4. Mose 34 - O Debleskro Lab 2024 (Sinte-Manouche)

Yaake baro hi o them Kanaan

¹ O baro Devel rakras o Moseha oun penas:

² Pen ap kol Israelitarya: Djan an o them Kanaan! Ko them vell t'menge yek rigyatar ap i vavar: Kolla hi i rigya:

³ Ap i čači rig djal t'maro them bis pash o moulo them Tsin oun bis pash o them Edom. I čači rig djal foun o Londo Baro Pani, kotar, kay o kham pre djal,

⁴ bis pash i berga Akrabbim pre, oun kotar doureder an Tsin, oun pale doureder bis pash Kadesh-Barnea an o Negev oun bis Hazar-Addar, oun Azmon.

⁵ Foun Azmon djal ko them bis pash koy tala, pal late o them Egiptia hi, oun doureder bis pash o Mashkralstouno Baro Pani.

⁶ Kote, kay o kham tele djal, djal t'maro them bis pash o Mashkralstouno Baro Pani.

⁷ Ap koy servi rig djal t'maro them foun o Mashkralstouno Baro Panyestar bis pash koy berga Hor.

⁸ Oun kotar doureder bis kote, kay djal an Hamat, oun doureder pash Zedad,

⁹ oun doureder bis Sifron oun bis Hazar-Enan. Kova hi i servi rig t'maro themestar.

¹⁰ Oun ap koy rig, kay o kham pre djal, djal t'maro them foun Hazar-Enan bis Shefam.

¹¹ Oun doureder tele foun Shefam bis Ribla. Kova hi ap kay rig o forestar Ayin, kay o kham pre djal. Pal kova djal tele kol tikne berge pash o pani Génésareth, kote, kay o kham pre djal,

¹² oun doureder tele bis pash o pani Yordan oun bis pash o Londo Baro Pani. Kova hi t'maro them peskre rigyentsa koy trouyel.

^13-15 Palle penas o Mose ap kol Israelitarya: “Kol menshe dran o kheer Ruben, dran o kheer Gad, oun ko paash kol menshendar dran o kheer Manasse lan pengro kotar them ap kay rig o panyestar Yordan, vergel o forestar Yericho, ap koy rig, kay o kham pre djala. Kava kate hi ko them, kay lenn t'mer vavar. Yaake kamell kova o baro Devel. Vitsrenn barhtyakre barra te hatsenn vin, koon havo kotar lella.”

¹⁶ Oun o baro Devel rakras o Moseha oun penas:

¹⁷ Kalla hi kol laba kol morshendar, kay denn hakenes t'mendar i kotar them: ko rashay Elazar oun o Yosua, koleskro dad o Noun hi.

¹⁸ Koy pashel hounte lenn yek pralstouno dran hako kheer o Yakobeskre čavendar, te denn le hakenes i kotar them.

^19-28 Oun kalla hi kol laba kol morshendar: dran o kheer Youda: Kaleb, koleskro dad hi o Yefunne; dran o kheer Simeon: Shemuel, koleskro dad hi o Ammihoud; dran o kheer Benyamin: Elidad, koleskro dad hi o Kislon; dran o kheer Dan: Boukki, koleskro dad hi o Yogli; dran o kheer Manasse: Hanniel, koleskro dad hi o Efod; dran o kheer Efrayim: Kemuel, koleskro dad hi o Shiftan; dran o kheer Zabulon: Elizafan, koleskro dad hi o Parnak; dran o kheer Issakar: Paltiel, koleskro dad hi o Asan; dran o kheer Asser: Ahihoud, koleskro dad hi o Shelomi; dran o kheer Naftali: Pedahel, koleskro dad hi o Ammihoud.

²⁹ Kal morshenge penas o baro Devel, te denn le kol Israelitaryen lengro kotar them an ko them Kanaan.