4. Mose 15 - O Debleskro Lab 2024 (Sinte-Manouche)

Har te anenn le firhen oun vavar koova rhačepaske o Debleske

¹ Oun o baro Devel rakras o Moseha, oun penas:

² Rake ap kol Israelitarya, oun pen lenge: Te venn t'mer an ko them, hoy dau me t'mende, te djivenn koy,

^3-4 oun t'mer anenn i firhes t'mare groumyendar oun bakrendar rhačepaske o baro Debleske, hounte denn t'mer i rhapen koy pashel. Krenn kova pash hako firho, hoy mange anenn: pash ko firho, hoy vell tseles rhačedo mange; pash ko firho, hoy rhan t'mer khetne glan mande; pash ko firho, koleha i mensho sikrell, te das lo pes sovel, te dell lo man čomone; pash ko firho, hoy kamell i mensho pestar mande te dell; pash ko firho, hoy rhačrenn t'mer mange ap t'mare bare divessa. O lačo soungepen kol firhendar hi mishto mange. Ko rhapen, hoy anenn pashel, hounte vell yek kilogrammi lačo yarro, oun yek litari djet. Kova vell halauter khetne kerdo.

⁵ Anenn ninna mool koy pashel! Pash hako terno bakro, hoy vell tseles rhačedo, čorenn yek litari mool, ninna pash hako terno bakro, hoy rhan t'mer khetne glan o Debleste.

⁶ Pash hako baro bakro, hoy rhačreh tou o Debleske, dess tou douy kilogramme lačo yarro, kay yek-te-paash litarya djet dren hi.

⁷ Ninna čoress tou yek-te-paash litarya mool koy pashel. Kova hi i rhapen oun i pipen, hoy soungella mishto o baro Debleske.

⁸ Te kameh tou o Debleske i groumni te anell, nay vell yek, hoy vell leske tseles rhačedo, nay vell yek, kolah tou sikreh, te dal tout sovel, te deh čomone o Debleste; nay vell yek, hoy deh, te rhan t'mer o mass khetne glan o baro Debleste,

⁹ palle hounte dess koy pashel triin kilogramme lačo yarro, kay douy litarya djet dren hi.

¹⁰ Ninna čoress tou douy litarya mool koy pashel. Te vell kova halauter rhačedo o baro Debleske, djal i soungepen pre, hoy soungella mishto o baro Debleske.

¹¹ Yaake hounte kress tou, te aneh mange i groumni, i baro morsh bakro, i terno bakro, ninna pash i bouzni.

¹² Pash hako firheste, hoy o Debleske anlo vell, hounte vell ninna yarro oun mool anlo, yaake boud har glan-činlo hi.

¹³ Hako Israelitari, kay anell čomone rhačepaske o baro Debleske, hoy leske shoukar soungella, hounte krell pal kal laba.

¹⁴ Oun te djivell i vi-themari mashkral t'mende, ninna pash t'mare čavende, hoy pal t'mende venna, oun yob kamell o baro Debleske čomone te rhačrell, hoy leske shoukar soungella, palle hounte krell yob yaake har t'mer ninna krenna.

¹⁵ Kal laba, hoy penenn t'menge, hoy te krenn an kava koova hi t'menge lauterenge: t'menge, kol Israelitarya, oun ninna kol vavar menshenge, kay mank t'mende djivenna. Kol laba ačenna hako tsiro t'mare čavenge, hoy pal t'mende venna: Glan o baro Debleste hi o vi-themari yaake har t'mer han.

¹⁶ I emlige čačepaskre laba oun o emligo čačepen hi t'menge oun kolenge, kay hi vi-themarya mank t'mende.

O ersto maro hi o Debleske

¹⁷ Oun o baro Devel rakras o Moseha oun penas:

¹⁸ Rake kol tsele menshentsa, oun pen ap lende: Te venn t'mer an ko them, kay me t'men anau,

¹⁹ oun t'mer rhan ko maro dran ko them, palle hounte anenn t'mer o baro Debleske čomone:

²⁰ Dran ko ersto yarro hounte pekenn t'mer leske i merkli.

²¹ Ninna hounte denn t'mer leste ko ersto yarro. Ko lab ačella hako tsireske.

