4. Mose 25 - O Debleskro Lab 2024 (Sinte-Manouche)

I Israelitarya nashenn o rhorheno debles Baal-Peor palla

¹ Oun i Israelitaryen his pengre plarhtene khera pash o foro Shittim. Kote moukan pen i morsha dren kol čentsa dran o them Moab.

² Kolla kaman, te venn i Israelitarya lentsa, te anenn yon firhen pengre deblenge. Oun i Israelitarya van lentsa oun rhan ko massestar oun mangan kolengre deblen an.

³ Yaake nashas o Israel o rhorheno debleske, o Baal-Peor, palla. Koy vas o baro Debleskri rholi pral o Israel.

⁴ Oun yob penas ap o Moseste: “Le kol tsele pralstunen pral i Israelitarya oun pande len glan mande pre, mashkral o dives, te dikell len hakeno. Palle lau miri bari rholi i menshendar Israel krik!”

⁵ Oun o Mose penas ap kol Israeleskre čačepangre: “Denn moulo hakeno peskre menshen, kay nashan o Baal-Peor palla!”

⁶ Oun i tsele Israelitarya his čiddo o ropah glan o Debleskro plarhteno kheer. Koy anas i morsh dran Israel i Midianetsa an o plarhteno kheer peskri familyatar. Oun o Mose oun i tsele israelitarya dikan kova.

⁷ Har o Pinhas, koleskro dad o Elazar hi, oun koleskro papo o rashay Aron his, kova dikas, stas lo pre, moukas i vavaren, kay kote khetne his, las i vitsepaskro čouri an o vast,

⁸ oun djas pal kol Israelitari an leskri isema, oun das an kol douyende khetne dren čourye, an ko morsheste, kay vell dran Israel oun an koy djouvel. Koy heras ko nasslepen pre, hoy ap i Israelitarya čiddo his.

⁹ Oun lestar meran 24.000 (biish-te-star-zerya) menshe.

¹⁰ Oun o baro Devel rakras o Moseha oun penas:

¹¹ “O Pinhas, koleskro dad o Elazar hi, oun koleskro papo o rashay Aron his, kova las miri rholi kol Israelendar krik. Yob his yaake rhoyedo har me homs, oun kras, te marom me gar i tsele Israelitaryen an miri rholi.

¹² Doleske pen leske: Dik, me kamau touha vin te krell, te vas mer mala,

¹³ oun doleske vess tou oun tire čave pal toute hako tsireske mire rashaya. Tiro dji rhačas tiro Debleske oun tou kral, te vas kol Israelenge i doosh krik lino.”

¹⁴ Ko morsh dran Israel, kay vas moulo dino khetne koy Midianetsa, kharas Simri, leskro dad his o Salu. Kova his i pralstouno i menshendar Simeon.

¹⁵ Koy djouvel dran Midian, kay ninna moulo dino vas, kharas Kosbi. Lakro dad his o Sur. Kova his o pralstouno i bari familyatar mank kol Midianarya.

¹⁶ Oun o baro Devel rakras o Moseha oun penas:

¹⁷ “Djan ap i Midianarya oun marenn len!

^18-19 Yon anan t'men an i bibarht, har anan le t'men yaake dour, te mangan o Baal-Peor an. Oun yon anan t'men an i bibarht lengri phenyah Kosbi, kolakro dad i pralstouno pral kol Midianarya his. Koya vas moulo dino ap ko dives, kay vas ko nasslepen pral t'mende pash i berga Peor.”