4. Mose 17 - O Debleskro Lab 2024 (Sinte-Manouche)

I pirya venn i sikepen

¹ Oun o baro Devel rakras o Moseha oun penas:

^2-3 “Pen ap o Aroneskro čaveste, o rashayeste Elazar, te lell yob kol pirya dran i yag, oun vitsrell koy yag dour krik! Kol čilače, kay meran, anan kal pirya glan o baro Debleste. Doleske hi kal pirya o Debleskro oun hounte venn an o Debleskro kheer. Denn kol pirya bourhlo, te venn sane bourhle sasterne patria dran lende! Oun kolen denn troul o Debleskri rhačepaskri, te venn le i sikepen, te bistrenn i Israelitarya gar, hoy djas!”

⁴ Oun o rashay Elazar las kol sasterne pirya, hoy anan kolla, kay his djides rhačedo, oun das i pirya bourhlo, te venn le troul o Debleskri rhačepaskri dino,

⁵ yaake har penas o baro Devel kova o Moseske. Kol sane sasterne patria his i sikepen, te denn kol Israelitarya yak, te vell kek morsh, kay gar o Aroneskre menshendar hi, oun anell soungepaskro koova glan o baro Debleste, te djal leske gar yaake har o Koraheske oun kolenge, kay pash leste his.

I Israelitarya čingrenn ap o Mose oun ap o Aron

⁶ O vavar taysarlakro his kol tsele Israelitarya rhoyedo ap o Moseste oun ap o Aroneste, oun penan: “T'mer kran o baro Debleskre menshen moulo.”

⁷ Oun har kol tsele menshe troul o Mose oun o Aron tardo his, dikan yon pash o Debleskro plarhteno kheer. Oun ap yek kopo vas koy folka pral o kheer. Oun o baro Debleskro raylepen vas diklo.

⁸ Oun o Mose oun o Aron djan glan o Debleskro plarhteno kheer.

⁹ Oun o baro Devel rakras o Moseha oun penas:

¹⁰ “Djan vin kol menshendar. Me kamau len ap yek kopo te marell.” Oun kol douy vitsran pen ap pengro mouy.

¹¹ Oun o Mose penas ap o Aroneste: “Le koy piri, dja pash o Debleskri rhačepaskri oun čip yag lestar an koy piri, oun čip soungepaskro koova koy pre, oun dja sik pash i tsele menshende, oun rhače ko soungepaskro koova, te vell lengri doosh krik lino! O baro Debleskri rholi vas ap lende, oun lengri phagi hi kay.”

¹² Oun o Aron kras yaake, har o Mose leske penas, oun nashas mashkral i tsele menshende oun dikas, kay boud menshe moulo his. Koy rhačras yob soungepaskro koova, te dikell o Devel bouder gar ap i menshengri doosh.

¹³ Oun yob his tardo mashkral kol moulende oun kol djidende. Koy djas koy phagi krik.

¹⁴ Kolla, kay meran ap koy phagi, his 14.700 (deesh-te-star-zerya-efta-sheel) menshe. Mank lende his gar kolla, kay meran khetne o Koraheha.

¹⁵ Oun o Aron vas pale pash o Moseste pash o voudar glan o Debleskro kheer. Koy phagi his krik.

O Aroneskro kasht

¹⁶ Oun o baro Devel rakras o Moseha oun penas:

¹⁷ “Rake i Israelentsa oun le lendar deesh-te-douy lengste kashta. Le len kol pralstunendar pral kol deesh-te-douy bare familye, kay venna kol deesh-te-douy Yakobeskre čavendar: hako pralstunestar yek kasht. Oun čin hakeneskro lab koy dren!

¹⁸ O Aroneskro lab hounte činess an ko kasht, hoy o khereske Levi hi. Hako pralstuneske hounte vell yek kasht koy.

¹⁹ Oun čip kol kashta an o Debleskro plarhteno kheer glan ko morhton, kay o Debleskre deesh laba dren hi, kote, kay vau khetne t'mentsa.

²⁰ Palle sikrau i Israelende, kones me vi-rodau: Koleskro kasht vell zenelo. Yaake krau, te venn yon bouder gar rhoyedo ap t'mende.”

²¹ Oun o Mose rakras kol menshentsa Israel. Oun lengre tsele pralstoune dan les deesh-te-douy kashta. Hako pralstouno pral i bari familya das les yek kasht. Oun o Aroneskro kasht his ninna mank kol kashta.

²² Oun o Mose čivas kol kashta glan o baro Debleste tele an o Debleskro kheer, kay i deesh Debleskre deesh laba dren hi.

²³ Ap o vavar dives, har o Mose an o Debleskro kheer djas, dikas yob, kay van patria vin dran o Aroneskro kasht, hoy o khereske Levi his. Ninna bloume djan pre, oun roukengre his ap ko kasht.

²⁴ Oun o Mose hidjras kol kashta halauter vin o baro Deblestar, pash kol tsele Israelitarya, te dikenn yon kova. Oun hakeno las peskro kasht.

²⁵ O baro Devel penas ap o Moseste: “Hidje o Aroneskro kasht pale glan ko morhton, kay o Debleskre deesh laba dren hi, te ačell ko kasht koy, te dikenn les kolla, kay kaman gar te shounell, oun yon te čingrenn gar bouder ap mande oun merenn.”

²⁶ Oun o Mose kras, har o baro Devel kova penas.

I Israelitarya darenn, te merenn le halauter

^27-28 Oun i Israelitarya penan ap o Moseste: “Dik kay, koon pash o Debleskro kheer vella, kova hounte merella. Sik vella, kay merah halauter oun kek mendar ačell pral. Kameh, te djas mer halauter tele?”