4. Mose 3 - O Debleskro Lab 2024 (Sinte-Manouche)

O Aroneskre čave

¹ Kolla hi i laba o Aroneskre oun o Moseskre menshendar, kay djivan ap ko tsiro, har rakras o baro Devel o Moseha ap i berga Sinay.

² O Arones his star čave: Ko phoureder kharell Nadab, koy pal vell o Abihu, palle o Elazar, oun o Itamar.

³ Kal star van o djeteha dre-maklo, te venn yon rashaya, oun boudran an o Debleskro kheer.

⁴ Douy lendar, o Nadab oun o Abihu meran an o moulo tato them Sinay glan o baro Debleste, har rhačran yon glan leste vavar koova, hoy yob gar penas. Oun len his kek čave. O Elazar oun o Itamar kran pengri rashayeskri boudi, khetne pengro dadeha, o Aroneha.

I Levitarya lenn pengri boudi

⁵ Oun o baro Devel penas ap o Moseste:

⁶ “An kol menshen dran o kheer Levi kay! An len glan o rashayeste Aron, te venn le leske koy.

⁷ Yon boudrenna leske oun i tsele Israelenge glan o Debleskro kheer, oun hakeno lendar krell koy boudi pash o Debleskro kheer, hoy leste dino vell.

⁸ Oun yon hounte denn yak ap o tselo koova an o Debleskro kheer. Oun yaake krenn yon koy boudi, hoy i tsele Israelitarya hounte krans mange.

⁹ Oun tou aness kol Levitaryen pash o Aron oun leskre čavende. Kova hi yaake, har te anans len i Israelitarya pash lende, te krans le kolengri boudi.

¹⁰ Ap o Aroneste oun ap leskre čavende hounte peness tou, te denn yon yak, te krell kek vavar lengre rashayeskri boudi. Te vell i vavar, te krell lo kay boudi, hounte merell yob.”

¹¹ Oun o baro Devel penas ap o Moseste:

^12-13 “Djiness, me rodom kol Levitaryen vin dran kol Israelitarya, te venn yon mire. Ap ko dives, har marom i tsele phoureder morsh čaven an o them Egiptia, čivom i tsele phoureder morsh čaven an o Israel mange ap i rig, te venn yon mire: kolla, kay i menshestar bolde van har ninna kolla, kay i firhestar bolde van. I tsele phoureder morsh čave hi mange, o baro Debleske. Kanna lau gar kolen, kanna lau i Levitarya mange.”

I laba i morshendar dran o kheer Levi

¹⁴ Oun o baro Devel rakras o Moseha an o moulo tato them Sinay oun penas:

¹⁵ “Čin i laba kol morshendar dran o kheer Levi an i liil! Čin ninna pre dran havi familya yon venna oun koon lengro dad hi! Čin kolen pre, kay hi yek čon phouro oun phoureder!”

¹⁶ Oun o Mose kras yaake har o baro Devel leske penas.

¹⁷ O Levi, les his triin čave: o Gershon, o Kohat, oun o Merari.

¹⁸ O Gershon: les his douy čave: o Libni oun o Shimi.

¹⁹ O Kohat: leskre čave his: o Amram, Yizhar, Hebron oun Ouziel.

²⁰ O Merari: leskre čave his o Mali oun o Moushi. Kova hi i menshe, kay venna pal o Levi peskre familyentsa.

²¹ I menshe, kay venna o Leviteskro čavestar Gershon hi i Libnarya oun i Shimarya:

²² Khetne his le 7.500 (efta-zerya-panč-sheel) morsha, halauter, kay hi yek čon phouro oun phoureder.

²³ Oun len hi pengri platsa pal o Debleskro kheer, ap koy rig, kay o kham tele djala.

²⁴ Oun lengro pralstouno hi o Elyasaf, leskro dad hi o Lael.

²⁵ Lengri boudi pash o Debleskro kheer hi, te denn le garda ap kova, hoy vin ap o kheer hi: kol plarhte, hoy čakrenn o kheer, koy plarhta an o khereskro voudar,

²⁶ ninna kol plarhte, kay hi troul i platsa, hoy glan o kheer hi, kay ninna i sasterni rhačepaskri hi, kay firhe o Debleske rhačedo venna. Ninna denn le yak ap koy plarhta an o voudar glan koy platsa oun ap i shelle oun ko vavar koova, hoy koy pashel hi.

²⁷ I menshe, hoy venna o Leviteskro čavestar Kohat hi i Amramarya, i Yizhararya, i Hebronarya, oun i Ouzielarya.

²⁸ Khetne his le 8.600 (orhta-zerya-shob-sheel) morsha, halauter, hoy hi yek čon phouro oun phoureder. Lengri boudi hi, te boudrenn le ap ko koova an o Debleskro kheer.

²⁹ Lengri platsa hi pash o Debleskro kheer, ap koy rig, kay o kham tato hi.

