4. Mose 9 - O Debleskro Lab 2024 (Sinte-Manouche)

O baro dives, hoy kharella Passa

¹ Oun o baro Devel rakras o Moseha an o moulo tato them Sinay, an o douyto bersh, har yon dran o them Egiptia vin djan, an o ersto čon, oun penas:

² “I Israelitarya hounte rikrenn o baro dives, hoy kharella Passa ap o čačo tsiro:

³ Ap o deesh-te-starto dives, an kay čon, ap i rati, ap i čačo tsiro hounte rhan le ko rhapen Passa yaake har t'menge penom, oun hounte krenn pal mire tsele laba.”

⁴ Oun o Mose penas lenge kal laba.

⁵ Oun yon kran ko rhapen, hoy kharella Passa, ap o deesh-te-starto dives, an ko ersto čon, ap i rati, an o moulo tato them Sinay. Yaake har o baro Devel o Moseske penas, yaake kran i Israelitarya.

⁶ Koy his morsha, kay tapran i moules an, oun van pale-čiddo. Kolla nay van gar glan o Debleste ap ko dives, te rhan le ko Passa. Yon van glan o Moseste oun glan o Aroneste,

⁷ oun penan ap lende: “Mer tapram i moules an oun vam pale-čiddo. Hounte rikras men pale oun nay vah gar glan o baro Debleste, te anas leske i bakro khetne i vavar Israelitarya?”

⁸ Oun o Mose penas ap lende: “Ačenn kate. Me kamau te shounell, hoy o baro Devel t'menge penell.”

⁹ Oun o baro Devel rakras o Moseha oun penas:

¹⁰ Pen ap i Israelitarya: Te vas yek t'mendar, ninna t'mare čavendar, pale-čiddo ap i mouleste, nay rhal lo ko rhapen gar ap kava dives. Kova hi ninna yaake kolenge, kay hi ap o drom.

¹¹ Yon hounte rhan ko rhapen an o douyto čon ap o deesh-te-starto dives, ap i rati, oun hounte rhan koy pashel ko maro, kay kek shoutlo yarro dren hi, ninna shoutlo zenlepen.

¹² Oun yon hounte moukenn či čiddo pral i rat. Vitar kek kokalo hounte vell phagedo. Oun halauter hounte vell yaake kerdo har pash o Passa, hoy rhan le ap o čačo tsiro.

¹³ Koon gar pale-čiddo hi oun gar ap o drom hi, kova hounte rikrell o Passa ap o čačo dives. Te krell lo kova gar, hounte vell lo infam oun ačell bouder gar pash peskre menshende. Koy phagi lell lo doleske, kay vas lo gar ap o čačo tsiro glan o baro Debleste, te anell lo leske i bakro. Leskri doosh ačell ap leste.

¹⁴ Oun te hi yek mank t'mende, kay gar t'mendar hi, oun kova kamell ninna o baro Debleske o dives Passa te rikrell, yaake nay krell yob kova yaake, har t'menge penom, pal mire tsele laba. Kol laba hi leske har t'menge.

I folka pral o Debleskro kheer sikrell, kay hi yob pash lende

¹⁵ Oun ap ko dives, kay vas o Debleskro kheer pre-čiddo, ko kheer, kay o Debleskre deesh laba dren hi, vas i folka tele pral o kheer. Oun an i rati his i yag an late.

¹⁶ Yaake his kova o tselo tsiro: ap o dives his koy folka pral ko kheer tardo. Oun ap i rati dikas li vin har i yag.

¹⁷ Hako kopo, kay hadas pes koy folka, djan i Israelitarya doureder. Oun kote, kay koy folka tardo ačas, koy ačan i Israelitarya ninna tardo.

¹⁸ O baro Devel te penas Djan!, palle djan yon. Oun o baro Devel te penas, te ačenn yon, palle ačan yon oun čivan pengre plarhtene khera pre. Yaake rah, har koy folka pral o kheer tardo ačas, yaake rah ačan yon.

¹⁹ Oun ninna te ačas koy folka boud divessa pral o kheer tardo, shounan i Israelitarya ap o baro Debleste, oun djan gar doureder.

²⁰ Oun te ačas koy folka i tikno tsiro oun gar boud divessa pral o kheer tardo, ačan le i tikno tsiro koy, oun palle djan le doureder, hako kopo yaake har o baro Devel penas.

²¹ Te his koy folka yek rat koy, oun palle hadas li pes, djan yon doureder. Oun ap ko tsiro, kay hadas pes koy folka, nay vell ap o dives, nay vell ap i rati, palle djan yon ninna doureder.

²² Te ačas koy folka douy divessa, yek čon, ninna boudeder tsiro pral o kheer tardo, yaake ačan i Israelitarya, oun djan gar doureder. Oun te hadas pes koy folka, djan yon doureder.

²³ Oun te penas o baro Devel, te ačenn yon, čivan yon pengre plarhtene khera pre, oun te penas yob, te djan yon, yaake djan yon. Oun yaake shounan yon ap o baro Debleste oun kran halauter yaake, har yob ap o Moseste penas.