5. Mose 16 - O Debleskro Lab 2024 (Sinte-Manouche)

Kol bare divessa, hoy kharenn Passa

¹ Denn yak, te bistrenn gar kol bare divessa, kay kharenn Passa! Rikrenn len an o čon Abib, te sharenn t'maro baro Debles! O čon Abib his, kay anas lo t'men rati dran o them Egiptia vin.

² Djan ap koy platsa, hoy t'maro baro Devel peske vin rodell, te vell yob kote an-mangedo. Oun kote marenn leske i firho, nay vell i bakro, i bouzni oder i groumni, hoy rhan pash o rhapen, hoy vell Passa kharedo.

³ Te rhan t'mer ko rhapen, ma rhan maro koy pashel, kay shoutlo yarro dren hi. Har djan t'menge dran o them Egiptia vin, hounte rhan efta divessa maro, an koleste kek shoutlo yarro dren his, yaake sik hounte nashenn t'menge. Kanna rhan ninna efta divessa maro, kay kek shoutlo yarro dren hi, te bistrenn gar ko dives, kay djan dran o them Egiptia vin, kay anan le yaake boud douka ap t'mende. Doleske kharah mer kava maro doukengro maro.

⁴ Oun efta divessa vell kek shoutlo yarro pash t'mende diklo an t'maro tselo them. Oun ko mass ko firhestar, hoy t'mer an koy rat maran, hounte rhan t'mer an koy emligi rat. Či te ačell pral ap i tsalla.

⁵ T'mer nay marenn gar kol firhen o rhapaske Passa an t'mare gaba oun forya, kolen t'maro baro Devel t'men dell, te djivenn kote.

⁶ Na-a, ap koy platsa, hoy t'maro baro Devel peske vin rodell, kote marenn kol firhen o rhapaske Passa. Krenn kova ap i rat, te djal o kham tele. Kova hi ko tsiro, har t'mer dran o them Egiptia vin djan.

⁷ Kerenn ko mass, oun rhan les ap koy platsa, hoy t'maro baro Devel peske vin rodell. Oun o vavar dives taysarlakro djan pale khere!

⁸ Palle rhan shob divessa savo maro, an koleste kek shoutlo yarro hi! Oun ap o eftato dives avenn khetne, te sharenn t'maro baro Debles! Ap ko dives krenn kek boudi!

Ko baro dives, kay anenn i Israelitarya o Debleske lengro nevo djobestar

⁹ Efta kourke pal ko dives, kay djan vin ap t'mari phoub te činenn o djob tele,

^10-11 avenn khetne glan t'maro baro Debleste, ap koy platsa, kay yob peske vin rodell, te vell lo kote an-mangedo. Anenn leske kolestar, hoy dren anan, kova, hoy kamenn t'mendar vin dran t'maro vast te dell, yaake har t'maro baro Devel t'mende peskri barht das. Oun avenn barhteles glan leste, t'mer oun t'mare čave, oun t'mare boudepangre oun i Levitarya oun i vi-themarya, kay pash t'mende djivenn, ninna kol čave kek dadeha oun kol djouvyen kolengro rom meras.

¹² Oun ma bistrenn, te hans t'mer pandle boudepangre an o them Egiptia. Oun denn yak ap kal laba, te rikrenn t'men ap lende!

Kol bare divessa, kay djivenn t'mer an patyengre khera

¹³ Oun pal i niyal, te dan t'maro tselo djob vin oun anan i drake dren, rikrenn kol bare divessa dren, kay djivenn an patyengre khera. Efta divessa djivenn an lende,

¹⁴ rhan oun avenn barhtelo, t'mer oun t'mare čave oun ča, t'mare boudepangre oun i Levitarya oun vi-themarya, kay pash t'mende djivenn, ninna i čave, kolen kek dad bouder hi, oun kol djouvya, kolengro rom meras.

¹⁵ Efta divessa rhan oun avenn barhteles glan t'maro baro Debleste ap koy platsa, hoy yob peske vin rodell. Yob čivas peskri barht ap halauter, hoy ap t'mari phoub bares vas oun ap t'mari tseli boudi. Doleske avenn barhtelo!

¹⁶ Triin kope an o bersh hounte venn t'mare tsele morsha glan t'maro baro Debleste ap koy platsa, hoy yob peske vin rodell: ap kol bare divessa, kay rhan kek maro dran shoutlo yarro, oun ap ko baro dives, kay anenn o baro Debleske o nevo djobestar, hoy t'mer dren anan, oun ap kol divessa, kay djivenn an patyengre khera. Oun kek vell, koles či pash peste hi, hoy yob o baro Debleske anella.

¹⁷ Hakeno della pal kova, hoy leskro vast nay pre anella, yaake har t'maro baro Devel leste peskri barht das.

Čačepangre morsha oun pralstoune

¹⁸ Čivenn čačepangre morshen oun vavar pralstunen dren an t'mare forya, hoy t'men t'maro baro Devel della! Yaake te hi an hako them kol deesh-te-douy bare familyendar čačepangre, kay rakrenn o čačepen yaake vin pral pengre menshende, te lell hakeno peskro čačepen.

¹⁹ Te hal tou i čačepaskro, hounte dess tou koles peskro čačepen, koon an o čačepen hi. Tou dikess gar koy pre, koon glan toute tardo hi. Te dell yek tout kouč koova, te dess tou les čačepen, ma le kova an! Koon savo shoukar kouč koova an-lell, vell korelo o čačepaske, oun dikell bouder gar, koon an o čačepen hi.

²⁰ Rike tout ap kova hoy čačes hi, te djivess an o them, hoy tiro baro Devel tout dell.

Ma mangenn o baro Debles oun ninna i vavar debles an!

²¹ T'mer hounte čivenn kek kasht pre, hoy sikrell i debletsa Ashera, oun čivenn les pre pash koy rhačepaskri, hoy krenn t'mer t'maro baro Debleste.

²² T'mer hounte čivenn kek barra pre, te mangenn i vavar debles an. Savo koova hi djoungeles glan o baro Debleskre yaka.