5. Mose 12 - O Debleskro Lab 2024 (Sinte-Manouche)

O Devel rodell peske yek platsa vin, kay kamell lo, te vell lo an-mangedo

¹ Kanna penau t'menge, hoy o Devel t'mendar kamella oun leskre čačepaskre laba, hoy hounte rikrenn an ko them, hoy dell t'men o baro Devel, kay ninna o Devel t'mare phourendar his, te lenn les t'menge dren. Denn yak ap kal laba, oun rikrenn t'men ap lende yaake rah har djivenn.

² Te vas ko tsiro, kay lan t'mer ko them dren oun tradan kol vavar menshen vin, palle denn kol tsele platse paash, kay yon pengre deblen an-mangan, ap i bare oun tikne berge, ninna tel bare zenele rouka.

³ Vitsrenn kol pre-čidde barra trouyel, kay maran le oun rhačran le firhen pengro debleske. Phagenn kol bare barra paash, hoy le leske pre-čivan! Oun rhačrenn kol kashta, hoy sikrenn i debletsa Ashera. Oun denn lengre figuren an kotya! Či te ačell lendar pral.

⁴ Ma mangenn t'maro baro Debles yaake an, har kol vavar menshe lengre deblen an-mangenn.

⁵ Mangenn o baro Debles ap i platsa an, hoy yob peske vin rodell mashkral an o them Israel, te djivell lo kote. Kote djan, te mangenn les an.

⁶ Oun kote anenn kol firhen, hoy kamenn leske te marell, save, hoy venn leske tseles rhačedo, oun save, kolengro rat leske rhačedo vell. Kote anenn ninna o deshto kotar kolestar, hoy t'menge dren anan, oun ko vavar koova, hoy glan činlo hi, oun kova hoy denna yaake, har t'men sovel dan, ninna kova, hoy hakeno pestar della, oun save bakre oun gourma, kay i phoureder lengre dayendar hi.

⁷ Oun t'mer oun t'mare familye rhan i rhapen kote glan t'maro baro Debleste, oun avenn barhtelo pral halauter, hoy t'menge khetne anan, ap koleste t'maro baro Devel peskri barht čivas.

⁸ Ma krenn yaake, har mer kava dives kate krah, kay hakeno krell, har an leskre yaka mishto hi.

⁹ Kanna van gomme gar khere an ko them, hoy t'men t'maro baro Devel dell, te vell les t'maro.

¹⁰ Te djan vergel o pani Yordan oun djivenn an ko them, hoy t'maro baro Devel t'men dell te venn kote khere, nay krell kek t'men kote čilačepen, oun kek rodell kourepen t'mentsa.

¹¹ Palle hi vavarčandes har kanna: Palle anenn kova, hoy denn o baro Debleste, ap koy platsa, hoy yob peske vin rodas, te vell lo kote an-mangedo. Kote anenn lauter, hoy me t'menge penau: kol firhen, hoy kamenn leske te marell, save, hoy venn leske tseles rhačedo oun save, hoy rhan khetne. Kote anenn ninna o deshto kotar kolestar, hoy dren anan, oun ko vavar koova, hoy glan činlo hi, oun kova hoy denna yaake har t'men sovel dan.

¹² Kote glan t'maro baro Debleste avenn barhteles, t'mer oun t'mare čave oun ča oun t'mare boudepangre, morsha oun djouvya, ninna i Levitarya, kay djivenn an t'mare forya, kolen kek them mank t'mende hi.

¹³ Denn t'men yak, te anenn gar kol firhen, hoy t'mer o Debleske rhačrenn, ap i vavar platsa, hoy hatsenn an o them!

¹⁴ Kokres ap koy platsa, hoy o baro Devel vin rodell an t'maro them, kote anenn kol firhen, hoy kamenn leske te rhačrell, oun kote krenn halauter, hoy me t'menge penau.

