4. Mose 36 - O Debleskro Lab 2024 (Sinte-Manouche)

I ča, kay lenn i kotar them, hounte romedinerenn yekes pengre menshendar

¹ Oun i pralstoune pral i menshende, kay venn pal o Gilead, van pash o Moseste. O Gileadeskro dad his o Makir, oun leskro papo his o Manasse dran o kheer Yosef. Kal pralstoune rakran o Moseha oun kol vavar pralstunentsa i menshendar Israel,

² oun penan: “O baro Devel penas touke, maro rayeske, te vell ko them i Israelitaryen yaake dino, har i barhtyakre barra sikrenn, te vell kova lenge. Ninna penas lo touke, te dess ko them, hoy maro phrales, o Selofades his, leskre čende.

³ Te romedinerell yek kol menshendar Israel i čat o morshestar Selofad, vell lakro them pash ko them kol menshendar lakro romestar. Oun ko them mare phourendar vell tikneder.

⁴ Te vell kanna ko bersh, kay lell hakeno pale, hoy glan i tsiro leskro his, palle vell ko them kol čendar hako tsireske kol menshenge, kolendar lengre romma hi. Oun yaake vell ko them mare menshendar tikneder.”

⁵ O Mose penas i Israelenge, hoy o baro Devel leske an kava koova penas: Kol menshe dran o kheer Yosef rakran o čačepen.

⁶ Kava hi, hoy o baro Devel rakras pral kol čende o morshestar Selofad, hoy te kras mer. Yob penas: Mouk len romedinerell, har yon kova kamenna. Kokres yek koova hounte rikrenn le dren: Lengre romma hounte venn kol menshendar lengro dadestar.

⁷ Kek them te perell koy yek bari familyatar ap i vavar familyate. Hako Israelitari rikrell ap peskro kotar them an o them kol menshendar peskro dadestar.

⁸ Oun kol tsele ča, kay lenn i kotar them mashkral kol menshende Israel, hounte romedinerenn yekes kol menshendar lengro dadestar, te rikrell hakeno mashkral kol Israelitarya ko them leskre phourendar.

⁹ Yaake djal kek kotar them kol yek menshendar ap i vavarende. Hakeno kol 12 bare familyendar an Israel hounte rikrell zoreles peskro them.

¹⁰ Yaake har o baro Devel kova o Moseske penas, kran kol ča o morshestar Selofad:

¹¹ I Mala, i Tirza, i Hogla, i Milka, oun i Noa romedineran kol čaven lengre kakendar.

¹² dran o kheer Manasse, koleskro dad o Yosef his. Yaake ačas lengro kotar them pash kol menshende lengro dadestar.

¹³ Kalla hi kol čačepaskre laba, kay o baro Devel o Moseske penas, te rikrenn pen i Israelitarya ap lende. Yob penas len lenge an o telstouno them Moab pash o pani Yordan, vergel o foro Yericho.