4. Mose 29 - O Debleskro Lab 2024 (Sinte-Manouche)

f. ap o phourdepaskro dives

¹ Oun ap o ersto dives an o eftato čon hounte venn khetne glan o baro Debleste. Kek boudi hounte krenn ap ko dives. Kava hounte vell t'menge i dives, kay phourdenn i phourdepaskri.

² Oun t'mer hounte rhačrenn firhen o Debleske. Oun ko lačo soungepen, hoy pre djal, te venn le rhačedo, soungella mishto o baro Debleske. Kolla hi kol firhe, hoy hounte rhačrenn leske tseles: yek terni morsh groumni, yek morsh bakro, oun efta yek-bershengre bakre, kay gar nasselo hi.

³ Oun pash hako firheste denn o Debleste i rhapen dran lačo yarro djeteha: pash koy terni morsh groumni triin kilogramme yarro, pash ko morsh bakro douy kilogramme yarro,

⁴ oun pash hako terno bakro kol efta terne bakrendar yek kilogrammi yarro.

⁵ Koy pashel hounte anenn i morsh bouzni o baro Debleske, te vell t'mari doosh krik lino.

⁶ Kova halauter hounte anenn pash kova pashel, hoy rhačrenn hako nevo čon oun hako dives o Debleske, kol firhen oun ko yarro oun koy mool, hoy leske vin čorenn, yaake har glan činlo hi. Oun o lačo soungepen, hoy djal pre, te vell kova halauter rhačedo an i yag, soungella mishto o baro Debleske.

g. ap o baro dives, kay vell halauter krik lino, hoy mank i menshende oun lengro Debleste tardo hi

⁷ Ap o deshto dives an o eftato čon hounte venn khetne glan o baro Debleste. Rhan či ap ko dives! Krenn vitar kek boudi!

⁸ Ap ko dives rhačrenn o Debleske firhen. Oun o lačo soungepen, hoy djal pre, te venn le tseles rhačedo an i yag, soungella mishto o baro Debleske. Kalla hi kol firhe, hoy hounte rhačrenn: yek terni morsh groumni, yek morsh bakro, efta yek-bershengre bakre, kay gar nasselo hi.

⁹ O lačo soungepen, hoy djal pre, te vell kova halauter rhačedo an i yag, soungella mishto o baro Debleske. Oun pash hako firheste denn o Debleste i rhapen dran lačo yarro djeteha: pash koy terni morsh groumni triin kilogramme yarro, pash ko morsh bakro douy kilogramme yarro,

¹⁰ oun pash hako terno bakro kol efta terne bakrendar yek kilogrammi yarro.

¹¹ Koy pashel hounte anenn i morsh bouzni o baro Debleske, te vell t'mari doosh krik lino. Kova halauter vell pash kova pashel, hoy denn o Debleste ap ko dives: i morsh bouzni i doshake, oun kol firhe, hoy venn leske hako dives rhačedo, khetne ko rhapen dran yarro oun koy mool, hoy vell leske vin čoredo.

h. ap i bare divessa, kay djivan i Israelitarya an patyengre khera

¹² Ap o deesh-te-pančto dives an o eftato čon hounte venn khetne glan o baro Debleste. Kek boudi krenn ap ko dives! Krenn i festo o Debleske efta divessa,

¹³ oun rhačrenn leske firhen. Oun o lačo soungepen, hoy djal pre, te venn le rhačedo, soungella mishto o baro Debleske. Ap o ersto dives rhačrenn leske deesh-te-triin terne morsh groumya, douy morsh bakre, oun deesh-te-star yek-bershengre bakre, kay gar nasselo hi.

¹⁴ Oun pash hako firheste denn o Debleste i rhapen dran lačo yarro djeteha: pash haki terni morsh groumni kol triin-te-deesh groumyendar triin kilogramme yarro, pash hako morsh bakro kol douy morsh bakrendar douy kilogramme yarro,

¹⁵ oun pash hako terno bakro kol deesh-te-star terne bakrendar yek kilogrammi yarro.

¹⁶ Koy pashel hounte anenn i morsh bouzni o baro Debleske, te vell t'mari doosh krik lino. Pash kova halauter venn kol firhe, hoy venn hako dives o Debleske rhačedo, khetne ko yarreha oun koy molyah, hoy vell koy pashel vin čoredo.

^17-34 Ap o douyto dives bis ap o eftato dives denn o Debleste kova, hoy leske hako dives hounte vell, oun koy pashel save firhen, kay gar nasselo hi, oun ko rhapen dran yarro oun koy mool, hoy koy pashel vell, yaake har glan činlo hi: ap o douyto dives: deesh-te-douy terne morsh groumya, douy morsh bakre, oun deesh-te-star yek-bershengre bakre, ninna i morsh bouzni i doshake; ap o triinto dives: deesh-te-yek terne morsh groumya, douy morsh bakre, oun deesh-te-star yek-bershengre bakre, ninna i morsh bouzni i doshake; ap o starto dives: deesh terne morsh groumya, douy morsh bakre, oun deesh-te-star yek-bershengre bakre, ninna i morsh bouzni i doshake; ap o pančto dives: enya terne morsh groumya, douy morsh bakre, oun deesh-te-star yek-bershengre bakre, ninna i morsh bouzni i doshake; ap o shobto dives: orhta terne morsh groumya, douy morsh bakre, oun deesh-te-star yek-bershengre bakre, ninna i morsh bouzni i doshake; ap o eftato dives: efta terne gourma, douy morsh bakre, oun deesh-te-star yek-bershengre bakre, ninna i morsh bouzni i doshake;

³⁵ Ap o orhtato dives hounte venn khetne oun krenn i festo. Kek boudi hounte krenn ap ko dives.

³⁶ Oun t'mer hounte rhačrenn firhen o baro Debleske. Oun ko lačo soungepen, hoy pre djal, te venn le rhačedo, soungella mishto o Debleske. Kolla hi kol firhe, hoy hounte rhačrenn leske tseles: yek morsh groumni, yek morsh bakro, oun efta yek-bershengre bakre, kay gar nasselo hi.

³⁷ Oun pash hako firheste denn o Debleste o yarro oun i mool yaake har glan činlo hi: pash koy morsh groumni, pash ko morsh bakro oun pash hako terno bakro.

³⁸ Koy pashel hounte anenn i morsh bouzni o baro Debleske, te vell t'mari doosh krik lino. Kova halauter vell pash kol firhe oun ko yarro oun koy mool, hoy vell hako dives o Debleske anlo.

³⁹ Kova halauter hounte anenn t'mer o baro Debleske ap kol bare divessa, kay venn khetne glan leste. Koy pashel vell kova, hoy denn leste hakeno pestar, ninna kova, hoy dan t'men sovel, te denn les kova: firhe, hoy venn leske tseles rhačedo, djob oun mool, ninna firhe, hoy rhan t'mer khetne glan leste.