5. Mose 20 - O Debleskro Lab 2024 (Sinte-Manouche)

Kova, hoy hounte krenn, glan te djan an o kourepen

¹ Te djan t'mer vin an o kourepen, te kourenn t'men kolentsa, kay kamenn t'men gar an o them, oun t'mer dikenn lengre graya oun kourepaskre vourdya oun lengre lourden, kay hi boud boudeder har t'mer, palle ma darenn lendar! T'maro baro Devel hi t'mentsa, kova kay t'men dran o them Egiptia vin anas.

² Glan te stenn t'mer pre oun djan an o kourepen, stakrell o rashay glan oun penell ap t'mare kourepangre:

³ “Morshale dran Israel, shounenn! T'mer djan kava dives an o kourepen, te kourenn t'men kolentsa, kay kamenn t'men gar an o them. Avenn zorelo! Ma darenn lendar! Oun ma moukenn t'men traash te krell!

⁴ T'maro baro Devel hi kova, kay djal t'mentsa oun kourell pes t'menge lentsa. Yob hi ap t'mari rig.”

⁵ Pal kova hounte rakrenn i pralstoune ap i kourepangre oun poučenn: Hi mank t'mende yek, kay i kheer pre tardo čivas oun moukas gomme gar o Debleskri barht pral kova vin te rakrell? Kova hounte djal pale an peskro kheer, te merell lo gar an o kourepen, oun i vavar morsh djivell an leskro kheer.

⁶ Hi mank t'mende yek, kay drakengre rouka an i phoub čivas, oun las gomme kek drake dren? Kova hounte djal pale an peskro kheer, te merell lo gar an o kourepen, oun i vavar morsh lell kol drake.

⁷ Hi mank t'mende yek, koles i pirni hi oun yob las lat gomme gar pash peste? Kova hounte djal pale an peskro kheer, te merell lo gar an o kourepen, oun i vavar morsh lell lat peske.

⁸ Oun i pralstoune hounte poučenn i morshendar pale: Hi mank t'mende yek, koles daar hi, oun koleskro dji trissella? Kova hounte djal pale an peskro kheer, te krell lo gar i djia peskre phralendar darenes.

⁹ Oun pal kava rakepen hounte čivenn i pralstoune morshen pral i lourdende, te djan yon glan i lourdende an o kourepen.

¹⁰ Te djan t'mer glan i foro, te kourenn t'men kolentsa, kay kote djivenn, pale poučenn lendar glanstounes, te kamenn le pre te dell kek kourepah.

¹¹ Oun te penenn le, te kamenn le kek kourepen, oun krenn t'menge o foreskre voudya pre, palle lenn kol tsele menshen, kay kote dren hi, te hounte boudrenn t'menge i zilah.

¹² Oun te kamenn le gar pre te dell, oun kamenn pen te kourell t'mentsa, palle djan troul ko foro oun pandenn les dren, yaake te nay djal kek bouder dren oun kek bouder vin.

¹³ Oun ap ko tsiro, kay dell t'maro baro Devel les an t'maro vast, denn i tsele morshen moulo o rhareha.

¹⁴ I djouvya oun i čave oun i tsele firhe oun halauter, hoy t'mer dran o foro randan, kova rikrenn t'menge! Oun t'mer nay rhan ko tselo rhapen, hoy his kolen, kay kaman t'men gar. T'maro baro Devel das les t'menge.

¹⁵ Yaake krenn t'mer i tsele foryentsa, kay hi dour t'mendar krik, oun gar kate an o them, hoy lenn t'mer dren.

¹⁶ An kol forya, hoy hi an ko them, hoy t'maro baro Devel t'men della, hounte moukenn t'mer kekes djido, kek menshes vitar kek firhes.

¹⁷ Moulo dino hounte venn le halauter: i Hetarya, i Amorarya, i Kanaanitarya, i Perisarya, i Hivarya oun i Yebousarya. Yaake penas t'menge t'maro baro Devel, te hounte krenn.

¹⁸ Te krenn t'mer kova gar, anenn le t'menge pashel, har te krenn ko tselo djoungelo koova, hoy yon pengre deblenge kran. Oun yaake anens t'mer doosh ap t'mende glan t'maro baro Debleste.

¹⁹ Te han boud divessa troul i foro tardo, koles t'mer kamenn te dell oun dren te lell, oun moukenn kekes dren oun kekes vin te djal, palle denn gar kol rouka kote tele. Kolendar nay rhan. Doleske ma denn len trouyel! Yon hi kek menshe, kolentsa hounte kourenn t'men!

²⁰ Save rouka, kolendar djinenn, te rhal kek lendar, kolen nay denn t'mer trouyel, oun nay krenn dromma lendar, te nay venn t'mer an ko foro, hoy an o kourepen t'mentsa hi, oun nay lenn les dren.