4. Mose 12 - O Debleskro Lab 2024 (Sinte-Manouche)

I Miryam lell i djoungelo nasslepen

^1-2 Koy rakras i Miryam oun o Aron djoungeles pral o Moseste oun penan: “Kova hi gar mishto, te las yob peske i romyat, kay hi i menshendar Koush. Rakras o baro Devel kokres ap o Moseste? Rakras lo mentsa gar?” Oun o baro Devel shounas kova.

³ O Mose his i mensho, kay kras pes gar bares. Kek mensho his ap i phoub, kay his yaake har o Mose oun hadas pes gar.

⁴ Koy penas o baro Devel ap o Moseste oun ap o Aroneste oun ap i Miryam: “Djan vergel t'mer triin pash miro kheer!” Oun yon djan hake triin kote.

⁵ Oun koy vas o baro Devel tele an i folka, oun djas an ko voudar glan o Debleskro kheer, oun kharas o Aron oun i Miryam. Oun kol douy djan kote.

⁶ Oun yob penas: “Shounenn mire laba! Te bičrau me yekes pash t'mende, kay penell t'menge mire laba, sikrau leste čomone an i dikepen oun rakrau leha an sounya.

⁷ O Moseha, koles miro čačo vast hi, krau gar yaake. Leste dom miro tselo kheer an o vast.

⁸ Yaake har rakrell i mensho i vavareha, rakrau me leha, an laba, kay lo mishto hayvella oun gar an parmisse. Oun yob dikell man, o baro Debles, har hom. Hoske his t'men kek traash, te rakrenn djoungeles pral o Mose, koles miro čačo vast hi?”

⁹ Oun o baro Debleskri rholi vas pral lende. Oun yob djas krik.

¹⁰ Ninna koy folka pral o Debleskro kheer djas krik. Oun ap yek kopo vas i Miryam nasselo ap peskro mass, ko his parno har gib. Oun har rissras pes o Aron pash i Miryam oun dikas ko nasslepen ap lakro mass,

¹¹ penas yob ap o Moseste: “Miro Ray, mouk kay doosh gar ap mende te ačell! Kova his dinlepen, hoy mer kram, oun anam doosh ap mende.

¹² Kre, te vell i Miryam gar yaake har i ternepen, kay vas i datar moulo boldo, oun koleskro mass paash krik hi!”

¹³ Oun o Mose das ap o baro Debleste gole: “Ah Devel, kre lat sasto!”

¹⁴ O baro Devel penas ap o Moseste: “Te čoungrals lakro dad lat an o mouy, hounte ladjals yoy efta divessa. Moukenn lat kokres efta divessa vin glan koy platsa, kay i plarhtene khera hi! Pal kova lenn lat pale pash t'mende!”

¹⁵ Yaake vas i Miryam vin anlo glan i platsa, kay i plarhtene khera hi, oun hounte ačas kote efta divessa. An ko tsiro djan i menshe gar doureder. Har nay vas i Miryam palpale,

¹⁶ djan le doureder, moukan Hazerot pal pende, oun djivan an o moulo tato them Paran.