4. Mose 19 - O Debleskro Lab 2024 (Sinte-Manouche)

Thopaskro pani, hoy lell o pale-čiddo koova krik

¹ Oun o baro Devel rakras o Moseha oun o Aroneha oun penas:

² Kova, hoy kanna penau, hounte krenn yaake har penau, ninna an ko tsiro, hoy vella: Pen ap kol Israelitarya, te anenn le pash toute i loli groumni, kay kek nasslepen ap late hi, oun kay boudras gar ap i harhetikri phoub, yaake rah har djivell li.

³ Oun de lat ko rashayeste Elazar. Kova hounte anell lat vin glan i plarhtene khera. Oun kote glan leskre yaka moukell lo lat te marell.

⁴ Oun ko rashay Elazar hounte lell lakro ratestar peskro goushteha, oun vitsrell kova efta kope kote ap koy rig, kay o Debleskro plarhteno kheer tardo hi.

⁵ Oun yob hounte moukell koy groumyat glan leskre yaka pre rhačrell, lakri fella oun lakro mass, ninna lakro rat oun foul.

⁶ Oun ko rashay hounte lell kasht ko roukestar, hoy kharella Ceder, ninna patria ko bourrestar, hoy kharella Hysop, ninna lolo bakrengro bal, oun vitsrell kova ap koy groumyate, hoy rhačella.

⁷ Pal kova hounte thovell lo pes oun ninna peskre koola. Oun pal kova djal lo pash i plarhtene khera oun ačell pale-čiddo bis ap i rati.

⁸ Oun ko morsh, kay rhačras koy groumyat pre, kova ninna hounte thovell pes oun peskre koola, oun ačell pale-čiddo bis ap i rati.

⁹ Oun i morsh, kay gar pale-čiddo hi, hounte lell koy yagakri čik koy groumyatar, oun čivell lat vin glan i plarhtene khera ap i djoudji platsa, te ačell kay yagakri čik kote o tselo khereske Israel, te nay krenn le latar i pani thopaske, hoy lell i pale-čiddo koova i menshendar krik.

¹⁰ Oun ko morsh, kay koy yagakri čik koy groumyatar khetne las, hounte thovell peskre koola, oun ačell pale-čiddo bis ap i rati. Kova, hoy kanna penau, ačell yaake t'menge, i Israelitarya, oun ninna i vavar menshenge, kay mank t'mende djivenna, hako tsireske:

¹¹ Koon i moulo menshes an-tapella, kova hi efta divessa pale-čiddo.

¹² Yob hounte thovell pes ap o triinto dives oun ap o eftato dives ko panyeha, hoy lell i pale-čiddo koova i menshestar krik. Palle vell lo djoudjo oun erligo. Te thovell lo pes gar yaake ap o triinto dives oun ap o eftato dives, ačell lo pale-čiddo.

¹³ Te taprell yek i moulo menshes an oun kamell pes gar yaake te thovell, palle krell lo o Debleskro kheer pale-čiddo. Oun savo mensho hounte vell infam kerdo oun nay djivell bouder gar mank i Israelitarya. Ko pani, hoy lell o pale-čiddo koova krik, vas gar ap leste vitsedo. Doleske ačell lo pale-čiddo, oun ko pale-čiddo koova ačell ap leste.

¹⁴ Kova hi hoy mer hounte kras: Te merell i mensho an peskro plarhteno kheer, hounte vell hakeno, koon an ko kheer djala, oun koon an ko kheer hi, efta divessa pale-čiddo.

¹⁵ Ninna haki piri, hako čaro oun khoro, hoy pre oun gar pandlo hi, vell pale-čiddo.

¹⁶ Ninna kova, kay tapras i menshes an, kay meras vin ap o them, hi pale-čiddo efta divessa. Kova hi ninna yaake, te vas ko moulo mensho kote temerl dino o rhareha. Ninna kova vell pale-čiddo efta divessa, koon taprell ap i mouleskre kokale, ninna kova, kay taprell ap koy phoub, kay o moulo paskedo hi, – yob vell pale-čiddo efta divessa.

¹⁷ Koleske, kay pale-čiddo hi, hounte lenn t'mer yagakri čik kol groumyatar, hoy pre rhačedo vas, čivenn kova an i piri, oun čorenn djoudjo pani pre.

¹⁸ Oun i morsh, kay gar pale-čiddo hi, hounte lell kol patria, hoy kharenna Hysop oun čivell len an ko pani oun vitsrell kova ap o plarhteno kheer oun ap kol pirya, čare oun khore, hoy koy dren hi, ninna ap hakeneste, kay an ko kheer hi. Ninna hounte vitsrell lo ko pani ap koleste, kay tapras i moules an, leskre kokale, ninna koy phoub, kay vas yob paskedo.

¹⁹ Yek, kay gar pale-čiddo hi, hounte vitsrell ko pani ap koleste, kay pale-čiddo hi ap o triinto dives oun ap o eftato dives. Oun ko pale-čiddo hounte thovell pes an ko pani oun peskre koola. Palle vell yob ap i rati djoudjo oun erligo.

²⁰ Koon vas pale-čiddo oun kamell gar, te vell lo thodo ko panyeha, kova hounte vell infam kerdo oun nay djivell bouder gar mank i Israelitarya. Yob kras o baro Debleskro kheer pale-čiddo, oun ko pani, hoy lell o pale-čiddo koova krik, vas gar ap leste vitsedo. Doleske ačell lo pale-čiddo.

²¹ Yaake vell kova pash t'mende kerdo hako tsireske. Oun ninna kova, kay vitsras ko pani ap ko pale-čiddo, hounte thovell peskre koola. Oun koon taprell ko pani an, hoy lell o pale-čiddo koova krik, kova hounte ačell pale-čiddo bis ap i rati.

²² Oun halauter, hoy ko pale-čiddo an-tapella, vell pale-čiddo. Oun koon koles an-tapella, kay pale-čiddo hi, hounte vell pale-čiddo bis ap i rati.