¹⁵ An t'mare gaba oun forya nay marenn yaake boud t'mare firhendar har kamenn, oun har t'maro baro Devel t'mende das, oun nay rhan lengro mass. T'mer halauter nay rhan kolestar, erlige menshe har pale-čidde. Kova hi yaake, har rhans i vesheskri bouzni oder i tserfo.

¹⁶ Kokres o rat ma rhan! Koles čorenn ap i phoub har pani.

¹⁷ Kolestar, hoy o baro Debleske hi, ma rhan: ko deshto t'maro djobestar, molyatar oun djetestar, vitar gar kol groumya oun bakre, hoy i phoureder lengre dayendar hi, vitar gar kova koleske t'men sovel dan, oun kova hoy kamenn t'mendar kokres te dell, oun ko vavar koova, hoy glan činlo hi.

¹⁸ Kova vell anlo glan t'maro baro Debleste ap koy platsa, hoy yob peske vin rodell. Kote rhan t'mer les, t'mer oun t'mare čave oun ča, oun t'mare boudepangre, morsha har djouvya, oun i Levitarya, kay pash t'mende djivenn. Avenn barhtelo glan t'maro Debleste pral halauter, hoy t'mare vastentsa khetne lan.

¹⁹ Ma bistrenn i Levitaryen oun denn lende, hoy len hounte vell, yaake rah har an t'maro them djivenn.

²⁰ Te dell t'maro baro Devel – yaake har lo rakras – t'mende boudeder them, oun t'men hi bok ap mass, palle rhan mass an t'mare gaba oun forya, yaake boud har kamenn!

²¹ T'mer hounte djan doleske gar ap koy platsa, hoy t'maro baro Devel vin rodell, te vell lo kote an-mangedo. Lauter, kay djivenn dour koy platsa, nay marenn oun rhan lengre groumyendar, bakrendar oun bouzyendar, hoy o baro Devel len das, yaake boud har yon kamenn – kote an lengre forya, kay le djivenn. Yaake penau les t'menge.

²² Krenn yaake har te rhans i vesheskri bouzni oder i tserfo. Ko mensho, kay erligo hi, ninna kova, kay pale-čiddo hi, kol douy nay rhan ko massestar.

²³ Kokres yek koova rikrenn dren! Ma rhan o mass, kay hi gomme o rat dren! An o rat hi o djipen. Oun t'mer hounte rhan gar o djipen khetne o masseha.

²⁴ Čore o rat vin ap i phoub har pani.

²⁵ Te krenn yaake, hi kova mishto glan o baro Debleskre yaka, oun t'menge oun t'mare čavenge pal t'mende djal mishto.

²⁶ Ko vavar koova, hoy glan činlo hi, hoy hounte denn o Debleste, ninna koleske sovel dan, te denn les leste, kova anenn ap koy platsa, hoy o baro Devel peske vin rodell.

²⁷ Kote rhačrenn leske kol firhen, hoy venn tseles rhačedo, lengro mass oun rat. Kol vavarendar, hoy t'mer rhan, čore o rat ap o baro Debleskri rhačepaskri vin.

²⁸ Denn yak, te rikrenn mishto lauter dren, hoy penom t'menge. Te djivenn yaake, hi kova mishto oun lačo glan t'maro baro Debleskre yaka. Oun t'menge oun t'mare čavenge pal t'mende djal mishto hako tsireske.

Ma mangenn rhorhene deblen an!

²⁹ T'maro baro Devel tradell i vavar menshen glan t'mende vin dran o them, kay t'mer venna. Oun t'mer lenn lengro them t'menge dren oun djivenn kote.

³⁰ Ap ko tsiro, kay yon bouder gar koy hi, denn t'men yak, te moukenn t'men gar ap lengre dromma te anell! Ma poučenn: Har mangan kolla pengre deblen an? Yaake kamah mer les ninna te krell.

³¹ Ma krenn sau kova t'maro baro Debleha! Kova lauter, hoy yon pengre deblenge kran, hi djoungelo oun čilačo glan o baro Debleskre yaka. Ninna pengre morsh čaven oun pengre čen rhačran le lenge an i yag.