4. Mose 31 - O Debleskro Lab 2024 (Sinte-Manouche)

I Israelitarya denn i Midianaryen oun lenn lengro bravlepen penge

¹ O baro Devel rakras o Moseha oun penas:

² “De kol Midianaryen ko čilačepen pale, hoy kran le ap i Israelitaryen! Oun pal kova vell ko dives, kay mereh tou.”

³ Koy penas o Mose ap i Israelitaryen: “Lenn lourden t'mendar, te kourenn yon pen kolentsa dran Midian. Yaake te lenn kol Midianarya pengri phagi, hoy o baro Devel len dell.

^4-5 Lenn yek zero morshen dran hakeneste kol deesh-te-douy bare familyendar, hoy venn o Yakobeskre čavendar, oun bičrenn len an o kourepen.” Oun yaake kran le, oun 12.000 (deesh-te-douy-zerya) morsha van khetne kourepaske.

⁶ Oun o Mose bičras len an o kourepen. Lentsa djas o Pinhas, koleskro dad o rashay Elazar his. Oun o Pinhas las o Debleskro koova peha, ninna kol kourepaskre phourdepangre.

⁷ Oun yon djan an o kourepen an o them Midian, te kourenn le pen lentsa, yaake har o baro Devel kova o Moseske penas, oun dan i tsele morshen kote moulo.

⁸ Ninna maran le kol panč bare rayen pral i Midianarya. Yon kharan Evi, Rekem, Sur, Hour, oun Reba. Ninna dan le o Bileames o rhareha moulo, koleskro dad o Beor his.

⁹ Oun kol Israelitarya pandan kol djouvyen foun kol Midianarya oun lengre čaven. Lengre firhe, oun halauter, hoy len hi, čoran yon.

¹⁰ Oun rhačran lengre tsele forya, lengre khera oun plarhtene khera, kay yon djivan.

¹¹ Oun yon lan ko tselo čoredo koova, oun halauter, hoy yon nay lan, menshe oun firhe,

¹² oun anan len pash o Moseste oun o rashayeste, o Elazar, oun pash i tsele vavar Israelitarya. Kolla his ap pengri platsa pash o pani Yordan an o telstouno them, kay kol Moabarya djivan, vergel o foro Yericho.

¹³ Oun o Mose oun o rashay Elazar oun kol vavar pralstoune djan pash lende, vin glan i platsa.

¹⁴ Oun o Mose vas rhoyedo pral i pralstoune lourdende oun pral kol pralstoune pral i zerya oun pral sheel lourdende, kay dran o kourepen van.

¹⁵ Oun yob penas ap lende: “Hoske moukan t'mer i tsele djouvyen djido?

¹⁶ Ma bistrenn, te his kol djouvya, kay kran, hoy o Bileam lenge penas, oun tserdan i Israelitaryen o baro Deblestar krik, yaake te nashan le o rhorheno debles Baal-Peor palla. Doleske vas ko baro nasslepen ap o Debleskre menshende.

¹⁷ Kanna, denn moulo kol tsele morsh čaven, oun kol tsele djouvyen, kolen i rom his.

¹⁸ Kol tsele ča, kay van kek morshestar an-tapedo, kolen moukenn t'menge djido!

¹⁹ Oun t'mer halauter, kay dan yekes moulo oder kay tapran i moules an, ačenn efta divessa glan koy platsa, kay t'mare plarhtene khera hi. Ap o triinto dives oun ap o eftato dives thovenn t'men yaake har glan činlo hi, te venn pale djoudjo oun erligo. Ninna kol ča, kay lan t'menge pandlo, hounte thovenn pen yaake.

²⁰ Ninna kol tsele ripaskre koola, oun halauter, hoy dran ledera, bouzyengro bal oun kasht kerdo vas, hounte vell djoudjo kerdo.”

²¹ Oun o Elazar, ko rashay, penas ap kol lourdende, kay his an o kourepen: “Kova hounte vell yaake kerdo, har o baro Devel kova o Moseske penas.

²² Ko koova dran sonakay, roup, lolo saster, saster, cinno oun blayo,

²³ oun halauter, hoy i yag gar pre rhačrell, kova hounte rikrenn an i yag, te vell kova djoudjo. Oun pal kova vitsrenn pani koy pre. Oun kova halauter, hoy rhačrals pre an i yag, čivenn an o pani.

