5. Mose 21 - O Debleskro Lab 2024 (Sinte-Manouche)

Hoy te krenn t'mer, te vell yek maredo, oun kek djinell, koon kova kras

¹ Te vell i moulo mensho vin glan o foro čiddo hatslo an o them, hoy t'maro baro Devel t'men dell, te lenn t'mer les dren, oun kek djinell, koon les moulo das,

² palle djan i phoureder oun i čačepangre morsha vin pash koy platsa, kay lo čiddo hi, oun dikenn palla, har dour hi bis pash kol forya, hoy kote čiddo hi.

³ Oun i phoureder dran ko foro, hoy o glanstouno pash ko mouleste tardo hi, kolla lenn i terni groumni, hoy boudras gomme gar ap i harhetikri phoub,

⁴ oun anenn lat tele an i telstouno them, kay i pani nashell, oun hoy kek harhetikri phoub hi, oun kote phagenn le koy terni groumyake i meen.

⁵ Palle stakrenn i rashaya dran o kheer Levi glan. Kolen rodas t'maro baro Devel vin, te krenn le leskri boudi, oun te rakrenn le leskri barht vin pral i menshende. Oun an i čingepen oun pal i marepen rakrenn le o čačepen vin.

⁶ Oun kol tsele phoureder dran ko foro, hoy o glanstouno tardo hi pash ko mouleste, kolla thovenn pengre vasta panyeha tele pral koy mouli terni groumni.

⁷ Oun yon hounte penenn: “Mer dran kava foro, mer dam gar ko menshes moulo, oun mare yaka dikan gar, koon kova kras.

⁸ Baro Devel, mangah tout, le kay doosh mendar, tire menshendar Israel, kolen tou dran o pandepen vin lal. Ma dik ap mende, har te vams mer kolla, kay maram i menshes, ap koleste kek doosh čiddo hi.” Palle lell o baro Devel koy doosh lendar krik.

⁹ Yaake krenn t'mer, hoy mishto hi glan o baro Debleskre yaka, oun čivenn ko čilačepen krik mashkral t'mende. Oun yob dikell gar ap t'mende, har te vans t'mer, kay dan koles moulo.

Ninna i pandli djouvyat hi peskro čačepen

¹⁰ Te djan t'mer an o kourepen, oun t'maro baro Devel dell kolen, kay kourenn pen t'mentsa an t'maro vast, yaake te anenn t'mer lendar pandlen krik,

¹¹ oun yek t'mendar dikell i shoukar djouvel mank kol pandlende, oun kamell lat oun kamell te romedinerell lo lat,

¹² palle nay anell lo lat an peskro kheer. Kote hounte činell li peskre shereskre bal oun peskre naya.

¹³ Oun yoy rivell peskre ripya vin, hoy ap late his, har li pandli vas. Oun yoy ačell an leskro kheer oun rovell i tselo čon pral peskro dad oun peskri day. Pal ko tsiro nay djal ko morsh pash late, te romedinerell lo lat.

¹⁴ Te vell i tsiro, kay kamell lo lat bouder gar, hounte moukell lo lat te djal, kay li kamell. Yek koova hounte krell yob gar: Yob nay bikrell lat gar lovenge, oun nay rikrell lat gar, te vell li leskri boudepaskretsa! Yoy his leskri romni.

O phoureder čaveskro čačepen

¹⁵ Te hi i morshes douy romya, oun yob kamell koy yek boudeder har koy vavar, oun hakeni las lestar yek morsh čavo, oun o phoureder morsh čavo hi kolatar, kolat yob gar kamell,

¹⁶ ap ko dives, kay kamell ko morsh peskro bravlepen peskre čavende te dell, nay dell lo gar koleste boudeder, kay hi kolatar, hoy kamas lo, har te vals yob o phoureder.

¹⁷ Na-a, yob hounte dell ko vavares douy kope yaake boud, yob hi o phoureder, ninna te his lo koy romyatar, kolat kamell lo gar. Yob vas glanstounes boldo oun leske hi o čačepen, te lell lo, hoy o phoureder lell.

I phagi i bipandle morsh čavenge

¹⁸ Te hi i romes i morsh čavo, kay hi bipandlo, oun krell halauter pal peskro shero oun shounell gar ap peskro dadeste oun peskri date, ninna te čingrenn le ap leste oun denn les dava,

¹⁹ palle hounte anenn o dad oun i day les pash i phourende an ko foro ap i platsa, kay venn le khetne.

²⁰ Oun penenn ap lende: “Kava hi maro morsh čavo. Yob hi bipandlo, oun krell halauter pal peskro shero, oun shounell gar ap mende. Yob hi i pipaskro oun i rhapaskro.”

²¹ Oun i tsele morsha dran ko foro hounte vitsrenn barra ap leste, bis te hi lo moulo. Yaake vitsrenn t'mer o čilačepen dran t'mende vin. Oun i tsele Israelitarya hounte shounenn kolestar oun darenn.

I pre-pandlo morsh hounte vell sik paskedo

²² Te kras yek i čilačo koova, koleske yob moulo dino hounte vell, oun yob vas maredo oun ap i kasht pre pandlo,

²³ palle ačell ko moulo gar pral i rat ap ko kashteste. Na-a, yob hounte vell paskedo ap ko emligo dives, te vell ko them gar pale-čiddo, hoy t'maro baro Devel t'men dell. Pash leste hi kova praasedo, kay hi pre-pandlo ap i kasht.