4. Mose 30 - O Debleskro Lab 2024 (Sinte-Manouche)

Har te rikrell yek peskri sovel

¹ Oun o Mose penas kol Israelenge halauter, hoy o baro Devel leske penas.

² Oun o Mose rakras lengre pralstunentsa, oun penas: Kava hi kova, hoy o baro Devel kamell, te krenn t'mer kova.

³ Te penell yek ap o baro Debleste: “Me dau miro lab, te krap kava te kova” oder čivell glan leste i sovel tele, palle hounte phagell yob gar peskro lab oun hounte krell halauter, hoy yob penas.

⁴ Te hi i djouvel kote, kay penell ap o baro Debleste: “Me dau man sovel, te krap kava te kova”, yaake rah yoy an ko kheer lakro dadeste hi, oun yoy gar romedino hi,

⁵ oun lakro dad shounas lakro labestar, hoy yoy o Debleste das, oun yob penas či koy pre, palle hounte rikrell yoy halauter, kay das li pes sovel pre. Oun halauter, hoy las li ap peste, hounte rikrell li ninna.

⁶ Te kamell lakro dad kova gar an ko dives har yob kolestar shounas, palle hounte rikrell yoy gar, hoy das li pes sovel, oun hoy yoy las ap peste. Oun o baro Devel djinell, kay lakro dad gar kamas te krell yoy kova, oun yob hidjrell lake či palla.

⁷ Te romedinerell yoy, oun ap late hi i sovel čiddo, ninna te das li pes sovel oun djinas gar, hoy yoy penella, oun pandas pes yaake ap kova, hoy yoy penas,

⁸ oun lakro rom penell či koy pre ap ko dives, kay shounell lo kova, palle hounte rikrell yoy peskri sovel, oun hounte krell, hoy li ap peste las.

⁹ Te kamell lakro rom kova gar ap ko dives, kay yob kova shounas, palle hounte rikrell yoy koy sovel gar dren, hoy ap late čiddo hi, vitar gar ko lab, ap koleste pandas li pes. Oun o baro Devel hidjrell lake či palla.

¹⁰ Koy sovel, hoy das i romni, kolakro rom meras, ninna i djouvel, kay mouklo vas, halauter, hoy yoy ap peste las, hounte rikrell yoy.

¹¹ Te dell i djouvel peskro lab an ko kheer peskro romestar, te krell li čomone o Debleske, oun dell pes koy pre sovel,

¹² oun lakro rom shounell kova, oun penell či koy pre, oun penell gar, te hounte krell yoy kova gar, palle hounte rikrell li halauter, ap hoy yoy pes sovel das.

¹³ Te penell lakro rom, te krell li kova gar, ap hoy das li pes sovel, ap ko dives, kay yob kova shounas, palle hounte rikrell li gar peskri sovel oun peskro lab. Oun o baro Devel hidjrell lake či palla. Yob djinell, kay lakro rom kova gar kamas.

¹⁴ Lauter, kay i djouvel peskro lab pre das, ninna lakre tsele sobya, kolentsa yoy penas, te rikrell li pes pale čomonestar, nay hadell lakro rom pre oder moukell kova yaake.

¹⁵ Te penell yob či koy pre bis ap ko vavar dives, sikrell yob, te nay krell li kova, ap hoy yoy pes sovel das, oun hoy yoy ap peste las.

¹⁶ Te shounas yob kova, oun hadas kova pal yek tsiro pre, hounte hidjrell yob lakri doosh.

¹⁷ Kolla hi kol laba, hoy o baro Devel o Moseske penas, har te vell mashkral o morsheste oun i djouvyate, mashkral o dadeste oun i čate, yaake rah har koy čay gar romedino hi oun djivell an lakro dadeskro kheer.