²⁴ Oun t'mer hounte thovenn t'mare ripaskre koola ap o eftato dives. Palle venn t'mer djoudjo. Pal kova nay venn pale ap i platsa, kay i plarhtene khera tardo hi.”

²⁵ Oun o baro Devel rakras o Moseha oun penas:

²⁶ “Le kol tsele menshen oun kol firhen, kay tapran, kay krik anlo van, pash t'mende pre, tou oun ko rashay Elazar oun kol pralstoune pral i bare familyende.

²⁷ oun de i paash kolende, kay his an o kourepen, oun kol vavar paash de i vavar Israelitaryen.

^28-29 Oun kolla, kay his an o kourepen, hounte denn čomone o baro Debleske. Kolestar, hoy yon pandles lan, le yek menshes hake panč-shelendar oun yek firho hake panč-shelendar, i groumyendar, i bakrendar oun foun i bourike. Oun de les o rashayeste Elazar, te dell yob kova o baro Debleste.

³⁰ Kol vavar Israelitarya hounte denn ninna čomone o Debleske. Lendar less tou yek menshes hake paash-shelendar oun yek firho hake paash-shelendar, i groumyendar, i bakrendar, foun i bourike, oun i tsele vavar firhendar, oun hounte dess len kol Levitaryen, kay krenn pengri boudi ap o Debleskro kheer.”

³¹ O Mose oun o rashay Elazar kran yaake har o baro Devel kova o Moseske penas.

³² Oun kova, hoy i lourde tapran oun hoy djido ačas his 675.000 (shob-sheel-efta-deesh-te-panč-zerya) bakre.

³³ 72.000 (efta-douy-zerya) groumya,

³⁴ 61.000 (shob-deesh-te-yek zerya) bourike,

³⁵ 32.000 (triyanda-te-douy-zerya) djouvya, kay kek morshestar an-tapedo van.

³⁶ Oun ko paash, kay kolenge hi, kay an o kourepen djan, his 337.500 (triin-sheel-triyanda-te-efta-zerya-panč-sheel) bakre.

³⁷ Kolendar hounte dan yon o baro Debleste 675 (shob-sheel-efta-deesh-te-panč) bakre.

³⁸ Ninna 36.000 (triyanda-te-shob-zerya) groumya. Kolendar hounte dan yon o baro Debleske 72 (efta-deesh-te-douy) groumya.

³⁹ Ninna 30.500 (triyanda-zerya-te-panč-sheel) bourike. Kolendar hounte dan yon o baro Debleste 61 (shob-deesh-te-yek).

⁴⁰ Ninna 16.000 (deesh-te-shob-zerya) djouvya. Kolendar dan le o baro Debleste 32 (triyanda-te-douy).

⁴¹ Oun o Mose das kova, hoy dan kolla leske o baro Debleske, ko rashayeste Elazar, yaake har o baro Devel leske kova penas.

^42-46 Ko vavar paash, hoy o Mose ap i rig čivas kol vavar Israelenge, his yaake baro har kol lourdengro paash.

⁴⁷ Oun o Mose las kolestar, hoy i Israelengre hi, o 50. (paash-sheelto) kotar hake firhendar oun hake menshendar, oun das len kol Levitaryen, kay boudrenn ap o Debleskro kheer, yaake har o baro Devel kova o Moseske penas.

⁴⁸ Oun pash o Moseste van kolla, kay penepaske hi pral kol boud lourdende, kol pralstoune pral i zero lourdende oun pral i sheel lourdende,

⁴⁹ oun penan ap leste: “Mer, tire boudepangre, lan pre, har boud lourde koy hi, kay men pral lende penepaske hi; oun halauter his koy.

⁵⁰ Doleske anah mer o baro Debleske ko sonakaskro koova, hoy hakeno mendar hatsas: brassleta, vastengre verklia, goustria, kanengre oun verklia. Mer dah kova o baro Debleste, te playsras maro djipaske, te vell či tardo mank o baro Debleste oun mende.”

⁵¹ O Mose oun o rashay Elazar lan ko tselo sonakaskro koova.

⁵² Oun ko tselo sonakay, kay kol pralstoune o baro Debleske anan, his 200 (douy-sheel) kilogramme pharo.

⁵³ Kol lourde, kay his kek pralstoune, rikran penge kova, hoy tapran yon an o kourepen.

⁵⁴ O Mose oun ko rashay Elazar lan ko sonakay kol pralstunendar oun anan kova an o Debleskro plarhteno kheer, te bistrell o baro Devel gar, te dikell lo lačes ap i Israelitarya.