4. Mose 27 - O Debleskro Lab 2024 (Sinte-Manouche)

I ča lenn pengro dadeskro them pal leskro merepen

¹ Oun o Selofad, koleskro dad o Hefer his, koleskro dad o Gilead his, koleskro dad o Makir his, koleskro dad o Manasse his, koleskro dad o Yosef his, les his panč ča: i Mala, i Noa, i Hogla, i Milka, oun i Tirza.

² Kolla van pash o voudar glan o Debleskro kheer oun penan ap o Moseste oun ap o Elazar, ko rashayeste, glan kol pralstunende oun i tsele Israelitarya, kay koy hi:

³ “Maro dad meras an o moulo tato them, oun his gar mashkral kolende, kay djan o Koraheha oun hadan pen pral o baro Debleste. Yob meras peskri doshake, hoy yob kras. Oun les his kek morsh čave.

⁴ Hoske hounte djal maro dadeskro lab tele doleske, kay les kek morsh čave hi? De men ninna i kotar them an o them kol phralendar maro dadestar!”

⁵ O Mose anas lengro koova glan o baro Debleste.

⁶ Oun o baro Devel penas ap leste:

⁷ “Kol ča foun o Selofad penan o čačepen. Tou hounte dess len i kotar them an ko them, hoy deh kol phralende lengro dadestar, oun hounte dess lengro dadeskro them lende.

⁸ Oun pen kol Israelenge: Te merell yek, oun koles hi kek morsh čavo, hounte denn leskro them leskri čate.

⁹ Oun te hi les kek čay, hounte denn kova leskre phralende.

¹⁰ Te hi les kek phrala, hounte denn kova kol phralende leskro dadestar.

¹¹ Te hi leskro dades kek phrala, hounte denn kova leskre menshende, kay lestar venna, te lenn yon kova halauter. Kova hounte vell pash i Israelitarya yaake har o baro Devel kova o Moseske penas.”

O Yosua vell o pralstouno pral i Israelitarya pal o Mose

¹² Oun o baro Devel penas ap o Moseste: “Dja pre ap koy berga Abarim oun dik ap ko them, hoy dau me i Israelende.

¹³ Oun te dikal tou kova, mereh tou, yaake har tiro phraal Aron ninna meras.

¹⁴ Kova vell doleske, kay shounan gar ap miro lab an o moulo tato them Tsin, har i Israelitarya rhoyedo his oun pal pani gole dan, oun t'mer moukan man gar te sikrap, te hom čačepah o baro oun zorelo Devel, kay nay dell len pani.” Kova his pash o foro Kadesh an o moulo tato them Tsin. Ko pani vas kharedo čingepaskro pani.

¹⁵ Oun o Mose rakras o baro Debleha oun penas:

¹⁶ “Mo ray, tou baro Devel, kolestar o tselo djipen vell, čip i morshes pral i Israelitarya,

¹⁷ yekes, kay djal glan lende vin oun dren, oun anell len vin oun dren, te venn o baro Debleskre menshe gar har bakre, kay len kek bakrengro hi.”

¹⁸ Oun o baro Devel penas ap o Moseste: “Le o Yosua pash toute, koleskro dad o Noun hi. O Yosua hi i morsh, ap koleste miro dourho čiddo hi. Oun čip tire vasta ap leste,

¹⁹ oun an les glan o rashayeste Elazar oun glan i tsele Israelitarya. Oun pen lenge halauterenge, te hi yob kova, kay pal toute lengro ray vell.

²⁰ Oun de les tiro čačo vast, te shounenn i tsele Israelitarya ap leste.

²¹ Oun an tsirya, kay djinell lo gar, hoy te krell, hounte vell lo glan o rashayeste Elazar. Kova hounte poučell mandar oun hounte vitsrell kol Debleskre barra, te hatsell lo vin, hoy me, o baro Devel, an kava koova kamau. Yaake te sikrell o Elazar o Yosueske oun i tsele Israelenge, hoy te krenn le.”

²² O Mose kras yaake har leske o baro Devel penas, oun las o Yosua, oun moukas les glan o rashayeste Elazar te djal oun glan kol tsele Israelitarya,

²³ oun čivas peskre vasta ap leste, oun čivas les an peskri boudi dren, yaake har o baro Devel leske kova penas.