5. Mose 18 - O Debleskro Lab 2024 (Sinte-Manouche)

Kova, hoy i rashaya hounte lenna

¹ I rashaya – yon hi lauter dran o kheer Levi, – kolla lenn kek them an Israel. Yon rhan kolestar, hoy i vavar Israelitarya o baro Debleske anenn, te vell kova leske rhačedo.

² Kek them lenn i Levitarya an Israel har lengre phrala lenna. Kova hoy yon lenna, hi lengri boudi o baro Debleske. Yob kokres dikell ap lende, te hi len lauter, hoy len hounte vell. Yaake penas lo lenge.

³ Kava hi, hoy i rashayen hounte vell: Te anell yek i groumni, oder i bakro o baro Debleske, hounte dell lo kolestar o phik, kol douy čamya oun i bouke o rashayeske.

⁴ Ninna vell i rashayen hako bersh o nevo djobestar, i nevi molyatar oun o nevo djetestar, hoy t'mer dren anan. Ninna o bakrengro bal, hoy o ersto kopo tele činlo vell, hi lenge.

⁵ T'maro baro Devel rodas peske o kheer Levi vin dran i tsele Israelitaryen, te venn i morsha dran o kheer Levi leskre rashaya hako tsireske.

⁶ Te kamell i Levitari ko foro te moukell, kay djivell lo an Israel, oun kamell ap koy platsa te djal, hoy o baro Devel peske vi-rodell,

⁷ kova nay vell, te krell lo o baro Debleskri boudi yaake har kol vavar Levitarya ninna, kay kote i rashaya hi.

⁸ Palle lell yob ninna yaake boud rhapen har kol vavar ninna lenn. Oun kova, hoy lo peskro dadestar las, hi les gomme pral pre.

Denn yak, te krenn kek bengeskro koova!

⁹ Te venn t'mer an o them, hoy t'maro baro Devel t'men dell, palle krenn gar ko djoungelo pale-čiddo koova, hoy krenn i menshe, kay kote djivenn.

¹⁰ Kek mank t'mende hounte rhačrell peskro morsh čaves oder peskri čat an i yag o Debleske. Kek mank t'mende hounte vell i dourkepaskro, kek i dravepaskro, kek, kay krell vavar bengeskri koova,

¹¹ kek, kay rakrell bibarht vin an o bengeskri zoor, kek, kay i moulentsa rakrell oder i moulen poučell.

¹² Koon savo koova krella, hi pale-čiddo glan o baro Debleskre yaka. Dran savo djoungelo pale-čiddo koova tradell t'maro baro Devel kol vavar menshen dran o them vin glan t'mende.

¹³ Pash t'mende hounte vell savo koova gar hatslo. T'mer han o baro Debleskre menshe.

¹⁴ Kol menshe, kolengro them t'mer dren lenna, kolla shounenn ap dravepangre oun dourkepangre. T'menge penas t'maro baro Devel, te krenn kova gar.

O Devel kamell i morshes te bičrell, kay hi i Debleskro rakepaskro har o Mose kova hi

¹⁵ I Debleskro rakepaskro, har me yek hom, yek, kay vell t'mendar, koles bičrell t'maro baro Devel pash t'mende. Ap koleste shounenn!

¹⁶ Ap ko dives, kay hans khetne pash i berga Horeb, mangan t'mer kova t'maro baro Deblestar, oun penan: Mer kamah bouder gar o rakepen maro baro Deblestar te shounell, oun kay bari yag kamah vitar gar bouder te dikell, te hounte meras gar!

¹⁷ Oun o baro Devel penas ap mande: Mishto hi, hoy yon rakran.

¹⁸ I Debleskro rakepaskro har tou yek hal, kay vell lendar, koles bičrau me lenge. Oun me kamau leske mire laba an leskro mouy te čivell. Oun yob rakrell ap lende halauter, hoy me leske penau.

¹⁹ Oun ko mensho, kay gar ap mire laba shounell, hoy i rakepaskro an miro lab rakras, koleske dau me i phagi.

²⁰ Te phourdell pes i Debleskro rakepaskro pre, oun penell i rakepen an miro lab, hoy me leske gar penom, te hounte rakrell lo, savo rakepaskro hounte merell. Ninna te rakrell yob an o lab i vavar deblestar, hounte merell lo.

²¹ Te poučenn t'menge t'mendar: Har djinas mer, havo lab o baro Devel gar rakras?

²² Djinenn: Te rakrell ko Debleskro rakepaskro an o lab o baro Deblestar, oun kova hoy yob rakras vell gar čačo, yaake his ko lab hoy yob rakras gar o baro Deblestar. Ko rakepaskro kamas pes peskro rakepah bares te krell. Tou daress gar lestar!