4. Mose 23 - O Debleskro Lab 2024 (Sinte-Manouche)

¹ O Bileam penas ap o Balak: “Mouk kate ap efta platse barra pre te čivell, kay nay rhačrau firhen o Debleske, oun an mange efta terne gourma oun efta bakre!”

² O Balak kras yaake har o Bileam penas. Oun hake douy, o Balak oun o Bileam, rhačran o Debleske ap haki rhačepaskri yek terno gouroum oun yek bakro.

³ Oun o Bileam penas ap o Balak: “Dja pash ko firho, hoy rhačreh o Debleske. Me kamau doureder te djal. Nay vell, te moukell pes o baro Devel glan mande te dikell. Palle kamau touke te penell, hoy yob mande sikrella.” Oun yob djas ap i berga, kay hi kek veesh.

⁴ Oun o Devel moukas pes glan o Bileam te dikell. Kova penas ap leste: “Efta rhačepangre krom me, oun ap haki rhačepaskri rhačrom i terno gouroum oun i bakro.”

⁵ O baro Devel čivas o Bileameske o lab an o mouy oun penas: “Dja pale pale pash o Balak oun pen yaake!”

⁶ Oun har yob pash o Balak vas, his yob pash ko firho tardo, hoy rhačras yob o Debleske. Oun pash leste his kol tsele pralstoune pral i Moabarya.

⁷ Koy penas o Bileam kal laba: O Balak, ko baro ray pral i Moabarya, moukas man te anell dran o them Aram, dran kol berge, kay o kham pre djala. Oun yob penas ap mande: Am ap miri rig, oun rake i bibarht pral o Yakobeskre menshende vin! Ava, am oun praase i Israeleskre menshen!

⁸ Har nay rakrau me i bibarht vin pral kolende, ap kolende o baro Devel kek bibarht čivella? Har nay praasau me yekes, koles o baro Devel gar praasella?

⁹ Pral ap i berga hom tardo, oun dikau tele ap kol menshende. Yon hi menshe, kay djivenn penge, oun djinenn, kay yon gar hi har i vavar menshe.

¹⁰ Kek djinell, har boud menshe o Yakobeskre menshe hi. Ava, kek nay hatsell vin, har boud zerya i Israelitarya hi? Me kamau, te merap yaake har yek lendar, kol čače menshendar. Miro merepen mou vell har lengro merepen!

¹¹ Koy penas o Balak ap o Bileam: “Hoy kre tou mantsa? Me moukom tout kate te anell, te rakress i bibarht vin pral kolende, kay man pre rhana. Tou rakreh i barht pral lende vin.”

¹² O Bileam penas: “Rikrap me gar kova dren oun rakrap, hoy o baro Devel mange an o mouy čivas?”

O Bileam rakrell o douyto kopo i barht pral o Israel vin

¹³ O Balak penas ap leste: “Am mantsa ap i vavar platsa, kay dikeh i tsele menshen oun gar i tikno kotar lendar har kate! Oun kote rake i bibarht vin pral o Israel!”

¹⁴ Oun yob anas les pash i phoub, hoy kharella dour dikepen, ap koy berga Pisga, oun kras efta rhačepangre, oun rhačras ap haki rhačepaskri o Debleske i terno gouroum oun i bakro.

¹⁵ Oun o Bileam penas ap o Balak: “Dja pash tiro firho, hoy rhačreh o Debleske! Me kamau doureder te djal, te vap khetne o Debleha.”

¹⁶ Oun o baro Devel vas pash o Bileam, oun čivas leske o lab an o mouy, oun penas: “Dja pale pash o Balak oun pen yaake.”

¹⁷ Oun har yob pash leste vas, his yob pash ko firho tardo, hoy rhačrell yob o Debleske. Oun kol tsele pralstoune pral kol Moabarya his pash leste tardo. Oun o Balak poučas lestar: “Hoy penas o baro Devel?”

¹⁸ Koy penas o Bileam kal laba ap leste: Tou, o Balak, koleskro dad o Sippor hi, ste pre, oun shoun! Mouk kova an tiro shero dren te djal, hoy me penau!

¹⁹ O Devel hi gar i mensho, kay rhorhella, vitar gar i mensheskro čavo, koles khaytell, hoy yob kras. Penell yob čomone, hoy yob gar krella? Penell yob kova, kay rikrell yob gar?

²⁰ Shoun, yob penas mange te rakrap i barht pral kol menshende vin. Yob čivas i barht pral lende. Oun me nay krau či vavares.

²¹ Me dikau kek bibarht ap o Yakob oun kek čilačepen ap o Israel. O baro Devel hi lengro Devel oun hi pash lende. Yob hi lengro baro ray, koleske givenn le i barhtyatar.

²² O Devel las len dran o them Egiptia vin, oun kourell pes lenge har i divyo gouroum.

²³ Koy hi kek dourkepen, hoy rakreh nay vin pral o Israel, vitar kek bengeskro koova, hoy nay krals tou o Yakobeskre menshentsa. Pral lende vell penlo: Dikenn, havo baro koova o Devel lenge kras!

²⁴ Kay natsyona hi har i terni bari margodja, oun vell zorelo har i bari margodja, hoy čivell pes gar tele, bis te rhas li pre, hoy yoy maras, oun piyas ko rat kolendar, hoy yoy moulo das.

²⁵ Koy penas o Balak ap o Bileam: “Te rakreh tou gar i bibarht vin pral lende, hounte rakress tou vitar gar i barht vin pral lende!”

²⁶ O Bileam penas ap leste: “Penom me touke gar: Lauter, hoy o baro Devel penella, kova rakrau me.”

O Bileam rakrell o triinto kopo i barht vin pral o Israel

²⁷ O Balak penas ap leste: “Am kay! Me kamau tout ap i vavar platsa te anell. Nay vell yaake, kay hi kova mishto glan o Debleskre yaka, kay tou kote pral lende i bibarht vin rakreh.”

²⁸ Oun o Balak anas les pash i berga Peor, kay nay dikas lo tele ap koy telstouno them pash o pani Yordan.

²⁹ Oun o Bileam penas ap o Balak: “Kre mange kate efta rhačepangre, oun an mange kate efta terne gourma oun efta bakre!”

³⁰ O Balak kras, har o Bileam penas, oun rhačras ap haki rhačepaskri yek terno gouroum oun yek bakro.