³⁰ Lengro pralstouno hi o Elizafan, koleskro dad o Ouziel hi.

³¹ Oun yon hounte denn garda ap ko sonakaskro morhton, koy rhapaskri, koy momelengri, o Debleskro sonakaskro bob oun o Debleskri sasterni rhačepaskri, kay firhe rhačede venna. Ninna denn le garda ap i tselo Debleskro koova an leskro kheer, koleha yon boudrenna, ninna ap koy plarhta mank kol douy iseme oun ap halauter, hoy koy pashel hi.

³² O ray pral i tsele pralstunende mank i Levitarya vell o Elazar, ko čavo o rashayestar Aron, te dell yob yak ap kolende, kay boudrenn an o Debleskro kheer.

³³ I menshe, hoy venna o Leviteskro čavestar Merari hi i Malarya oun i Mousharya.

³⁴ Khetne his le 6.200 (shob-zerya-douy-sheel) morsha, halauter, hoy hi yek čon phouro oun phoureder.

³⁵ Lengro pralstouno hi o Souriel, koleskro dad o Abihayil hi. Lengri platsa hi pash o Debleskro kheer ap koy rig, kay o kham gar vella.

³⁶ Oun lengre boudi hi, te denn le garda ap kol kotya, dran kolende o kheer kerdo vell: i činle kashta, i pandepaskre kashta, i pesse kashta oun lengre pire, ap kolende yon tardo venna, ninna o tselo vavar koova, hoy koy pashel hi.

³⁷ Ninna hounte denn le garda ap kol kotya, hoy troul o glanstouni platsa hi: kol pesse kashta oun lengre pire, ap kolende yon tardo venna, kol tikne sasterne kotya, hoy denn le an i phoub, oun i shelle.

³⁸ Glan o Debleskro kheer, ap koy rig, kay o kham pre djala, hounte vell koy platsa o Moseske oun o Aroneske peskre čaventsa, te denn yon garda, te vell o Debleskri boudi mishto kerdo i tsele Israelenge. Oun te vell i vavar pash o Debleskro kheer, te krell lo kay boudi, hounte merell lo.

³⁹ I tsele morsha, kay venna o Leviteskre morsh čavendar, his khetne 22.000 (biish-te-douy-zerya). Kova hatsas o Mose oun o Aron vin, har činan le i laba kolendar an i liil, kay hi yek čon phouro oun phoureder. Kova kran le yaake, har o baro Devel les lenge penas.

I phoureder morsh čave hi o Debleske

⁴⁰ Oun o baro Devel penas ap o Moseste: “Hatse vin har boud morsha mank i Israelitarya hi, kay hi i phoureder čave pengre dayendar. Čin i laba kolendar an i liil, kay hi yek čon oun phoureder.

⁴¹ Hako phoureder morsh čavo mank i Israelitarya hi miro. Me hom o baro Devel. Hako phoureder morsh čaveske dess tou mande yek Levitari. Ninna hako phoureder morsh firho, hoy i Israelitaryen hi, hi miro. Hakeneske lendar dess tou mande yek firho, hoy i Levitares hi.”

⁴² Oun o Mose kras, hoy o baro Devel leske penas, oun činas i laba kol tsele morshendar an i liil, hoy i phoureder čave pengre dayendar hi.

⁴³ Oun halauter, hoy yek čon hi oun phoureder, his khetne 22.273 (biish-te-douy-zerya-douy-sheel-efta-deesh-te-triin).

⁴⁴ Oun o baro Devel rakras o Moseha oun penas:

⁴⁵ “Hako phoureder morsh čaveske mank i Israelitarya le i Levitari, te vell lo mange, o baro Debleske! Oun le kol firhen, hoy i Levitaryen hi, oun gar kolen, hoy i Israelitaryen hi!

⁴⁶ Kanna hi 273 (douy-sheel-efta-deesh-te-triin) morsha boudeder, kay phoureder čave hi, har dell Levitarya. Kolen hounte ginenn t'mer mandar pale.

⁴⁷ Hakeneske lendar less tou panč kotya roup. Yek kotar roup hounte vell yaake pharo har kol kotya roup an o Debleskro kheer hi: deesh-te-douy gramme pharo.

⁴⁸ Oun tou dess ko roup o Aroneste oun leskre čavende. Ko roup vell kol morshenge playsedo, kay boudeder hi har kol Levitarya.”

⁴⁹ Koy las o Mose ko roup kolendar, kay boudeder hi har kol Levitarya.

⁵⁰ Yaake las lo kol morshendar oun čavendar, hoy i phoureder čave his, khetne 1.365 kotya roup, hako kotar roup yaake pharo har kol kotya an o Debleskro kheer.

⁵¹ Oun o Mose das ko roup o Aroneste oun leskre čavende, yaake har o baro Devel kova leske penas.