Hoy te krenn le, te anenn le i doosh ap pende

²² Oun te kran t'mer yek kol labendar gar, hoy o baro Devel o Moseske penas, oun djinan gar, kay hounte krans kova,

²³ čomone lauterestar, hoy o baro Devel o Moseske penas, hoy t'mer hounte krenna, palle hounte denn t'mer o baro Debleske i firho, te vell i doosh krik lino.

²⁴ Te kran i tsele Israelitarya čomone, hoy i doosh hi, oun djinan gar, kay yon hounte krans kova gar, palle hounte anenn i tsele menshe i terno gouroum rhačepaske o baro Debleske, te soungell o soungepen, hoy pre djal ko firhestar, mishto o baro Debleske. Koy pashel denn le ninna i rhapen dran yarro oun koy mool, yaake boud har čačo hi, ninna i morsh bouzni, te vell i doosh krik lino.

²⁵ Oun yaake krell o rashay i tsele menshenge Israel, te vell lauter pale mishto mank lende oun o Debleste. Oun koy doosh vell lendar krik lino, – koy doosh, kolatar yon gar djinan, kay kaya i doosh hi, oun kolake yon firhen anan oun rhapen rhačepaske o baro Debleske.

²⁶ Ava, kay doosh, hoy ap i tsele menshende Israel čiddo hi, vell lendar krik lino, ninna kolendar, kay vi-themarya hi mank t'mende.

²⁷ Te anell yek i doosh ap peste oun djinas gar, kay kaya i doosh his, palle hounte dell yob yek bouzni, kay yek bersh phouro hi, te vell leskri doosh krik lino.

²⁸ Oun ko rashay rhačrell lat glan o baro Debleste, te vell lauter pale mishto mank o Debleste oun koleste, kay djinas gar, kay yob čomone čilačes kras. Oun leskri doosh vell lestar krik lino.

²⁹ Oun yaake hounte vell kova hakeneske, kay anas i doosh ap peste oun djinas gar, kay kaya i doosh hi – nay vell i Israelitari, nay vell i vi-themari, kay mank t'mende djivell.

³⁰ Koon krell i čilačo koova, oun djinell, kova hi čilačo, ko mensho praasas o baro Debles. Savo mensho hounte vell infam oun nay djivell bouder gar mank peskre menshende. Kova hi yek, koon yob hi, – i Israelitari, – i vi-themari.

³¹ Yob shounas gar ap o baro Debleskro lab. Oun kova, hoy o baro Devel penas, kras yob gar. Doleske vell yob infam, oun leskri doosh ačell ap leste.

Hoy djas yekeha, kay boudras ap o Debleskro dives

³² Har i Israelitarya an o moulo tato them his, tapran le i morshes, kova rodas kashta khetne ap o Debleskro dives.

³³ Oun kolla, kay hatsan les koy pashel, har yob kashta pre hadas, anan les pash o Moseste oun pash o Aroneste oun glan i tsele menshende.

³⁴ Oun yon čivan les stildo, oun djinan gar, hoy te krenn leha.

³⁵ O baro Devel penas ap o Moseste: “Ko morsh hounte merella. Kol tsele menshe hounte vitsrenn les moulo i barrentsa vin glan i platsa.”

³⁶ Koy kran le yaake har o baro Devel ap o Moseste penas oun anan ko morshes vin glan i platsa oun vitsran barra ap leste, yaake te meras yob.

³⁷ Oun o baro Devel penas ap o Moseste:

³⁸ “Pen ap kol Israelitarya, te sivenn yon tella ap pengre koola khetne pandle blauete dorya. Kova hounte krenn ninna lengre čave, kay pal lende venna.

³⁹ Oun kol dorya hi koleske koy: Yaake boud kope har t'mer kolla an-dikenn, vell t'menge an o shero halauter, hoy o baro Devel penas, – kol tsele laba, hoy hounte krenn. Yaake moukenn t'men gar o Debleskro dromestar tele te anell t'mare yakendar, vitar gar shounenn t'mer ap kova, hoy an t'maro shero trouyel djal.

⁴⁰ T'menge hounte vell halauter pale an o shero, hoy me penom. Oun kova krenna! Palle han mire menshe, kolla mange kokres koy hi.

⁴¹ Me hom t'maro baro Devel, kay las t'men dran ko them Egiptia vin, te vap me t'maro Devel. Oun me, o baro Devel, hom t'maro Devel.”