4. Mose 22 - O Debleskro Lab 2024 (Sinte-Manouche)

O baro ray Balak kamell, te rakrell o Bileam i bibarht vin pral i menshende Israel

¹ Pal kova djan i Israelitarya doureder, oun djivan an ko telstouno them pash o pani Yordan, kay i Moabarya djivan, ap i vavar rig o forestar Yericho.

² Oun o Balak, koleskro dad o Sippor hi, dikas halauter, hoy o Israel ap kol Amorarya kras.

³ Oun kol Moabaryen his bari daar kol menshendar Israel, kay yaake boud his. Oun kol Moabarya trashan lendar.

⁴ Oun yon penan ap kol phourende mank kol Midianarya: “Kanna rhan kol tsele menshe halauter pre, hoy troul mende hi, har i groumni koy zenlepen ap i phoub pre rhala.” O Balak his an ko tsiro o baro ray pral i Moabarya.

⁵ Oun yob bičras morshen pash o Bileam, koleskro dad o Beor hi. O Bileam djivas mank peskre menshende an o foro Petor, kay pash ko pani Eufrat čiddo hi. O baro ray moukas leske te penell: “Am pash mande! I bari natsyona djas dran o them Egiptia vin oun hi kate an o tselo them. Kal menshe čivan pengre plarhtene khera pre ap i vavar rig mandar.

⁶ Oun yon hi zorleder har mer. Am kanna ap miri rig! Rake i bibarht vin pral kal menshende! Nay vell yaake, kay marau len, oun tradau len dran kava them vin. Me djinau: Pral koneste tou rakreh i barht vin, ap koleste hi i barht čiddo. Oun pral koneste tou rakreh i bibarht vin, ap koleste hi i bibarht čiddo.”

⁷ Oun i phoureder kol menshendar Moab oun Midian djan khetne pash o Bileam. Oun love his an lengre vasta o dourkepaske. Oun yon van pash leste, oun penan leske kol laba, hoy o Balak penas.

⁸ Oun o Bileam penas ap lende: “Ačenn kay pral i rati! Yaake kamau me t'menge te penell, har o baro Devel mange kova penella!” Koy ačan kol pralstoune pral i Moabarya pash o Bileam.

⁹ Oun o baro Devel vas pash o Bileam, oun penas: “Koon hi kol menshe, kay pash toute hi?”

¹⁰ O Bileam penas ap o baro Debleste: “O Balak, koleskro dad o Sippor hi, ko baro ray pral kol Moabarya bičras len pash mande oun moukas mange te penell:

¹¹ I bari natsyona vas dran o them Egiptia kate, oun hi an o tselo them. Am ap miri rig oun rake i bibarht vin pral kal menshende! Nashte vell yaake, kay kourau man lentsa, oun tradau len.”

¹² O Devel penas ap o Bileam: “Ma dja lentsa! Ma rake i bibarht pral kol menshende vin! Miri barht oun zoor hi ap lende čiddo.”

¹³ Koy stas o Bileam taysarlake pre, oun penas ap kol pralstunende, kolen o Balak bičras: “Djan an t'maro them pale! O baro Devel kamell gar, te djap me t'mentsa.”

¹⁴ Oun kol pralstoune pral kol Moabarya djan pale, oun van pash o Balak, oun penan: “O Bileam kamas gar mentsa te djal.”

¹⁵ Koy bičras o Balak boudeder oun an-dikleder pralstunen har kolla his, pash o Bileam.

¹⁶ Har kolla pash leste van, penan le ap leste: “Yaake moukell touke te penell o Balak, koleskro dad o Sippor hi: Mouk touke či an o drom te čivell, te vess pash mande!

¹⁷ Me kamau touke bravlepen te dell. Oun hoy tou mange peneh, kamau me te krell. Am ap miri rig oun rake i bibarht vin pral kal menshende!”

¹⁸ O Bileam penas ap kolende, kay bičras o Balak: “Ninna te dell man o Balak peskro kheer pherdo roup oun sonakay, nay čivau me gar i lab ap i rig, hoy vell o baro Deblestar, kay miro Devel hi – gar an i tikno koova, vitar gar an o baro koova.

¹⁹ Ačenn ninna t'mer kay rati pash mande, te djinap me, hoy o baro Devel mantsa rakrella!”

²⁰ Koy vas o baro Devel an i rati pash o Bileam, oun penas ap leste: “Van kol morsha, te denn yon tout gole, te djas lentsa, palle dja lentsa!”

