5. Mose 11 - O Debleskro Lab 2024 (Sinte-Manouche)

Ko baro koova, hoy o baro Devel i Israelenge kras

¹ O Mose penas doureder ap i Israelitaryen: T'mer hounte kamenn t'maro baro Debles o tselo djiyestar! Krenn lauter, hoy lo t'mendar kamell. Rikrenn t'men ap leskre čačepaskre laba, oun djivenn pal leskre laba yaake rah har djivenn.

² Oun lenn kava dives an o dji, hoy sikras o baro Devel t'mende, oun gar t'mare čavende. Kolla djinenn kova gar. Yon dikan les gar. T'mer han, kay dikan leskro raylepen oun hoy lo t'menge kras peskri zorelo vasteha oun pre-hadedi moussyah.

³ Savo baro koova, hoy kek vavar nay krella, kras yob ap i Egiptaryen, ap o Faraeste, ko rayeste pral o them Egiptia, oun ap leskro tselo them,

⁴ ninna ap leskre lourdende, kay t'menge palla lan. Pral lengre graya oun vourdya moukas yob o pani khetne te phagell. Oun yon lauter tassan an o Baro Lolo Pani. Yaake hi kova bis kava dives.

⁵ T'mer djinenn, hoy lo an o moulo tato them t'menge kras, bis te van kate ap kay platsa,

⁶ oun hoy lo kras ap o Datan oun ap o Abiram, kolengro dad o Eliab his dran o kheer Ruben: Har i phoub peskro mouy pre kras oun len mashkral i tsele menshende Israel pre rhas, len oun lengre tsele menshen oun lengre plarhtene khera, ninna lengre boudepangre oun firhe, hoy pash lende his.

⁷ T'mer dikan t'mare yakentsa ko tselo baro kova, hoy o baro Devel kras.

Ko lačepen, hoy lenn t'mer an t'maro them

⁸ Doleske rikrenn t'men ap i tsele laba, hoy t'menge kava dives penau. Palle han zoreles doha, te lenn ko them t'menge dren, an koleste kanna djan.

⁹ Oun t'mer djivenn i rah tsiro an ko lačo oun bravelo them, hoy o baro Devel pes glan t'mare phourende sovel das, te dell lo les lende oun lengre čavende pal lende.

¹⁰ Kava them an kova t'mer venna, te lenn les t'menge dren, hi gar har ko them Egiptia, dran koleste t'mer vin djan. Kote hounte boudran phares te anenn o pani ap t'mari harhetikri phoub.

¹¹ Kava them, kay kanna djan, hi i them, kay dell brishin, hoy perell dran o bolepen ap i berge oun ap o telstouno them,

¹² hi i them, ap koleste t'maro baro Devel yak dell. Leskre yaka dikenn o tselo bersh lačes ap leste.

¹³ Yaake shounenn ap kol laba, hoy t'menge kava dives penau, te kamenn t'maro baro Debles o tselo djiyestar oun venn leske koy t'mari tseli zoryah.

¹⁴ Palle dell yob o brishin ap t'maro them an peskro tsiro, an o niyal oun an o vend, te nay anenn t'maro djob dren, ninna t'mari mool oun djet.

¹⁵ Oun me moukau o zenlepen ap tiri phoub pre te djal tire firhenge. T'men hi hako tsiro doha te rhal.

¹⁶ Denn t'men yak, te moukenn t'men gar krik te anell o baro Debleskro dromestar, oun perenn lestar tele oun mangenn vavar deblen an, oun vitsrenn t'men glan lende tele.

¹⁷ Te krenn savo koova, nashte vell i rholi o baro Deblestar pral t'mende, oun yob pandell o bolepen tele, te dell bouder gar brishin, oun i phoub nay moukell či pre te djal. Palle merenn t'mer sik vin an kava lačo them, hoy o baro Devel t'men das.

¹⁸ Ma bistrenn kal laba! Čivenn len ap t'mare djia, oun pandenn len troul t'mare moussya oun troul t'maro shero, te bistrenn len gar!

¹⁹ Oun penenn len t'mare čavenge. Rakrenn kol labendar, te han khere, oun ninna te djan ap o drom, te čivenn t'men tele, oun ninna te stenn pre.

²⁰ Oun činenn len ap i pesse kashta čačes oun serves pash t'maro khereskro voudar oun ap i foreskre voudya.

²¹ Palle ačenn t'mer an kava them, kolestar t'maro baro Devel glan t'mare phourende pes sovel das, te dell lo les t'mende, oun djivenn kote yaake rah har o bolepen pral i phoub hi.

²² Te krenn t'mer kova lauter, hoy me penom, te hounte krenn, oun kamenn t'maro baro Debles t'maro tselo djiyestar, oun djan ap leskre tsele dromma, oun rikrenn t'men ap leste,

²³ palle tradell o baro Devel i menshen dran kal tsele themma glan t'mende vin. Oun t'mer lenn i themma save menshendar t'menge dren, kay hi boudeder oun zorleder har t'mer.

²⁴ Hako kotar phoub ap koleste t'mare pire stakrenn, hi t'menge, o tselo them mank o moulo tato them oun i berge Libanon, oun mank o lengsto pani Eufrat oun o Mashkralstouno Baro Pani.

²⁵ Kek nay ačell glan t'mende tardo, Traash oun daar moukell t'maro baro Devel ap i menshende an o tselo them te vell glan t'mende, yaake har yob les t'menge penas.

²⁶ Kava dives moukau t'men vin rodell: Kamenn t'mer o Debleskri barht? Kamenn t'mer i bibarht o Deblestar?

²⁷ I barht vell ap t'mende, te shounenn ap i laba t'maro baro Deblestar, kol laba, hoy me t'menge kava dives penau.

²⁸ I bibarht vell ap t'mende, te shounenn t'mer gar ap i laba t'maro baro Deblestar, oun djan leskro dromestar tele, oun djan vavar deblenge palla, kolen t'mer gar prindjrenn.

²⁹ Te anell t'men t'maro baro Devel an ko them, an koleste t'mer venn, te lenn les t'menge dren, palle denn koy barht vin gole ap i berga Garizim, oun i bibarht ap i berga Ebal.

³⁰ Kolla hi kol douy berge ap i vavar rig o panyestar Yordan pash ko drom, hoy djal kote, kay o kham tele djal, an o telstouno them, kay o Yordan nashell oun kay i Kanaanitarya djivenn. Kol berge hi gar dour kol bare roukendar pash Gilgal.

³¹ T'mer djan čačepah pral o Yordan, oun venn an ko them dren, te lenn les t'menge dren. Kava them das t'men t'maro baro Devel, te lenn les t'menge dren oun djivenn koy.

³² Yaake denn yak ap halauter, hoy o baro Devel t'mendar kamell, oun ap leskre tsele čačepaskre laba, hoy me t'menge kava dives penau. Oun djivenn koy pal!