4. Mose 33 - O Debleskro Lab 2024 (Sinte-Manouche)

Kolla hi i platse, kay ačan i Israelitarya ap pengro drom

¹ Kalla hi kol platse, kay čivan i Israelitarya pengre plarhtene khera pre, har djan le vin dran o them Egiptia pengre lourdentsa. Vi las len o Mose oun o Aron.

² Oun yaake har o baro Devel o Moseske penas, činas kova pre, havo drom yon djan oun ap have platse yon ačan. Kalla hi kol platse, kay yon pengre plarhtene khera pre čivan ap lengro drom.

³ Yon djan dran o foro Ramses ap o 15. (deesh-te-pančto) dives an o ersto čon. Kova his o douyto dives kol bare divessa Passa. Peskro zorelo vasteha anas len o baro Devel vin glan i yaka kol tsele Egiptarya,

⁴ har kolla pengre phoureder morsh čaven paskran, kolen o baro Devel maras mashkral lende. Yaake sikras lo i Egiptarende, te hi lo zorleder har lengre debla.

⁵ Dran o foro Ramses djan i Israelitarya an o foro Soukot,

⁶ oun kotar doureder an Etam. Kova hi pash o moulo tato them čiddo.

⁷ Dran Etam djan le doureder oun ačan an Pi-Hahirot, kay vergel o foro Baal-Zefon hi oun čivan pengre plarhtene khera pre glan Migdol.

⁸ Dran Pi-Hahirot djan le vin oun djan mashkral o baro pani an o moulo tato them. Oun pal triin divessa an o moulo tato them Etam van le an Mara.

⁹ Dran Mara djan le vin oun van an Elim. Koy his 12 (deesh-te-douy) panya pipaske oun 70 (efta-deesh) palmtikre rouka. Oun kote čivan le pengre plarhtene khera pre.

¹⁰ Dran Elim djan le doureder oun čivan pengre plarhte khera pre pash o Baro Lolo Pani.

¹¹ Kotar djan yon doureder oun djivan i tsiro an o moulo tato them Sin.

¹² Dran o moulo tato them Sin djan le doureder oun van an Dofka,

¹³ foun kotar an Aloush,

¹⁴ foun kotar an Refidim. Koy his i menshen kek pani pipaske.

¹⁵ Dran Refidim djan le doureder oun djivan i tsiro an o moulo tato them Sinay.

¹⁶ Foun kotar djan le doureder oun van an Kibrot-Taava,

¹⁷ pal kova an Hazerot,

¹⁸ an Ritma,

¹⁹ an Rimmon-Perez,

²⁰ an Libna,

²¹ an Rissa,

²² an Kehelata,

²³ pash i berga Shefer,

²⁴ palle an Harada,

²⁵ an Makelot,

²⁶ an Tahat,

²⁷ an Tera,

²⁸ an Mitka,

²⁹ an Hashmona,

³⁰ an Moserot,

³¹ an Bene-Yaakan,

³² an Hor-Gidgad,

³³ an Yotbata,

³⁴ an Abrona,

³⁵ an Ezyon-Geber,

³⁶ an Kadesh, hoy hi čiddo an o moulo tato them Tsin.

³⁷ Oun palle van le pash koy berga Hor, hoy hi čiddo ap i rig pash ko them Edom.

³⁸ Kote djas ko rashay Aron ap koy berga Hor, har o baro Devel leske kova penas, oun meras kote an o star-deshto bersh, har kol Israelitarya dran o them Egiptia vin djan, ap o ersto dives an o pančto čon,

³⁹ har yob 123 (sheel-biish-te-triin) bersha phouro his.

⁴⁰ Oun ko baro ray pral i Kanaanitarya, kay djivas an o foro Arad ap koy rig o themestar, kay o kham pralstounes hi, yob shounas, kay kol Israelitarya van.

⁴¹ Oun foun koy berga Hor djan yon doureder oun van an Zalmona,

⁴² palle an Pounon,

⁴³ oun palle an Obot,

⁴⁴ oun an Iye-Abarim. hoy hi čiddo an ko them Moab.

⁴⁵ Kotar djan le doureder oun van an Dibon-Gad,

⁴⁶ oun an Almon-Diblatayim.

⁴⁷ Foun kotar van le an kol berge Abarim, vergel o foro Nebo ap koy rig, kay o kham pre djal.

⁴⁸ Palle van le an ko telstouno them pash o pani Yordan, vergel o foro Yericho. Kote djivan i Moabarya.

⁴⁹ Kote an o telstouno them Moab čivan i Israelitarya pengre plarhtene khera pre pash o pani Yordan, mank Bet-Yeshimot oun Abel-Shittim.

⁵⁰ Oun o baro Devel rakras o Moseha an o telstouno them Moab pash o pani Yordan, ap i vavar rig o forestar Yericho oun penas:

⁵¹ “Rake kol Israelentsa oun pen lenge: Ap ko tsiro, kay djan t'mer pral o pani Yordan an o them Kanaan,

⁵² hounte tradenn kol tsele menshen, kay djivenn kote, glan t'mende krik. Oun lengre tsele barrengre oun sasterne deblen, hoy kran yon penge, krenn paash, ninna kol pre-čidde barra.

⁵³ Oun lenn ko them t'menge, oun djivenn kote dren. Kava them dom me t'mende, te lenn kova t'menge.

⁵⁴ Oun t'mer hounte denn hakenes i kotar them. Vitsrenn i barhtyakre barra, te hatsenn vin, have menshe havo kotar them lenna. Kal familyen, kolen boud menshe hi, hounte denn boud them. Oun kol familyen, kolen gar boud menshe hi, hounte denn gar yaake boud.

⁵⁵ Te tradenn t'mer gar kol menshen krik, kay djivenn an ko them, palle doukrenn t'men kolla, kay t'mer djido moukan, har i kasht an o yak, oun har i čoupni, kolah i groumni glan tradedo vell. Oun yon krenn t'menge o djipen phares an ko them kay t'mer djivenna.

⁵⁶ Palle krau t'mentsa yaake har kamom kol vavarentsa te krell.”