5. Mose 23 - O Debleskro Lab 2024 (Sinte-Manouche)

¹ Kek morsh hounte lell peskro dadeskri romyat oun anell yaake ladj ap peskro dadeste.

Kolla, kay nay venn gar khetne o Debleskre menshentsa

² I morsh, kay yaake činlo oun doukedo hi ap peskro mass, te hi lo bouder kek morsh, savo morsh nay vell gar kote, kay o baro Debleskre menshe khetne venna.

³ Kek morsh, koleskri day gar romedini hi, nay vell kote t'mentsa khetne, kay o baro Debleskre menshe khetne venna. Ninna leskre čave nay venn gar kote, yaake rah har deesh familye yek pal i vavar djivenna.

⁴ Kek Ammonari oun kek Moabari vell kote t'mentsa khetne, kay o baro Debleskre menshe khetne venn, yaake rah har deesh familye yek pal i vavar djivenna. An kek tsiro nay venn le kote.

⁵ Yon van gar pash t'mende mareha oun panyeha, har hans ap drom dran o them Egiptia. Oun yon playsran love o morsheske Bileam, koleskro dad o Beor his, dran o foro Petor an o them Mesopotamia, te rakrell lo bibarht pral t'mende vin.

⁶ T'maro baro Devel kamas gar ap o Bileam te shounell. Yob kamas t'men o djiyestar. Doleske kras lo, te rakras o Bileam i barht pral t'mende vin, oun kek bibarht.

⁷ Ma rodenn koy pal, te djal kol menshenge mishto an i themma Moab oun Ammon, oun te venn le bravelo.

⁸ I Edomaryen čivenn gar pale! Yon hi t'mare phrala. Vitar gar čivenn i Egiptaryen pale. An lengro them djivan i rah tsiro.

⁹ I čave lengre čavengre čavendar, kolla nay venn kote t'mentsa khetne, kay o baro Debleskre menshe khetne venna.

I lourdengri platsa hounte ačell djoudjo

¹⁰ Te djan t'mer vin, te kourenn t'men kolentsa, kay kamenn t'men gar an pengro them, palle denn t'men yak, te krenn koy platsa gar pale-čiddo, kay čivenn t'mare plarhtene khera pre.

¹¹ Te djas i lourdeske mank t'mende čomone an i rat, oun yob vell yaake pale-čiddo, hounte djal lo vin glan i platsa oun ačell kote o tselo dives.

¹² Ap i rati nay thovell lo pes. Oun har o kham tele djas, vell lo pale nay ap t'mari platsa.

¹³ Glan koy platsa, kay t'mare plarhtene khera tardo hi, rodenn i vavar platsa vin, kay nay djan t'mer ap i rig.

¹⁴ Oun hakeno, kay djal kote, lell i kasht peha, hadell i tikni rheb vin, beshell pes, oun čakrell palle kova, hoy lestar vin djas.

¹⁵ T'maro baro Devel djal t'mentsa oun hi mashkral t'mende ap i platsa, te vell lo t'menge ap i rig, oun te krell lo t'men zorleder har kol vavar, kolentsa kourenn t'men. Doleske hounte vell t'mari platsa djoudjo. Kek vi-ladjedo koova te vell mank t'mende diklo, te djal lo gar peske t'mendar.

Har hakeno hounte djivell mank t'mende

¹⁶ I pandlo boudepaskro, kay peskro rayestar krik nashas oun pash t'mende vell, koles denn t'mer gar an o vast peskro rayestar pale.

¹⁷ Yob nay djivell pash t'mende an i foro t'mendar, hoy yob peske vin rodell, kote kay les an peskre yaka mishto hi. Oun t'mer rikrenn les gar i zoryah tele.

¹⁸ Mank i Israelitarya hounte vell kek djouvel oun kek morsh, kay bikrell pes lovenge an o kheer i vavar deblestar.

¹⁹ Kol love, hoy save menshe lenna, hounte anell kek an o kheer t'maro baro Deblestar, te playsrell lo kolentsa i sovel, hoy lo das. Save love hi djoungeles glan o baro Debleskre yaka.

Ma pouč boudeder love pale, har tou patsal!

²⁰ Te patsal love tiro phrales, less tou kek love boudeder ap kol love, hoy tou les patsal, vitar gar pash rhapen oun vavar koova, hoy yek nay patsell. Tou less kova pale, hoy tou les dal, oun gar boudeder.

²¹ Yekestar, kay hi dran i vavar them, nay leh tou boudeder, har tou leske patsal, tiro phralestar less tou gar boudeder. Palle nay dell tout tiro baro Devel barht an halauter, hoy tou an-tapreh an ko them, an koleste t'mer venn, te lenn les t'menge dren.

Har te dess i sovel o baro Debleske

²² Te dal tou tout sovel glan tiro baro Debleste, palle ma mouk touke kek tsiro, te playsress kova ninna. Tiro baro Devel dikell koy pre, te deh tou kova leste. Te deh les gar, aneh tou doosh ap toute.

²³ Te deh tou tout gar sovel, palle hi ninna kek doosh ap toute.

²⁴ Te kamal tou tout sovel te dell glan tiro baro Debleste, hounte rikress tou ninna, hoy penal, oun kress les yaake har tou vin rakral.

Tout hi o čačepen te rhas an i vavareskro molyakro them oun ap leskro djobeskri phoub

²⁵ Te veh tou an i molyakro them, hoy i vavares hi, palle nay rhah tou yaake boud drake, har tou kameh, bis te čales hal. An i piri čivess tou kek drake khetne.

²⁶ Te veh tou ap i harhetikri phoub i vavarestar, palle nay leh ko djob tiro vasteha tele. O djobeskro čouryeha činess tou kek djob tele, te aness les khere.