5. Mose 10 - O Debleskro Lab 2024 (Sinte-Manouche)

O Mose lell neve barra o Debleskre deesh labentsa

¹ An ko tsiro penas o baro Devel ap mande: “De douy barra vin, har kol douy glanstoune, oun ab pre pash mande ap i berga, oun kre i kashteno morhton.

² Oun me činau ap kol barra kol laba hoy ap kol glanstoune dren činlo his, kolen tou paash phagal. Oun tou čivess kol barra an kava morhton!”

³ Oun me krom i morhton dran akatstikro kasht, oun dom douy barra vin, hoy yaake har kol glanstoune his, oun djom pre ap i berga. Oun kol douy barra his an mire vasta.

⁴ Oun har o glanstouno kopo činas yob kol deesh laba, kolen o baro Devel ap i berga dran i yag vin ap t'mende penas, har t'mer halauter koy khetne van. Oun o baro Devel das kol barra mande.

⁵ Oun me rissrom man oun djom i berga pale tele. Oun me čivom kol barra an ko morhton, hoy me krom. Oun kote hi le, yaake har o baro Devel mange penas.

O Aron merell

⁶ Oun i Israelitarya moukan Beeroth-Bene-Yaakan pal pende oun djan doureder an Mosera. Kote meras o Aron oun vas paskedo. Oun leskro čavo, o Elazar vas rashay pal leste.

⁷ Foun kotar djan le doureder an Goudgoda oun kotar doureder bis pash Yotbata. Kote das boud pani.

I boudi, hoy i Levitarya hounte krenn

⁸ Ko tsireske rodas peske o baro Devel kol morshen dran o kheer Levi vin, te hidjrenn yon o morhton, kay o Debleskre deesh laba dren hi, oun te venn yon rashaya oun boudrenn leske, oun rakrenn an leskro lab barht vin pral i menshende. Oun kova krenn le ninna kava dives.

⁹ Doleske vell i Levitaryen kek them har lengre phralen. Kova hoy yon lenna, vell dran lengri boudi o baro Debleske. Kova penas lenge t'maro baro Devel.

O baro Devel shounell o Moseskro mangepen

¹⁰ Me ačom ap i berga star-deesh divessa oun star-deesh ratsya har ko ersto kopo. Oun o baro Devel shounas ninna kava kopo miro mangepen oun das t'men gar moulo.

¹¹ Oun o baro Devel penas ap mande: “Ste pre! Oun dja glan i menshende vin, te venn le an ko them oun lenn les penge dren, ko them, kolestar man glan lengre phourende sovel dom, te dap les lende.”

Kova hi, hoy o Devel t'mendar kamella

¹² Oun kanna Israel, shoun, hoy t'maro baro Devel kamell, te kress! Tou mangess les an, djas ap leskro drom an halauter hoy tou kreh. Tou kamess les o tselo djiyestar, oun vess leske koy tiri tseli zoryah.

¹³ Djib pal leskro lab, oun rike leskre čačepaskre laba, hoy touke kava dives penau. Palle djal touke mishto.

¹⁴ O baro Debleske hi o bolepen, lauter hoy an o pralstunepen hi. Oun ninna i phoub oun lauter hoy dren hi, hi leskro.

¹⁵ T'mare phouren kamas lo o djiyestar. Oun t'mer, kay lendar van, rodas lo peske vin mank i menshende dran an i tsele vavar themma. Oun ninna kava dives han t'mer leskre vi-rodede menshe.

¹⁶ Doleske shounenn kanna ap o baro Debleste, oun djan gar bouder pal t'maro shero!

¹⁷ T'maro baro Devel hi o Devel pral hako devel oun o ray pral hako ray. Yob hi o baro oun o zorelo, kolestar halauter darenn. Yob dikell gar koy pre, koon yek hi. Oun yob lell či an, hoy kamell yek les te dell, te rissrell lo o čačepen trouyel.

¹⁸ Yob dikell koy pre, te lenn pengro čačepen kol čave, kolen kek dad bouder hi, ninna kol djouvya, kolengro rom meras. Oun i vi-themaryen kamell yob o djiyeha oun dell len rhapen oun koola an-ripaske.

¹⁹ T'mer hans ninna vi-themarya an o them Egiptia. Doleske hounte kamenn t'mer i vi-themaryen ninna o tselo djiyestar.

²⁰ Oun hounte shounenn ap t'maro baro Debleste oun mangenn les kokres an. Rikrenn t'men ap leste kokres. Te denn t'men sovel, denn t'maro sovel pash leskro lab.

²¹ Yob hi kova, koleske sharenn t'men i vavar menshe. Yob hi t'maro Devel, kay kras savo baro oun zorelo koova pash t'mende. Kova dikan t'mer t'mare yakentsa.

²² 70 (efta-deesh) menshe his t'mare phoure, har le an o them Egiptia tele djan. Oun kanna kras t'maro baro Devel t'mendar yaake boud har i bolepangre momlia.