4. Mose 28 - O Debleskro Lab 2024 (Sinte-Manouche)

O baro Debleske venn firhe oun yarro oun mool anlo: a. hako dives

¹ Oun o baro Devel rakras o Moseha oun penas:

² Pen ap i Israelitarya: T'mer hounte denn yak, te anenn an o čačo tsiro ko koova, hoy denn o Debleste, – ko rhapen, hoy vell leske rhačedo oun koleskro soungepen leske shoukar soungella.

³ Oun pen ap lende: Kalla hi kol firhe, hoy hounte rhačrenn tseles o baro Debleske: hako dives douy bakre, kay yek bersh phouro oun gar nasselo hi.

⁴ Yek bakro taysarlakro, ko vavar ap i rati.

⁵ Koy pashel yaake yek kilogrammi lačo yarro, hoy vas khetne dino yek litari djeteha.

⁶ Kova hi ko rhapen, hoy te rhačrenn hako dives, yaake har anan les o ersto kopo pash koy berga Sinay. Oun o lačo soungepen, hoy pre djal, te vell kova halauter rhačedo an i yag, soungell mishto o baro Debleske.

⁷ Koy pashel vell yek litari mool vin čoredo o baro Debleske an leskro kheer.

⁸ Ap i rati aness ko vavar terno bakro! Koy pashel o rhapen oun i mool har taysarlakro. Oun o lačo soungepen, hoy pre djal, te vell kova halauter rhačedo an i yag, soungella mishto o baro Debleske.

b. ap o Debleskro dives

⁹ Ap o Debleskro dives aness douy bakre, hoy yek bersh phouro hi. Yon hounte venn gar nasselo. Koy pashel aness douy kilogramme lačo yarro khetne dino djeteha. Ninna čoress mool vin o Debleske.

¹⁰ Kova vell o Debleske hako Debleskro dives anlo. Koy pashel kova, hoy vell leske hako dives rhačedo, oun koy mool, hoy vell leske vin čoredo.

c. hako čon

¹¹ Ap o ersto dives an hako čon hounte rhačrenn t'mer o baro Debleske douy terne morsh groumya, yek morsh bakro oun efta yek-bershengre bakre, kay gar nasselo hi.

¹² Oun pash hako firho denn o Debleste i rhapen dran lačo yarro djeteha: pash i morsh groumni triin kilogramme yarro, pash i morsh bakro douy kilogramme yarro,

¹³ oun pash i terno bakro yek kilogrammi yarro. Kava vell rhačedo o baro Debleske. Oun o lačo soungepen, hoy djal pre, te vell kova halauter rhačedo an i yag, soungella mishto o baro Debleske.

¹⁴ Oun koy pashel čorenn mool vin o Debleske: douy litarya pash haki terni morsh groumni, yek-te-paash litarya pash i morsh bakro, oun yek litari pash hako terno bakro. Kava vell rhačedo hako nevo čon.

¹⁵ Koy pashel hounte anenn i morsh bouzni o baro Debleske, te vell t'mari doosh krik lino. Kova halauter vell pash kol firhe oun ko yarro oun koy mool, hoy vell hako dives o Debleske anlo.

d. ap o baro dives Passa

¹⁶ Ap o deesh-te-starto dives an o ersto čon hi ko dives, hoy hi o baro Debleske, oun hoy kharell Passa.

¹⁷ Oun ap o deesh-te-pančto dives ninna an ko čon, hi ko ersto dives kol efta divessa, kay hounte rhan kek maro dran shoutlo yarro.

¹⁸ Ap o ersto dives hounte venn khetne glan o baro Debleste. Kek hounte boudrell ap ko dives.

¹⁹ Oun hounte rhačrenn o baro Debleske douy terne morsh groumya, yek morsh bakro, oun efta yek-bershengre bakre, kay gar nasselo hi.

²⁰ Koy pashel ko rhapen dran lačo yarro djeteha: triin kilogramme haki terni morsh groumyake oun douy kilogramme hako morsh bakreske,

²¹ oun yek kilogrammi hakeneske kol efta terne bakrendar.

²² Koy pashel i morsh bouzni, te vell t'mari doosh krik lino oun lauter pale mishto, hoy mank t'mende oun o Debleste tardo his.

^23-24 Oun kova halauter hounte anenn pash kova pashel, hoy hako dives rhačrenn o Debleske taysarlakro, oun pash koy mool, hoy leske vin čorenn. Yaake hounte krenn hako dives efta divessa. Oun o lačo soungepen, hoy djal pre, te vell kova halauter rhačedo an i yag, soungella mishto o baro Debleske.

²⁵ Ap o eftato dives hounte venn pale khetne, te sharenn o baro Debles. Ap ko dives hounte krenn kek boudi.

e. ap o dives, kay o nevo djob o Debleske anlo vell

²⁶ Oun ko dives, kay anenn t'mer o baro Debleske ko nevo djobestar, hoy dren anlo vas, ko dives vell t'menge i baro dives, kay venn khetne glan o baro Debleste. Kek boudi hounte krenn t'mer ap ko dives.

²⁷ Oun hounte rhačrenn o baro Debleske douy terne morsh groumya, yek morsh bakro, oun efta yek-bershengre bakre, kay gar nasselo hi. Oun o lačo soungepen, hoy djal pre, te vell kova halauter rhačedo an i yag, soungella mishto o baro Debleske.

²⁸ Koy pashel ko rhapen dran lačo yarro djeteha: triin kilogramme haki terni morsh groumyake oun douy kilogramme hako morsh bakreske,

²⁹ oun yek kilogrammi hakeneske kol efta terne bakrendar.

³⁰ Koy pashel anenn i morsh bouzni, te venn t'mari doosh krik lino.

³¹ Oun kova halauter hounte anenn pash kol firhe oun ko yarro oun koy mool, hoy vell hako dives o Debleske anlo. Kol firhe, hoy anenn o Debleske, hounte venn sasto.