5. Mose 14 - O Debleskro Lab 2024 (Sinte-Manouche)

Ma rovenn i moulenge yaake, har kol vavar menshe krenna

¹ T'mer han i čave t'maro baro Deblestar. An ko tsiro, kay rovenn i mouleske, ma činenn t'maro mass leske! Oun ma činenn i balla pral t'mare yaka!

² T'mer han o baro Debleskre menshe. Yob hi t'maro Devel. T'men rodas lo vin dran i tsele themma ap i phoub, te venn i natsyona, hoy leske hi.

Pale-čiddo rhapen

³ Tou rhas či, hoy glan o baro Debleskre yaka pale-čiddo hi.

⁴ Kalla hi i firhe, hoy nay rhan: Grumya, bakre, bouzya,

⁵ tserfe oun vesheskre bouzya, divye bakre oun bouzya, antilope,

⁶ oun hako firho, koles pre-phagede pire hi, tseles pre-phagedo hounte venn le, oun hoy o rhapen douy kope rhal. Kolen nay rhan.

⁷ Mank kolende, kay o rhapen douy kope rhan, hi save, hoy hounte rhan t'mer gar: I khamela oun o shoshoy, oun o bergetikro shoshoy. Kolen hi kek pre-phagede pire. Pale-čiddo venn le t'menge.

⁸ Oun o bales hounte rhan gar, ninna te hi les pre phagede pire. O balo rhal o rhapen gar douy kope. Pale-čiddo vell lo t'menge. O mass kek kal firhendar hounte rhan. Vitar gar taprenn len an, te hi le moulo.

⁹ Kalla hi i firhe, hoy nay rhan t'mer kolendar, kay an o pani djivenn: Halauter, hoy len flosse oun shouppe hi, nay rhan.

¹⁰ Halauter, hoy len kek flosse oun kek shouppe hi, ma rhan! Pale-čiddo venn le t'menge!

¹¹ Hi čirkle koy, kay nay rhan t'mer, oun vavar kay nay rhan gar. Kolla venn t'menge pale-čiddo.

¹² Kalla hi i čirkle, hoy t'mer nay rhan gar: i adlarya, kay rhan tikne bakre, karhya oun mače,

¹³ vavar massengre čirkle,

¹⁴ hake korake;

¹⁵ ninna i straussetikre karhya oun i moulengre čirkle, panyeskre meve oun o habichto oun hake čirkle dran leskri familja;

¹⁶ oun o tikno ratsyakro čirklo, o panyeskro čirklo, hoy kharell cormorano, oun o baro ratsyakro čirklo;

¹⁷ vavar ratsyakre čirkle oun i moulo-massengre čirkle;

¹⁸ oun o storko oun hake mačengre čirkle; oun o vesheskro bashno oun i čirklengre kermuse.

¹⁹ Oun i tsele tikne firhe, hoy pral i phoub djan, hoy len čirklengre moussya hi, venn t'menge pale-čiddo. T'mer rhan len gar!

²⁰ I tsele čirkle, hoy gar pale-čiddo hi, nay rhan t'mer.

²¹ T'mer hounte rhan kek mass i firhestar, hoy moules trouyel čiddo hi. I vi-themares, kay djivell an t'maro foro, koles nay denn les, te rhal yob les. Ninna nay bikrenn les ap yekeste dran o vi-them. T'mer han menshe, kay hi o baro Debleske koy, kay t'maro Devel hi. Tou keress gar i bouzyakro ternepen an o thoud leskri datar.

De o deshto kotar o Debleske!

²² Hako bersh čivess tou o baro Debleske ap i rig o deshto kotar halauterestar, hoy ap tiri harhetikri phoub bares vas.

²³ An ko deshto kotar tiro djobestar, tiri molyatar oun tiro djetestar glan tiro baro Debleste ap koy platsa, hoy yob peske vin rodella, te vell lo kote an-mangedo. An leske ninna kol groumya, bakre oun bouzya, kay hi o phoureder lengre dayendar. Rha kote ko rhapen oun ko mass kal firhendar. Yaake bistreh gar, te djivess tiro baro Debleha tiro tselo djipen.

²⁴ Te čivell tiro baro Devel peskri barht ap toute, oun tout vell boud rhapen, oun koy platsa, hoy yob peske vin rodas, te vell yob kote an-mangedo, hi yaake dour krik toutar, te nay hidjreh gar ko deshto kotar kote,

²⁵ palle bike kova lauter, oun le kol love oun dja pash koy platsa, hoy tiro baro Devel peske vin rodas,

²⁶ oun gin touke halauter, hoy tiro dji kamell: groumya, bakre, mool oun vavar zorelo pipen, oder vavar koova, hoy tiro dji kamell, oun rha kote glan tiro baro Debleste! Oun ab barhtelo, tou oun tiri familya oun tire boudepangre,

²⁷ ninna i Levitarya, kay an tiro foro djivenn; kolen dess tou ninna tiro rhapastar. Yon lan o baro Deblestar kek them oun kek phoub, har tou lal.

²⁸ Hako triinto bersh less o tselo deshto kotar halauterestar, hoy tou dren anal an ko bersh, oun čivess les an tiro foro.

²⁹ Palle nay venn i Levitarya, kolen kek phoub hi, kay an tiro foro djivenn, ninna i vi-themarya, i čave, kolen kek dad bouder hi, oun i djouvya, kolengro rom meras, oun yon te rhan oun venn čales. Te krenn t'mer yaake, čivell t'maro baro Devel peskri barht ap halauter, hoy krenna.