pash o bikepen, oun i bareder piri pash o ginepen.

¹⁵ Le save barra oun pirya, kolen o čačo barepen hi! Palle djiveh i rah tsiro an ko them, hoy t'maro baro Devel tout dell.

¹⁶ O baro Debleske hi menshe, kay rhorhepen krenn, djoungeles.

Denn i Amalekaryen pale, hoy yon ap t'mende kran

¹⁷ Ma bistrenn, hoy i Amalekarya t'men kran, har hans ap o drom vin dran o them Egiptia.

¹⁸ Har hans khino ap o drom, djan le ap t'mende pre, oun dan kolen moulo, kay pale ačan, oun kek zoor bouder an lende his. Kol Amalekarya rikran penge gar o Debles glan i yaka.

¹⁹ Ap ko tsiro, kay lan t'mer ko them dren, hoy t'maro baro Devel t'men dell, oun t'mer bouder gar an o kourepen han kolentsa, kay troul t'mende djivenn, palle denn kol tsele Amalekaryen moulo, yaake te ačell či lendar pral, hoy sikrell, te his i tsiro, kay djivan le. Oun kova bistrenn gar!