4. Mose 6 - O Debleskro Lab 2024 (Sinte-Manouche)

Har te djivell yek, kay das peskro djipen yek tsireske an o Debleskro vast

¹ Oun o baro Devel rakras o Moseha oun penas:

² Pen ap i Israelitarya: Te dell yek pes sovel, – nay vell i morsh, ninna i djouvel, – oun penell o baro Debleske, te vell lo leske i tsireske koy,

³ palle hounte piyell kova kek mool oun zoreli rhačedi, vitar kek vavar pipen, hoy dran drake kerdo vas. Yob hounte rhal vitar kek drake, kek, hoy pesso hi, vitar kek, hoy trouk hi.

⁴ Yaake rah har yob koy sovel das, hounte rhal yob či, hoy i drakengro roukestar vella, vitar kek drake, hoy yalo hi, vitar kek, hoy pral o tsiro ap o rouk hi.

⁵ Yaake rah har yob koy sovel das, hounte vell gar leskro bal činlo, bis te ko tsiro trouyel hi, kay das yob pes an o baro Debleskro vast. Yob hi o Debleskro, oun hounte moukell peskro bal ap o shero lengsto te vell.

⁶ An ko tselo tsiro, kay das yob pes an o baro Debleskro vast, hounte djal yob gar pash yekeste, kay meras.

⁷ Ninna te hi ko moulo leskro dad, leskri day, leskro phraal oun leskri pheen, hounte djal lo gar pash lende, te vell lo gar pale-čiddo an ko tsiro, kay hi lo peskro Debleske koy.

⁸ Ko tselo tsiro, kay das yob pes sovel, hi yob kokres o baro Debleske koy.

⁹ Te his yob pashel, har meras yek ap yek kopo, venn leskre balla pale-čiddo shob divessa. Ap o eftato dives hounte činell yob peskro bal ap o shero, oun yob vell pale erligo.

¹⁰ Oun ap o orhtato dives hounte lell yob douy divye taube oder douy vavar taube oun anell kolen pash o rashayeste pash o voudar glan o Debleskro plarhteno kheer.

¹¹ Oun o rashay hounte dell koy yek tauba o Debleste, te vell i doosh krik lino. Oun koy vavar hounte rhačrell yob o Debleske, te vell lo pale erligo oun koy doosh lestar krik lino, hoy yob ap peste anas, har tapras lo i moules an, oun vas doleske pale-čiddo. Palle moukell yob peskro bal pale lengsto te vell,

¹² te vell lo neves o baro Debleske koy ko tsireske, kay das lo pes sovel. Oun yob hounte lell i bakro, hoy yek bersh phouro hi, oun dell les o Debleste, te vell halauter pale mishto. Kol divessa glan te van leskre balla pale-čiddo, his čičeske.

¹³ Kova hi ko lab, hoy penell koleske, kay hi i tsireske o Debleske koy, hoy te krell lo: Te hi ko tsiro trouyel, kay das yob pes sovel, hounte vell lo pash o voudar glan o Debleskro plarhteno kheer anlo.

¹⁴ Oun yob hounte dell o baro Debles i bakro, yek bersh phouro oun sasto, te vell kova tseles rhačedo o Debleske. Ninna dell yob o Debles i bakri, yek bersh phouro oun sasto, te vell leskri doosh krik lino. Oun pale anell lo leske i vavar sasto morsh bakro, hoy rhan le khetne glan o Debleste.

¹⁵ Ninna anell lo i kashteni piri, kay merklia oun mare dren hi, kay kek shoutlo yarro dren hi: merklia dran lačo yarro oun djet, oun sane mare, kay djet pre maklo hi, ninna ko tselo rhapen dran yarro oun koy mool, hoy koy pashel hi, te vell lo dino o Debleske.

¹⁶ Oun o rashay hounte anell kova glan o baro Debleste. Palle marell lo ko yek bakro, te vell leskri doosh krik lino oun ko douyto, hoy o Debleske tseles rhačedo vella.

¹⁷ Palle dell lo o morsh bakro o baro Debleste, ninna koy kashteni piri, kay o maro dren hi, kay kek shoutlo yarro dren hi. Ko koova dell lo o Debleste, te rhan le les khetne glan leste. Pal kova anell lo ko vavar rhapen dran yarro, oun koy mool, te vell kova o Debleske dino.

¹⁸ Oun ko morsh, kay his i tsireske o Debleske koy, hounte činell o bal ap peskro shero, hoy moukas lo lengsto te vell o Debleske. Oun yob činell les pash o voudar glan o Debleskro plarhteno kheer, oun lell les oun vitsrell les ap i yag, kay rhačrenn kol thoulle kotya ko bakrestar, hoy rhan le khetne glan o Debleste.

¹⁹ Oun pal kova lell o rashay i kotar keredo mass o bakreskro phikestar, ninna i merkli oun i maro, kay kek shoutlo yarro dren hi, dran i kashteni piri oun čivell koleske, kay his i tsireske o Debleske koy, an leskre vasta.

²⁰ Palle lell o rashay kova an peskre vasta oun hadell les pre, te dell lo les o baro Debleste. Ko koova, khetne o beč oun i palstouni heri o bakrestar, hi o rashayeske. Koy pal nay piyell kova, kay i tsireske o Debleske koy his, pale mool.

²¹ Yaake hounte krell ko mensho, kay his i tsireske o Debleske koy, oun dell kava koova o baro Debleste, ninna ko vavar koova, hoy yob pes sovel das. Yaake har yob pes sovel das, yaake hounte krell yob ninna.

O Debleskri barht, hoy o rashay pral i menshende vin rakrell

²² Oun o baro Devel rakras o Moseha oun penas:

²³ “Pen ap o Aroneste oun ap leskre čavende: Yaake hounte penenn t'mer ap kol Israelitarya, te rakrenn miri barht pral lende vin:

²⁴ Mou dell tout o baro Devel barht oun zoor, oun dell garda ap toute!

²⁵ O baro Devel dikell lačes ap t'mende oun krell peskro dji t'menge pre!

²⁶ O baro Devel dikell kamles ap t'mende oun dell t'men shoukapen an o dji!

²⁷ T'mer te rakrenn yaake miro lab pral i Israelitarya vin, dau me len barht oun zoor.”