4. Mose 35 - O Debleskro Lab 2024 (Sinte-Manouche)

Forya i Levitarenge

¹ Oun o baro Devel rakras o Moseha an o telstouno them Moab pash o pani Yordan, ap i vavar rig o forestar Yericho, oun yob penas:

² Pen ap kol Israelende: T'mer lenna them oun forya. Denn kol foryendar ninna forya kolende dran o kheer Levi, kay yon nay djivenn. Denn lende ninna them lengre firhenge, ko themestar, hoy troul kol forya hi,

³ te hi len forya, kay djivenn le oun them lengre firhenge, kay lengre groumya, bakre oun vavar firhe nay rhana.

^4-5 Ko them i firhenge, hoy glan kol forya hi, hoy t'mer kol Levitaryen denna, hounte djal vin o forestar 500 metarya an hake star rigya, yaake te vell i platsa, kay haki rig 1.000 yek zero metarya baro hi, oun o foro hi mashkral dren.

Kova hi kol forya, kay nay nashenn penge kolla, kay maran yekes

⁶ Kol foryendar, kay denn t'mer kol Levitaryen, hounte venn shob forya save menshenge koy, kay dan yekes moulo oun hounte nashenn penge. Kolla nay nashenn an kol forya dren. Koy pashel hounte denn lenge 42 (star-deesh-te-douy) vavar forya.

⁷ Kol tsele forya, kay t'mer kol Levitaryen denna, hi khetne 48 (star-deesh-ta-orhta). Koy pashel vell ko them i firhenge.

⁸ Hakeni kol deesh-te-douy bare familyendar an Israel hounte dell lenge peskre foryendar. Kolen, kay boud them oun forya hi, kolla hounte denn i Levitaryen boudeder forya har kolla, kay len gar boud hi.

⁹ Oun o baro Devel rakras o Moseha oun penas:

¹⁰ Rake kol Israelentsa oun pen ap lende: Te venn t'mer vergel o pani Yordan, an ko them Kanaan,

¹¹ hounte rodenn t'mer forya vin, kay nay hakeno dren djala, kay naashepaskro hi, oun yekes moulo das, oun kamas kova gar.

¹² Oun kol forya hi savenge, kay hounte khatrenn pen kolendar, kay kamenn o rat kol marede menshendar ap lengro shero pale te anell. Yaake hounte merell kova gar, kay das yekes moulo, bis te yob glan i tsillo tardo hi, glan kolende, kay rakrenn o čačepen pral leste vin.

¹³ Oun kol forya, kay hako naashepaskro nay djal koy dren, hounte venn shob forya,

¹⁴ triin ap kay rig o panyestar Yordan, oun triin an o them Kanaan.

¹⁵ Kal shob forya hi kol Israelenge oun kol menshenge, kay pash t'mende djivenn, ninna te hi le gar t'mendar, te nay nashenn kolla kote, kay dan yekes moulo, oun kaman kova gar.

¹⁶ Te das yek i vavares mit i kotar saster yaake, te merell yob, hi lo i marepaskro oun hounte vell moulo dino.

¹⁷ Vitsras yob i barreha ap leste, hoy bares doha hi, te nay marell lo yekes, oun kova meras koy pre, hi lo i marepaskro oun hounte vell moulo dino.

¹⁸ Das yob yekes i kashteha yaake, te meras kova koy pre, hi lo i marepaskro oun hounte vell moulo dino.

¹⁹ Kova, kay les an peskre vasta hi, te anell lo o rat o moulo morshestar ap o marepaskro shero, kova hounte marell kol marepaskres. Kay yob les taprella, hounte dell lo les moulo.

²⁰ Te das yek i vavares dran rholi i ladini oder vitsras čorrhanes čomone ap leste, te meras kova,

²¹ oder te das yob les dran rholi o vasteha yaake, te meras kova, palle hounte vell kova, kay das les, maredo. Yob hi i marepaskro. Kova, kay les an peskre vasta hi, te anell lo o rat o moulo morshestar ap o marepaskro shero, kova hounte marell kol marepaskres. Kay yob les taprella, hounte dell lo les moulo.

²² Hi vavarčandes yekeha, kay das yekes i ladini oun kamas kova gar, oun les hi kek rholi ap leste, oder vitsras čomone ap leste, oun kras kova gar bisemake,

²³ oder vitsras i bar ap leste, kay nay merell koy pre, oun yob dikas kova gar, oun ko vavar merell, oun les his kek rholi ap leste oun kamas les kek čilačepen te krell.

²⁴ Palle hounte vell lo glan i tsillo anlo glan kolende, kay rakrenn o čačepen vin mank ko morsheste oun koleste, kay kamell o rat o moulo morshestar pale te anell ap o shero kolestar, kay maras les.

²⁵ Oun i Israelitarya hounte lenn kava morshes vin dran o vast kolestar, kay kamell les te marell, oun hounte anenn les pale pale an ko foro, kay nashas lo peske dren. Oun yob hounte ačell koy, bis ko pralstouno rashay meras, kay vas o Debleskro djeteha dren maklo.

²⁶ Djal ko marepaskro dran ko foro vin, kay nashas lo peske dren,

²⁷ oun ko morsh, kay kamell les te marell, hatsell les vin glan o naashepangro foro, oun dell les moulo, palle anas yob kek doosh ap peste.

²⁸ Ko naashepaskro hounte ačas an ko foro, bis te ko pralstouno rashay moulo hi. Pal leskro merepen nay djal yob khere an peskro them.

²⁹ Kal laba hounte venn čačepaskre laba t'menge, ap kolende hounte rikrenn hako tsiro, kay t'mer ninna djivenna.

³⁰ Koon i menshes moulo das, koles hounte denn moulo, te hi menshe koy, kay dikan oun penan kova. Hi gar doha, te penell yek mensho kokres, hoy lo dikas, yaake te vell ko vavar maredo.

³¹ Te das yob čačepah yekes moulo, nay ginell lo pes gar vin. T'mer hounte lenn kek love lestar, vitar gar leskre menshendar. Maredo hounte vell lo.

³² Oun kova, kay nashas an ko naashepangro foro, nay ginell pes gar vin, te djal lo khere. Yob hounte ačell koy, bis te ko pralstouno rashay meras.

³³ Ma krenn ko them pale-čiddo, kay djivenn! Pale-čiddo vell ko them dran o rat, hoy ratell, te vell yek maredo. Kokres ko rateha kolestar, kay maras yekes, nay vell o them pale djoudjo.

³⁴ Krenn ko them gar pale-čiddo, kay djivenn t'mer, oun kay ninna me djivau. Me hom o baro Devel, oun djivau mashkral t'mende.