5. Mose 13 - O Debleskro Lab 2024 (Sinte-Manouche)

I phagi kolenge, kay anenn i vavaren o baro Debleskro dromestar tele

¹ Lauter, hoy t'menge penom, hounte krenn oun rikrenn. Čivenn koleske či pashel, oun lenn či lestar krik!

² Te stell mashkral t'mende i rakepaskro pre, kay penell, te hi les i lab o Deblestar, oder i vavar, koles sounya hi, oun yob penell i debleskro sikepen oder i baro koova glan-vi,

^3-4 oun penell ninna: “Mer djas vavar deblen palla, hoy t'mer gar prindjrenn, oun mangas len an”, palle shounenn gar ap saveste, ninna te vell kova čačo, hoy yob penas. T'maro baro Devel kamell te dikell, te kamenn les t'mare tsele djiyentsa oun t'mari tseli zoryah.

⁵ Leske djan palla! Rikrenn les t'menge glan i yaka pash halauter, hoy krenn! Lauter, hoy yob penas, krenn! Shounenn ap leste! Mangenn les an! Oun rikrenn t'men ap leste!

⁶ Oun ko rakepaskro, ninna kova, koles kol sounya hi, yob hounte vell maredo. Yob kamas t'men t'maro baro Deblestar krik te anell, kolestar, kay anas t'men vin dran o them Egiptia oun las t'men vin dran o pandepen. Ko mensho kamas te djan t'mer tele o dromestar, hoy t'maro baro Devel penas, te hounte djan ap leste. Oun t'mer hounte vitsrenn vin o čilačepen, hoy mashkral t'mende hi.

⁷ Nay vell, te rakrell yek čorrhanes ap toute: Mer djas oun mangas vavar deblen an, kolen gar prindjreh, vitar gar tire phoure prindjran! Kova nay hi tiro phraal, tiro čavo oder tiri čay, tiri romni oder tiro maal, koles o djiyestar kameh.

⁸ Nay vell, te penell lo: Mange kol debles an kol menshendar, kay hi troul toute, oder ko debles kol menshendar, kay hi dour toutar. Kay le ninna hi ap i tseli phoub,

⁹ ma kre, hoy yob toutar kamell, oun shoun gar ap leste! Yob te khaytell tout gar! Tout vell kek dji leske! Ma khate leskri doosh!

¹⁰ Na-a, tou dess les moulo. Tou vess o ersto, kay lell i bar an peskro vast, te vitsress ap leste, oun pal toute i tsele vavar.

¹¹ Yob kamas tout krik te anell tiro baro Deblestar, kolestar, kay tout vin anas dran o pandepen an o them Egiptia. Doleske hounte vell yob moules vitsedo i barrentsa.

¹² Palle shounenn kova i tsele Israelitarya oun darenn. Oun kek bouder krell sau čilačo koova mashkral t'mende.

¹³ Te shounenn i forestar, hoy t'maro baro Devel t'men das, te djivenn koy dren,

¹⁴ te hi kote či-molde, kay anan vavaren o čačo dromestar tele oun penan: Avenn, mer djas oun mangas vavar deblen an, kolen t'mer gar prindjrenn,

¹⁵ palle rodenn mishto, oun poučenn palla, oun dikenn pal, te hi čačo. Te kran le kova, oun savo djoungelo koova vas mashkral t'mende kerdo,

¹⁶ palle denn kol menshen an ko foro o rhareha moulo. Lauter hounte venn moulo dino, ninna lengre firhe.

¹⁷ Oun lengro tselo bravlepen anenn khetne mashkral ap o foreskri platsa! Oun rhačrenn ko tselo foro pre oun lauter, hoy an leste hi, t'maro baro Debleske! Či har barra hounte ačell pral ko forestar hako tsireske. Oun an kek tsiro vell lo bouder neves kerdo.

¹⁸ Oun rikrenn t'menge či kolestar, hoy hounte kran paash! Palle lell o baro Devel peskri bari rholi t'mendar krik, oun vell t'menge lačo, oun krell t'menge pale peskro dji pre, te krell lo t'mendar boud oun boudeder menshe, yaake har lo pes glan t'mare phourende sovel das.

¹⁹ Shounenn ap leskro rakepen oun rikrenn leskre tsele laba, hoy t'menge kava dives penau! Oun krenn, hoy glan i yaka t'maro baro Deblestar mishto hi!