4. Mose 16 - O Debleskro Lab 2024 (Sinte-Manouche)

O Korah peskre morshentsa hadell pes ap o Moseste oun merell

^1-2 Oun o Korah, – leskro dad his o Yizhar, – i Levitari kolendar, kay van pal o Kohat, ko Korah vas rhoyedo ap o Moseste. Khetne leha his morsha, kay van dran o kheer Ruben: o Datan oun o Abiram, kolengro dad o Eliab his, oun o On, koleskro dad o Pelet his. Pash lende his ninna 250 (douy-sheel-te-paash-sheel) vavar Israelitarya, kay pralstoune his mank i Israelitarya, vi-rodede oun an-dikle morsha.

³ Oun yon halauter van khetne pash o Mose oun o Aron, čingran ap lende oun penan: “T'mer krenn, har te vans bareder har mer vavar! O tselo kheer Israel hi o Debleskre menshe. Oun o baro Devel hi mashkral lende. Hoske hadenn t'mer t'men pral o baro Debleskre menshende?”

⁴ Har o Mose kova shounas, vitsras lo pes ap peskro mouy,

⁵ oun penas ap o Korah oun ap kolende, kay pash leste his: “Taysar penell o baro Devel, koon leskre menshe hi, kones yob peske vi-rodas, oun koon nay vell pash leste. Oun kones yob vin rodella, kova nay vell pash leste.

⁶ Taysarlakro lenn t'menge pirya, tou o Korah oun kol tsele morsha, kay pash toute hi!

⁷ Oun krenn yag koy dren, oun čivenn soungepaskro koova koy pre, oun anenn kova glan o baro Debleste! Kones koy o baro Devel vi-rodella, kova hi leskro. T'mer, i Levitarya, han kolla, kay krenn, har te vans i bareder!”

⁸ Oun o Mose penas ap o Korah: “Shounenn, t'mer Levitarya!

⁹ Hi kova t'menge gar doha, kay o Israeleskro Devel t'men vin rodas dran i tsele Israelitarya, te venn pash leste, te krenn t'mari boudi ap o Debleskro kheer? T'mer nay venn i tsele menshenge Israel koy.

¹⁰ Yob moukas tout, o Korah, oun tire tsele phralen, kol Levitarya, pash leste te vell. Oun t'mer kamenn kanna ninna rashay te vell!

¹¹ Tou oun tire tsele menshe čivan t'men khetne, te hadenn t'men pral o baro Debleste. Kova hi gar o Aron, pral koleste hadan t'men.”

¹² Oun o Mose moukas kol douy morshen, o Datan oun o Abiram, pash peste te kharell. Kolengro dad hi o Eliab. Yon penan: “Mer vah gar.

¹³ Hi kova touke gar doha, kay lal men dran ko them, kay hi boud thoud oun gvin, oun moukeh men te merell an o moulo tato them? Kameh tou ninna ray pral mende te vell?

¹⁴ Hi kava them i them, kay hi boud thoud oun gvin? Oun dal tou men i harhetikri phoub oun drakengre themma, kay menge hi? Ma pande kol menshen i yaka! Mer vah gar.”

¹⁵ Koy vas o Mose rhoyedo, oun penas ap o baro Debleste: “Ma dik lačes ap kova, hoy yon tout denna! Me lom gar i bourika lendar, oun krom len kek čilačepen.”

¹⁶ Oun o Mose penas ap o Korah: “Tou oun tire tsele menshe hounte venn taysar glan o baro Debleste, tou oun yon oun o Aron!

¹⁷ Oun hakeno lell peskri piri, oun čivell soungepaskro koova dren, oun vell glan o baro Debleste, hakeno peskri piryah, douy-sheel oun paash-sheel pirya, – ninna tou oun o Aron, hakeno peskri piryah.”

¹⁸ Oun hakeno las peskri piri, oun čivas yag koy dren, oun ko soungepaskro koova koy pre. Oun yon djan pash o voudar glan o Debleskro kheer, ninna o Mose oun o Aron.

¹⁹ Oun o Korah las i tsele menshen khetne ap peskri rig, oun vas lentsa glan o Debleskro kheer pash o voudar. Koy vas o baro Debleskro raylepen glan i tsele menshende.

²⁰ Oun o baro Devel rakras o Moseha oun o Aroneha, oun penas:

²¹ “Djan kol menshendar krik, te marap len sik.”

²² Kol douy moukan pen ap pengro mouy te perell, oun penan: “Ah Devel, tou hal o Devel, kay das hakenes o djipen! Te kras yek morsh i čilačo koova, kameh tou doleske tiri rholi pral i tsele menshende te čivell?”

²³ Oun o baro Devel rakras o Moseha, oun penas:

²⁴ “Pen ap i tsele menshende: Djan halauter krik, kay djivenn troul koy platsa, kay djivell o Korah, o Datan, oun o Abiram!”

²⁵ O Mose stas pre, oun djas pash o Datan oun o Abiram, oun kol phoureder mank i Israelitarya djan leske palla.

²⁶ Oun yob penas ap i tsele menshende: “Djan krik kol plarhtene kherendar kol menshendar, kay shounenn gar ap o Debleste! Oun taprenn ap či, hoy len hi, te merenn t'mer gar ap ko tselo čilačo koova, hoy yon kran!”

²⁷ Oun yon djan penge oun moukan koy platsa, kay djivas o Korah oun o Datan oun o Abiram. O Datan oun o Abiram djan vin dran lengre plarhtene khera oun his tardo glan o voudar pengre djouvyentsa, čaventsa, oun čavengre čaventsa.

²⁸ Oun o Mose penas: “Koy pre hounte dikenn t'mer, kay bičras man o baro Devel, te krap ko tselo koova, oun kay me kova gar mandar krau.

²⁹ Yon te merenna yaake har i tsele menshe merenna, palle bičras man o baro Devel gar.

³⁰ Te krell o baro Devel čomone neves, kay i phoub krell peskro mouy pre, oun tserdell len dren lauterentsa, hoy len hi, yaake te djan yon djides tele an o moulengro them, palle djinenn t'mer, kay kalla morsha pral o baro Debleste djoungeles rakran.”

³¹ Oun pal kova, har yob kol tsele laba penas, djas koy phoub tel lende pre,

³² oun kras peskro mouy pre, oun tserdas len tele pengre familyentsa oun kol tsele menshentsa, kay pash o Korah his, ninna halauter, hoy len hi.

³³ Oun yon djan djides tele an o moulengro them lauterentsa, hoy len hi. Oun i phoub čakras len. Oun yon meran mashkral vin dran kol tsele menshende.

³⁴ Har i vavar Israelitarya, kay troul lende his, shounan, har yon gole dan, nashan le penge. Yon trashan, te rhal len i phoub ninna pre.

O baro Devel bičrell i yag

³⁵ Oun o baro Devel bičras yag, kay rhas kol 250 (douy-sheel-te-paash-sheel) morshen pre, kay anan ko soungepaskro koova o Debleske.