5. Mose 15 - O Debleskro Lab 2024 (Sinte-Manouche)

O Debleskro bersh, kay hounte moukess tiro phraleske leskri siyaan

¹ Hake efta bersha, hounte moukenn t'mer koy siyaan, hoy yekes pash t'mende hi.

² Krenn kova yaake: Hakeno, kay i vavar Israelitares love patsas, moukell leske kanna koy siyaan. Yob te mangell gar koy siyaan pale leskro phralestar. Hi i baro Debleskro bersh, kay i tseli siyaan mouklo vell.

³ Yekestar, kay hi i vi-themari, nay mangenn t'mer leskri siyaan pale. T'maro phraleske hounte moukenn lat.

^4-5 Te shounenn t'mer ap t'maro baro Debleste oun djivenn pal kol tsele laba, hoy me t'menge kava dives penau, palle vell kek čorvelo mank t'mende. T'maro baro Devel čivell peskri barht ap t'mende an ko them, hoy yob t'men dell.

⁶ Yob rikrell peskro lab, hoy lo t'mende das, oun dell t'men yaake boud, te nay patsenn t'mer love i menshenge dran vavar themma. T'mer hounte patsenn t'menge kekestar love. T'mer venn i raya pral i menshende an boud vavar themma. Pral t'mende vell kek vavar them o ray.

⁷ Te hi i čorvelo pash toute, kote an ko foro, kay djiveh an ko them, hoy t'maro baro Devel t'men das, palle ma kre tiro dji pandles, kre tire vasta pre glan leste!

⁸ Kre tire vasta leske dour pre! Oun pats leske love ap kova, hoy yob touke koy čivell, te vell les ap halauter pale doha.

⁹ De tout yak, te vell touke gar an o dji, te dess les či doleske, kay ko eftato bersh gar bouder dour hi. Ma pen touke: Palle hounte moukap leske koy tseli siyaan. Oun yaake dikeh čilačes ap leste oun deh leste či. Oun yob dell gole ap o baro Debleste pral toute. Oun ap toute vell i doosh!

¹⁰ De leste o djiyestar! Ma ab bokelo! Palle dell tout tiro baro Devel barht an halauter, hoy kreh oun tiro vast an taprell.

¹¹ Hako tsiro hi čorvele an o them. Doleske penau me t'menge: Krenn t'mare vasta pre t'mare phralenge, kolen gar doha djipaske hi!

Moukenn i pandle boudepangren te djal an o eftato bersh!

¹² Te bikras pes i vavar Israelitari ap toute, – morsh oder djouvel – palle boudrell lo touke shob bersha, oun an o eftato bersh moukess les te djal.

¹³ Oun te moukeh les te djal, palle hounte djal lo gar vastentsa, kay či dren hi.

¹⁴ Tou dess les tire bakrendar, tiro djobestar oun tiri molyatar, halauterestar, hoy tiro baro Devel tout das.

¹⁵ Oun tou bistress gar, te hals i boudepaskro an o them Egiptia, oun tiro baro Devel las tout kote vin. Doleske penau me touke kova kava dives.

¹⁶ Yob te penell ap toute: “Me kamau gar toutar te djal. Kamau tout oun tiri familya o djiyestar. Pash toute djal mange mishto.”

¹⁷ Palle less i kashteni soub oun dess lat an leskro kand ap tiro voudar čourye. Yaake vell lo tiro boudepaskro hako tsireske. I boudepaskretsah kress kova ninna yaake.

¹⁸ Te hounte moukess i boudepaskres te djal, mouk kova touke gar phares te vell an tire yaka. Yob boudras touke shob bersha yaake boud har douy boudepangre, kolen hako dives hounte playsress. Palle dell tout tiro baro Devel barht an halauter, hoy tou kreh.

De o Debleske kol firhen, hoy i phoureder lengre dayendar hi

¹⁹ Tire tsele morsh groumya oun bakre, kay i phoureder lengre dayendar hi, hounte dess tiro baro Debleste. Kal groumyentsa boudress gar ap tiri harhetikri phoub, vitar gar činess kal bakrenge i balla.

²⁰ Glan tiro baro Debleste rhas len tou oun tiro tselo kheer hako bersh ap koy platsa, hoy o baro Devel peske vin rodell.

²¹ Te hi čomone djoungelo ap ko firho, te hi les i bangi heri, te hi lo korelo, oder i vavar doosh hi ap leste, palle rhačress les tou gar tiro baro Debleske.

²² An tiro foro nay rhah les. Hi yek, te hal erligo oder pale-čiddo. Kova hi yaake, har rhals i vesheskri bouzni oder i tserfo.

²³ Kokres lakro rat rhas tou gar! Tou čoress les ap i phoub har pani.