4. Mose 7 - O Debleskro Lab 2024 (Sinte-Manouche)

I pralstoune pral i Israelitarya anenn kouč koova o Debleskro khereske

¹ Oun har o Mose o Debleskro plarhteno kheer pre čivas, makas lo les o djeteha o Debleske. Ninna ko tselo koova, hoy koy dren hi, ninna o Debleskri rhačepaskri oun halauter, hoy pashel hi, makas yob o djeteha o Debleske.

² Koy van kol pralstoune pral i Israelitarya oun anan kouč koova o Debleske. Hakeno his o pralstouno pral yek kol deesh-te-douy bare familyendar, kay van kol deesh-te-douy Yakobeskre čavendar. Oun yon his kolla, kay činan i laba kolendar pre, kay an lengre familye hi.

³ Oun yon anan ko kouč koova glan o baro Debleste: shob zorele vourdya oun deesh-te-douy groumya. Douy pralstoune khetne anan yek vourdin, oun hakeno lendar anas yek groumni. Oun yon anan len glan o Debleskro kheer.

⁴ Oun o baro Devel rakras o Moseha oun penas:

⁵ “Le kova lendar oun de les kol Levitaryen, te nay krenn yon pengri boudi ap o Debleskro kheer oun nay hidjrenn pengre kotya!”

⁶ Koy las o Mose kol vourdya oun groumya oun das kova kol Levitaryen.

⁷ Douy vourdya oun star groumya das yob kolen, kay van pal o Gershon, te nay hidjrenn le pengre kotya.

⁸ Oun star vourdya oun orhta groumya das yob kolen, kay van pal o Merari, te nay hidjrenn yon pengre kotya. Oun o Itamar, ko čavo o rashayestar Aron, das garda ap halauter.

⁹ Kolen, kay van pal o Kohat, das yob či. Lengri boudi his, te hidjrenn le o Debleskro koova, hoy an leskro kheer his. Kova hounte hidjrenn le ap pengre phika.

¹⁰ Oun kol pralstoune dan kouč koova o Debleske oun anan kova glan o Debleskri rhačepaskri ap ko dives, kay vas koy rhačepaskri o djeteha dre-maklo.

¹¹ Oun o baro Devel penas ap o Moseste: “Mouk hako dives yekes kol pralstunendar te vell, te anell yob peskro koova. Kova te djal yaake deesh-te-douy divessa, te vell koy rhačepaskri mange koy.”

^12-83 Oun yaake anan le pengro koova: Ap o ersto dives vas o Nashon, – leskro dad hi o Amminadab – dran o kheer Youda. Ap o douyto dives vas o Netanel, – leskro dad hi o Souar – dran o kheer Issakar. Ap o triinto dives vas o Eliab, – leskro dad hi o Helon – dran o kheer Zabulon. Ap o starto dives vas o Elizour, – leskro dad hi o Shedehour – dran o kheer Ruben. Ap o pančto dives vas o Sheloumiel, – leskro dad hi o Sourishadday – dran o kheer Simeon. Ap o shobto dives vas o Elyasaf, – leskro dad hi o Degouel – dran o kheer Gad. Ap o eftato dives vas o Elishama, – leskro dad hi o Ammihoud – dran o kheer Efrayim. Ap o orhtato dives vas o Gamaliel, – leskro dad hi o Pedazur – dran o kheer Manasse. Ap o enyato dives vas o Abidan, – leskro dad hi o Gidoni – dran o kheer Benyamin. Ap o deshto dives vas o Ahiyeser, – leskro dad hi o Ammishadday – dran o kheer Dan. Ap o deesh-te-yekto dives vas o Pagiel, – leskro dad hi o Okran – dran o kheer Asser. Ap o deesh-te-douyto dives vas o Ahira, – leskro dad hi o Enan – dran o kheer Naftali. Hakeno anas o emligo koova: Yek baro roupeno čaro, yek-te-paash kilogramme pharo, yek vavar tikneder roupeno čaro, orhta-sheel (800) gramme pharo. Yek grammi his yaake boud, har yek grammi an o Debleskro kheer his. Hake douy čare his pherdo yarro, kay djet dren hi. Ko rhapen dan le o Debleste, te vell kova leske rhačedo. Koy pashel anas hakeno yek tikno sonakaskro čaro, sheel-te-biish gramme pharo, pherdo soungepaskro koova, hoy o Debleske rhačedo vella; yek terno gouroum, yek morsh bakro, i vavar yek-bersheskro bakro rhačepaske o Debleske; yek morsh bouzni, hoy vell rhačedo, te vell i doosh krik lino. Ninna anas hakeno douy groumya, panč morsh bakre, panč morsh bouzya oun panč yek-bershengre bakre, te rhan le len khetne glan o Debleste.

⁸⁴ Lauter khetne his kova, hoy kol deesh-te-douy pralstoune pral o Israel o Debleske anan, ap ko tsiro, kay vas o Debleskri rhačepaskri o djeteha dre-maklo: deesh-te-douy bare roupene čare, deesh-te-douy tikneder roupene čare, deesh-te-douy tikne sonakangre čare.

⁸⁵ Hako baro roupeno čaro his yek-te-paash kilogramme pharo, oun hako tikneder roupeno čaro 800 (orhta-sheel) gramme pharo. Ko tselo roup his khetne 27.600 gramme (biish-te-efta kilogramme oun shob-sheel gramme) pharo. Yek grammi his yaake pharo har yek grammi an o Debleskro kheer pharo his.

⁸⁶ Hako tikno sonakaskro čaro his 120 (sheel-te-biish) gramme pharo. Khetne his kova 1.440 gramme (yek kilogramme oun star-sheel-te-star-desha gramme) sonakay. Yek grammi his yaake pharo har yek grammi an o Debleskro kheer pharo his. Kol sonakangre čare his pherdo soungepaskro koova, hoy rhačedo vella.

⁸⁷ I tsele firhe, kay anan le, te venn le tseles rhačedo o Debleske his khetne: deesh-te-douy terne gourma, deesh-te-douy morsh bakre, deesh-te-douy yek-bershengre bakre, oun ko rhapen, hoy vell pashel dino, ninna deesh-te-douy morsh bouzya, rhačepaske o Debleske, te vell i doosh krik lino.

⁸⁸ I tsele firhe, hoy dan le o Debleste, te rhan le len khetne glan leste, his khetne: biish-te-star terne gourma, shob-deesh morsh bakre, shob-deesh morsh bouzya, shob-deesh yek-bershengre bakre. Kova halauter vas o Debleske anlo, har vas o Debleskri rhačepaskri o djeteha dre-maklo.

⁸⁹ Oun har o Mose an o Debleskro kheer djas, te rakrell yob leha, koy shounas yob leskro rakepen, hoy vas kotar, kay o sonakaskro morhton hi, an leste o Debleskre deesh laba hi. Ko rakepen vas mashkral kol douy bolepangre vin, kay ap o pralstouno kotar hi, hoy ap ko morhton hi, oun hoy sikrella, kay o Devel peskre menshenge lačo hi. Oun yob rakras leha.