4. Mose 13 - O Debleskro Lab 2024 (Sinte-Manouche)

O Mose bičrell 12 morshen an o them Kanaan, te hatsenn yon vin, har zorelo o them hi

¹ Oun o baro Devel rakras o Moseha oun penas:

² “Biče morshen, te hatsenn le vin, har zorelo ko them Kanaan hi! Kava them kamau me i Israelitaryen te dell. Biče yek morshes dran haki bari familya, hoy vell kol deesh-te-douy Yakobeskre čavendar! Biče kolen, kay hi i pralstoune pral pengre menshende!”

³ Oun o Mose kras yaake har o baro Devel leske penas, oun rodas deesh-te-douy morshen vin, kay pralstoune hi mank i Israelitarya, oun bičras len dran o moulo tato them Paran an o them Kanaan.

⁴ Oun lengre laba hi: Shamoua, koleskro dad o Zakour hi, dran o kheer Ruben.

⁵ O Shafat, koleskro dad o Hori hi, dran o kheer Simeon.

⁶ O Kaleb, koleskro dad o Yefunne hi, dran o kheer Youda.

⁷ O Yigal, koleskro dad o Yosef hi, dran o kheer Issakar.

⁸ O Hoshea, koleskro dad o Noun hi, dran o kheer Efrayim.

⁹ O Palti, koleskro dad o Rafou hi, dran o kheer Benyamin.

¹⁰ O Gaddiel, koleskro dad o Sodi hi, dran o kheer Zabulon.

¹¹ O Gaddi, koleskro dad o Zouzi hi, dran o kheer Manasse, koleskro dad o Yosef hi.

¹² O Ammiel, koleskro dad o Gemalli hi, dran o kheer Dan.

¹³ O Setour, koleskro dad o Mikael hi, dran o kheer Asser.

¹⁴ O Nabi, koleskro dad o Vofsi hi, dran o kheer Naftali.

¹⁵ O Gehouel, koleskro dad o Maki hi, dran o kheer Gad.

¹⁶ Kalla hi i laba kol morshendar, kolen o Mose bičras, te hatsenn le vin, har ko them hi. Oun o Mose das o Hoshea o lab Yosua. Koleskro dad his o Noun.

¹⁷ Oun o Mose bičras len, te hatsenn le vin har ko them Kanaan hi. Oun yob penas ap lende: “Djan koy pre an o moulo tato them Negev, oun palle djan ap o pralstouno them!

¹⁸ Oun dikenn t'men an ko them trouyel, har kova hi, oun kitse menshe kote djivenn, oun har zorelo yon hi.

¹⁹ Dikenn, har nay djivenn le kote: mishto? – gar mishto? Dikenn ninna, har lengre forya hi! Djivenn i menshe an plarhtene khera khetne? – Djivenn le an barrengre khera an forya?

²⁰ Dikenn ninna, havi phoub koy hi! Hi li mishto, te nay vell djob kote bares? Hi rouka kote tardo oun have? Ma trashenn, te anenn menge kolestar, hoy an ko them bares vas!” Kova his an ko tsiro, kay i molengre drake mishto his.

²¹ Oun yon djan koy, oun dikan, har ko them hi an o moulo tato them Tsin oun doureder pre, o tselo drom bis pash o foro Rehob pash Lebo-Hamat.

²² Oun yon djan an o them Negev, oun van bis pash o foro Hebron. Kote djivas o Ahiman oun o Sheshay oun o Talmay, kolengro dad o Anak his. O foro Hebron vas nevo kerdo efta bersha glan o foro Soan an o them Egiptia.

²³ Oun yon van pash o pani Eshkol, oun činan kote i kasht molengre drake tele, oun hidjran kova douyentsa ap i hidjepaskro kasht, yaake pharo hi lo. Koy pashel anan le ninna granatikre phabya oun fayge.

²⁴ Koy platsa kharan le tala Eshkol pal kol drake, hoy kol Israelitarya kote tele činan.

Kol 12 morsha venn pale pale oun penenn, hoy dikan le

²⁵ Oun pal star-deesh divessa, har yon pen an ko tselo them trouyel dikan, djan yon pale pale.

²⁶ Oun van pash o Mose oun o Aron oun pash kol tsele Israelitarya, kay ačan an o moulo tato them Paran pash i panyeskro kotar them, hoy kharella Kadesh. Oun yon penan lenge kova, hoy yon dikan, oun sikran lende kol drake, phabya oun fayge dran ko them.

²⁷ Oun yon penan: “Mer vam an ko them, kay tou bičral men. Oun čačepah an ko them hi boud thoud oun gvin. Dikenn i drake, fayge oun phabya, hoy kote bares van!

²⁸ Yek koova hi gar mishto: Kol menshe, kay djivenn kote, hi zorelo. Kol forya hi baro oun zorelo kerdo. Oun mer dikah kote ninna kol menshen, kay venn pal o Anak.

²⁹ An o them Negev djivenn i Amalekarya. An o pralstouno them djivenn i Hetarya, i Yebousarya oun i Amorarya. Pash o baro pani oun pash o pani Yordan djivenn i Kanaanitarya.”

³⁰ Har i menshe kova shounan, trashan le oun čingran ap o Moseste. Koy das o Kaleb len trad, oun penas: “Avenn, mer djah kote, oun lah ko them menge! Mer nay ham zorleder har yon.”

³¹ Kol morsha, kay djan leha, penan: “Na-a, mer nay kourah men gar kol menshentsa! Yon hi zorleder har mer.”

³² Oun yon anan djoungelo koova pre pral ko them, kay dikan le pen trouyel, oun penan ap i Israelitarya: “Ko them, kay djam trouyel, te dikas, har kova hi, rhal kolen, kay djivenn kote. Oun kol tsele menshen, kay dikam kote, hi bareder har mer.

³³ Mer dikam kote ninna i Nefilim, kay hi bare menshe. Lengro phouro dad hi o Anak. Mer hams an mare yaka har stepangre, oun yaake hams ninna an lengre yaka.”