O Bileameskri bourika rakrell

²¹ Koy stas o Bileam taysarlake pre, oun čivas i ledertikri plarhta ap peskri bourika oun djas kol pralstunentsa pral kol Moabarya.

²² Koy vas o Devel rhoyedo koy pral, kay yob lentsa djas. Oun o bolepaskro o baro Deblestar djas leske an o drom, te rikrell lo les pale. Oun o Bileam his beshdo ap peskri bourika. Oun douy boudepangre djan leha.

²³ Oun koy bourika dikas o baro Debleskro bolepaskro ap o drom tardo i rhareha an o vast. Oun koy bourika djas o dromestar tele, oun djas ap i kotar phoub. O Bileam das lat, te anell yob lat pale ap ko drom.

²⁴ Koy vas o baro Debleskro bolepaskro ap ko drom mashkral kol drakengre berge, kay ap kol douy rigya massurya his.

²⁵ Oun har koy bourika o baro Debleskro bolepaskres dikas, djas yoy yaake dour ap i rig, te vas o Bileameskri heri doukedo ap kol massouri. Oun yob das lat o douyto kopo.

²⁶ Koy djas o baro Debleskro bolepaskro doureder, oun vas pale kote ap o drom, kay gar bourhlo his, kay kek platsa his, te djas yob nay čačes, vitar gar serves.

²⁷ Oun har koy bourika o baro Debleskro bolepaskres dikas, čivas pes li tele. Oun o Bileam his pre-beshdo. Koy tapras o Bileames i rholi. Oun yob das koy bourika i kashteha.

²⁸ Koy kras o baro Devel koy bourikake o mouy pre. Oun yoy penas ap o Bileam: “Hoy krom me tout, kay dal tou man triin kope?”

²⁹ O Bileam penas ap i bourika: “Tou rikral man dineleske! Te vals man kanna i rharo an o vast, doms tout moulo.”

³⁰ Koy bourika penas ap o Bileam: “Hom me gar tiri bourika, kay tou beshal pre tiro tselo djipen? Krom me yaake touha glan ko tsiro?” Yob penas: “Na-a!”

³¹ Koy kras o baro Devel o Bileameske i yaka pre, kay nay dikas yob o baro Debleskro bolepaskres ap o drom tardo i rhareha an o vast. Oun o Bileam čivas pes ap peskre čanga tele oun vitsras pes ap peskro mouy.

³² Oun o baro Debleskro bolepaskro penas ap leste: “Hoske dal tou tiri bourika triin kope? Dik, me vom pash toute, te rikrap tout pale. Tiro drom, hoy tou djah, hi gar mishto an mire yaka.

³³ Oun koy bourika dikas man, oun djas peske triin kope mandar. Te djals yoy gar mandar, yaake doms me tout moulo. Oun koy bourika moukoms te djivell.”

³⁴ Koy penas o Bileam ap o baro Debleskro bolepaskro: “Me anom doosh ap mande. Me djinom gar, kay tou kamal man pale te rikrell ap o drom. Oun kanna, te hi kova touke gar mishto, yaake djau me pale pale.”

³⁵ O baro Debleskro bolepaskro penas ap leste: “Dja kol morshentsa! Ma rake vavar koova har me touke penau!” Yaake djas o Bileam kol pralstunentsa, kay o Balak bičras.

O Bileam rakrell i barht pral o Israel vin

³⁶ Har o Balak shounas, kay o Bileam vas, djas yob pash leste an o foro Ar, kay pash o pani Arnon čiddo hi, – kote kay veh an o them Moab.

³⁷ Oun penas ap leste: “Bičrom me gar morshen pash toute oun moukom tout te kharell? Hoske val tou gar pash mande? Patseh tou gar, kay me nay dau tout bravlepen?”

³⁸ Penas o Bileam ap leste: “Ake hom. Shoun, me nay rakrau či vavar har kova, hoy mange o baro Devel an o mouy čivas. Kova kokres nay rakrau me.”

³⁹ Yaake djas o Bileam o Balakeha. Oun yon van an o foro Kiryat-Houzot.

⁴⁰ Oun o Balak maras groumyen oun bakren o Debleske, oun bičras ko massestar pash o Bileam, oun pash kol pralstunende, kay pash leste his.

⁴¹ Oun taysarlakro las o Balak o Bileames peha, oun anas les pral ap i berga Bamot-Baal, te dikell yob kotar ap kol tsele menshende Israel.