4. Mose 5 - O Debleskro Lab 2024 (Sinte-Manouche)

Hoy te krenn pash i djoungelo nasslepen

¹ Oun o baro Devel rakras o Moseha oun penas:

² Pen ap kol Israelitarya: “Bičrenn hakenes vin glan t'mari platsa, kay yaake nasselo ap peskro mass hi, te merell leskro mass tele! Bičrenn ninna halauteren vin, kay nashell doukepaskro pani dran lende vin, oun kolen, kay kran pen pale-čiddo ap kolende, kay moulo hi!

³ Morshen oun djouvyen hounte bičrenn vin glan koy platsa, kay t'mare plarhtene khera tardo hi, te krenn yon gar koy platsa pale-čiddo, kay me pash t'mende djivau.”

⁴ Oun kol Israelitarya kran kova yaake, oun bičran len vin glan i platsa, yaake har o baro Devel kova ap o Moseste penas.

Hoy te krell yek, kay kras čilačepen ap i vavareste

⁵ Oun o baro Devel rakras o Moseha oun penas:

⁶ Pen ap i Israelitarya: Hakeno, morsh har djouvel, kay krell čilačepen ap yekeste, oun yaake ninna ap o baro Debleste, kova anell i doosh ap peste.

⁷ Oun yob hounte penell o čilačo koova, hoy yob kras, oun krell kova pale mishto, oun dell ko pančto kotar koy pashel, ap koleste yob o čilačepen kras.

⁸ Kek te hi koy, koneste nay dell lo kova, palle dell lo les o baro Debleste o rashayeske. Ninna dell lo i divyo bakro, hoy o rashay marella, te vell leskri doosh krik lino oun halauter pale mishto.

⁹ Ninna ko vavar koova, hoy i Israelitarya o baro Debleste denn, hi i rashayenge.

¹⁰ Oun kova, hoy yek ap i rig čivella, te vell lo o Debleske, kova hi ninna o rashayeske. Oun hoy yek i rashayenge della, kova hi lenge.

Har o Devel sikrell, te rhorhras i romni peskro romes

¹¹ Oun o baro Devel rakras o Moseha oun penas:

^12-13 Pen kol Israelenge: Nay vell, te rhorhell i djouvel peskro romes i vavar morsheha, oun lakro rom djinell kova gar, oun kek dikas, te anas li i ladj ap peste oun tapras lat koy pashel,

¹⁴ oun lakro rom zilveras, oun poučell pestar: Kras li kova? – Kras li les gar?

¹⁵ Palle hounte anell ko morsh lat pash o rashayeste, oun anell o Debleske yek kilogrammi yarro. Oun yob hounte čorell kek djet pral pre, oun dell vitar kek soungepaskro koova koy pashel. Ko yarro dell lo o Debleste, te vell o čačepen vin, te djinenn le: rhorhras li les, – rhorhras li les gar.

¹⁶ Oun ko rashay hounte anell lat glan o baro Debleste,

¹⁷ oun čorell Debleskro pani an i piri, hoy hi kerdo dran pekli čik, oun lell phoubyakri čik dran o Debleskro kheer, oun čivell kova an o pani.

¹⁸ Oun yob hounte anell koy djouvyat glan o baro Debleste, oun krell lakre balla pre, oun čivell ko yarro an lakro vast, te vell diklo, rhorhras li peskro romes, rhorhras li les gar. Oun an peskro vast lell ko rashay ko djoungelo nasselo pani.

¹⁹ Oun yob dell koy djouvyat trad oun penell ap late: “Te his kek morsh pash toute čiddo oun rhorhral tiro romes gar i vavareha, te anal ladj ap toute, palle nay piyeh ko djoungelo nasselo pani, oun tou veh gar nasselo.

²⁰ Tou te rhorhral tiro romes i vavareha, oun anal ladj ap toute,

²¹ palle anell o baro Devel i bibarht ap toute, yaake te venn tire rigya tikneder oun tiro per pesseder. Palle penell yek, kay kamell i bibarht pral i vavareste te anell: Mou djal touke har kay djouvyake!” Kol labentsa hounte dell o rashay kol djouvyat trad, oun palle penell lo ap late:

²² “Yaake djal ko nasselo pani an tiro per, oun tiro per vell pesseder, oun tire rigya perenn khetne.” Oun koy djouvel hounte penella: “Amen, yaake te vell kova!”

²³ Palle hounte činell o rashay kol laba ap i patri, oun thovell len an ko djoungelo pani tele.

²⁴ Ko djoungelo nasselo pani hi kol djouvyake pipaske, te vell i nasslepen an late dren.

²⁵ Palle lell ko rashay ko yarro dran lakro vast, te hadell lo les pre glan o Debleste. Oun yaake sikrell lo: Kova hi o baro Debleske.

²⁶ Oun yob rhačrell yek vast pherdo yarro ap o Debleskri rhačepaskri, te sikrell lo, te hi o tselo yarro o baro Debleske. Oun pal kova dell lo koya djouvyat ko pani pipaske.

²⁷ Oun te rhorhras koy djouvyat peskro romes oun anas ladj ap peste, palle djal ko nasselo pani an late dren, oun yoy nay vell bouder gar an vavar koova. Lakro per vell pesso, oun lakre rigya perenn khetne. Oun te kamell yek i vavares te praasell, penell lo: Mou djal touke har kay djouvyake!

²⁸ Te anas savi djouvel gar ladj ap peste, oun kek doosh hi ap late, palle vell yoy gar nasselo, oun nay vell an vavar koova.

^29-30 Yaake hounte krenn t'mer kova, te zilverell i morsh oun patsell, te rhorhras les peskri romni i vavareha. Yob hounte anell lat glan o baro Debleste. Oun ko rashay hounte krell lah kova yaake har kate penlo hi.

³¹ Te his ko morshes gar čačo, lell lo kek phagi. Koy djouvel, te anas li doosh ap peste, hounte hidjrell peskri phagi.