4. Mose 32 - O Debleskro Lab 2024 (Sinte-Manouche)

I khera Ruben, Gad oun Manasse lenn pengro them vergel o pani Yordan

¹ I menshen dran o kheer Ruben oun dran o kheer Gad his boud firhe. Oun yon dikan, te hi lačo zenlepen i firhenge an ko them Yaser oun Gilead.

² Koy van le pash o Moseste oun ko rashayeste Elazar oun pash kol pralstunende pral i Israelitarya, oun penan ap lende:

³ “Ko them pash kol forya Atarot, Dibon, Yaser, Nimra, Heshbon, Elale, Sibma, Nebo, oun Beon,

⁴ hoy las o baro Devel dren peskre menshenge Israel, kote hi boud zenlepen i firhenge, oun men, tire boudepangren, hi firhe.

⁵ Te hal menge lačo, de men kava them, te hounte djas mer gar pral o pani Yordan.”

⁶ O Mose penas ap lende: “T'mare phrala hounte djan an o kourepen, oun t'mer kamenn kate te ačell?

⁷ Te krenn kova, lenn i vavar Israelitarya daar oun kamenn gar an ko them te djal, kay o baro Devel len della.

⁸ Yaake kran ninna t'mare phoure, har me len vin bičrom dran Kadesh-Barnea, te dikenn le pal, har ko them hi.

⁹ Oun har yon koy pre van pash ko pani Eshkol, oun dikan ko them, van le pale pale oun rakran yaake i Israelentsa, te lan yon daar, oun kaman gar an ko them te djal, kay kamas o baro Devel lende te dell.

¹⁰ Oun o baro Debleskri rholi vas baro an ko tsiro, oun yob das pes sovel oun penas:

¹¹ Kova hi čačo, hoy penau: Kalla menshe, kay dran o them Egiptia vin djan, oun hi biish bersha oun phoureder, dikenn ko them gar, kay dom man sovel, te dap les o Abrahameste, o Isaakeste, oun o Yakobeste. Yon djan mantsa gar o djiyeha.

¹² Kokres o Kaleb, koleskro dad o Yefunne hi, kol menshendar Kenas, oun o Yosua, koleskro dad o Noun hi, venn kote dren. Yon djan mantsa o tselo djiyeha.

¹³ Yaake vas o baro Debleskri rholi pral i Israelitarya, oun yob moukas len trouyel te djal an o moulo tato them star-deesh bersha, bis te kek bouder koy his kol tsele menshendar, kay rhoyran o baro Debles.

¹⁴ Oun kanna krenn t'mer ko emligo koova! T'mer han čače čave t'mare dadendar! Morsha, kay o Debleskro drom tele djan oun krenn, te vell o baro Debleskri rholi pral Israel bareder.

¹⁵ Te djan t'mer lestar krik, moukell yob kal menshen i rah tsiro an o moulo tato them, oun t'men hi doosh, te djan le halauter tele.”

¹⁶ Koy van yon glan pash leste, oun penan: “Mer kamah kate khera te krell mare bakrenge, oun forya mare čavenge.

¹⁷ Palle djah mer khetne mare phralentsa an o kourepen. Mer djah glan lende, bis te anam len an lengro them. An ko tsiro ačenn mare čave an kol zorele forya, te krenn lenge kol menshen an kava them či.

¹⁸ Mer kamah gar khere te djal, bis te hako Israelitari peskro kotar them las.

¹⁹ Mer kamah gar lentsa i kotar them te lell ap i vavar rig o panyestar Yordan. Maro them lah ap kay rig o panyestar Yordan, kay o kham pre djal.”

²⁰ O Mose penas ap lende: “Te kamenn t'mer kova čačepah te krell, palle lenn t'mare rhare oun hoy t'men hounte vell kourepaske, oun djan an o kourepen glan o baro Debleste!

²¹ Oun djan vergel o pani Yordan glan o baro Debleskre yaka, oun ačenn kote, bis te tradell yob kolen glan peste vin, kay kourenn pen t'mentsa,

²² oun bis te hi lo o ray pral ko them. Koy pal nay djan t'mer pale pale, oun kek doosh lan t'mer ap t'mende glan o baro Debleste oun glan Israel. Oun o them ap kay rig kate vell t'mende dino glan o baro Debleste.

²³ Te kamenn t'mer kova gar te krell, palle lenn i doosh ap t'mende glan o baro Debleste. Oun kova dikenn t'mer, te vell koy phagi ap t'mende.

²⁴ Čivenn kanna forya pre t'mare čavenge oun barra troul kol platse, kay t'mare firhe hi, oun krenn, hoy t'mer penan.”

²⁵ “Maro ray, mer krah, har tou penal,” penan kol morsha dran o kheer Gad oun dran o kheer Ruben.

²⁶ “Mare čave oun djouvya, halauter hoy men hi, oun mare tsele firhe ačenn an kol forya an o them Gilead.

²⁷ Mer, t'mare boudepangre, lah mare rhare oun djah i vavar lourdentsa an o kourepen glan o baro Debleste, har tou, maro ray, penal.”

²⁸ Koy penas o Mose ap o rashayeste Elazar oun ap o Yosua, koleskro dad o Noun his, oun ap kol pralstunende pral i bare familye:

²⁹ “Te djan i morsha dran o kheer Gad oun dran o kheer Ruben t'mentsa vergel o Yordan, oun kourenn pen yaake rah glan o baro Debleste, bis te ko them t'menge hi, yaake denn lende ko them Gilead, te vell kova lenge.

³⁰ Djan yon gar t'mentsa vergel o pani Yordan an o kourepen, yaake lenn yon i kotar them mashkral t'mende an ko them Kanaan.”

³¹ I morsha dran o kheer Gad oun dran o kheer Ruben penan pale: “Yaake har o baro Devel menge penas, krah mer.

³² Mer lah mare rhare oun djah glan o baro Debleste an o them Kanaan, te las maro kotar them kate ap kay rig o panyestar Yordan.”

³³ Yaake das o Mose kol menshen dran o kheer Gad oun dran o kheer Ruben oun ko paash kol menshendar dran o kheer Manasse, kay o Yosefeskro čavo his, ko them, kay o Sihon o baro ray pral i Amorarya his oun ko them, kay o Og o baro ray pral Bashan his. Yob das len o tselo them oun kol forya koy dren.

³⁴ Oun i morsha dran o kheer Gad kran kol forya Dibon, Atarot, Aroer,

³⁵ Atrot-Shofan, Yaser, Yogboha

³⁶ Bet-Nimra oun Bet-Haran, halauter zorele forya; oun yon čivan barra pre troul kol platse, kay lengre bakre hi.

³⁷ I morsha dran o kheer Ruben kran kol forya Heshbon, Elale, Kiryatayim,

³⁸ Nebo, Baal-Meon oun Sibma oun dan kol foryen, kay yon kran, neve laba.

³⁹ Oun i morsha dran o kheer Makir, koleskro dad o Manasse his, djan an o them Gilead, kouran pen kol menshentsa koy, lan ko them penge oun tradan kol Amoraryen krik, kay koy dren djivan.

⁴⁰ Koy das o Mose ko morshes Makir ko them Gilead, oun yob djivas koy.

⁴¹ O Yayr, koleskro dad o Manasse his, djas koy, oun las gaba peske dren oun das len ko lab Yayreskre gaba.

⁴² O Noba djas koy, oun las o foro Kenat peske dren oun kol gaba trouyel, oun das les ko lab Noba, yaake har yob kharell.