4. Mose 11 - O Debleskro Lab 2024 (Sinte-Manouche)

O baro Devel bičrell i yag mank i menshende

¹ Oun kol menshe penan glan o baro Debleskre kanda, kay lenge djoungeles djala. Oun har o baro Devel kova shounas, vas yob rhoyedo oun bičras i yag, hoy rhačras vin ap i platsa, kay lengre plarhtene khera his.

² Koy dan i menshe ap o Moseste gole. Oun o Mose mangas o baro Debles. Koy djas i yag krik.

³ Oun yon dan koy platsa ko lab Tabera, te bistrenn le gar, kay kote i yag o baro Deblestar mank lende rhačras.

I menshen hi bok pal mass

⁴ Mank i Israelitarya his ninna vavar menshe, kay lentsa djan. Kolen vas i bari bok pal mass. Koy rovan kol Israelitarya ninna pale, oun penan: “Koon dell men mass rhapaske?

⁵ Har shoukar his an o them Egiptia, kay men mače čičeske rhapaske his. Men his goudle meloni oun vavar meloni, zenlepen, pourma oun sirya.

⁶ Kate dikah či vavar har ko manna, oun kova vell men dran o nak vin.”

⁷ Ko manna dikas vin har tikno djob, parno-djelto.

⁸ Oun kol menshe nashan kate te kote, oun lan kova khetne, oun kran yarro dran leste, oun keran kova an pirya, oun kran merklia kolestar. Ko manna his an o mouy har maro, kay djet dren hi.

⁹ Oun te vell rati i platsa sapeno, perell o manna koy pre.

¹⁰ Har o Mose shounas, kay i tsele menshe khetne tardo his an i voudya glan lengre plarhtene khera oun rovan, koy tapras o baro Debles i rholi, oun ninna o Moseske his kova doha.

¹¹ Oun o Mose penas ap o baro Debleste: “Hoske kreh tou mange, kay tiro boudepaskro hom, o djipen yaake pharo? Hoske hi tout kek dji mange, oun me hounte marap man tele kol tsele menshentsa?

¹² Hi kalla halauter mire čave? Van yon mandar boldo? Har nay peneh tou ap mande: Hidje len an tire moussya, har i djouvel, kay hidjrell i ternepen, te anap len an ko them, kolestar penal lengre phourenge, te dess ko them lenge?

¹³ Kay lap me mass, te dap les kal tsele menshende? Yon rovan glan mande, oun penan: De men mass te rhal!

¹⁴ Me nay hidjrau kal tsele menshen gar kokres! Kova hi yaake pharo mange, te nay krau les bouder gar.

¹⁵ Te kameh tou mantsa yaake te krell, palle ab mange lačo oun de man moulo, te dikap gar miri bibarht.”

O Mose lell 70 morshen, kay venn leske ap i rig

¹⁶ Oun o baro Devel penas leske: “Le touke efta-deesh morsha kol phourendar an Israel, kolendar, kay tou djineh, kay hi yon pralstoune pral i menshende. An len glan o Debleskro plarhteno kheer. Kote venn le glan toute tardo.

¹⁷ Me kamau tele te vell, oun kote touha rakrell, oun lau i kotar ko dourhestar, hoy ap toute hi, oun čivau les ap lende, te nay krenn yon khetne touha kay phari boudi, hoy hi har i pharo koova ap tire phika. Tou hounte hidjress kova gar lauter kokres.

¹⁸ Oun ap i menshende hounte peness tou: Krenn t'men djoudjo o Debleske! Taysarlake lenn t'mer mass rhapaske. T'maro ropen vas glan o baro Debleste. Yob shounas har penan: Koon dell men mass te rhal? Menge djas mishto an o them Egiptia. Doleske dell t'men o baro Devel mass te rhal.

¹⁹ Gar yek dives, gar douy, gar panč, gar deesh, gar biish divessa.

²⁰ Kova djal yek čon, bis te nay soungenn les bouder gar, oun kova dran t'maro nak vin vell. T'mer čivan o baro Debles ap i rig, koles, kay mashkral t'mende hi. Oun t'mer rovan glan leste oun penan: Hoske djam mer dran o them Egiptia? Doleske vell kava koova kanna ap t'mende.”

²¹ Oun o Mose penas ap o baro Debleste: “Shob-sheel-zerya menshe hi kay, kolentsa me djivau, oun tou peneh: Me kamau len mass te dell, te vell len yek čon rhapaske.

²² Nay maras mer yaake boud bakre oun groumya, te hi len doha mass? Nay tapras mer kol tsele mače an o baro pani, te vell lenge lauterenge doha?”

²³ O baro Devel penas ap o Moseste: “Hi miro vast gar zorelo doha, te krap, hoy penom? Tou dikess kanna: Vell kova yaake, har me touke penom? Vell kova yaake gar?”

²⁴ Oun o Mose djas vin oun penas i menshenge o baro Debleskre laba, oun las khetne efta-deesh morsha kol phourendar, oun čivas len troul o Debleskro kheer.

²⁵ Koy vas o baro Devel tele an i folka oun rakras o Moseha, oun las i kotar ko dourhestar, hoy ap leste his, oun čivas les ap kol efta-deesh phoureder. Oun har o Debleskro dourho ap lende his, kharan le laba vin har kol Debleskre rakepangre. Yon kran kova kokres kava yek kopo.

²⁶ Koy his douy morsha pash i plarhtene khera, ko yek kharas Eldad, ko vavar Medad. Lengre laba his ninna pre-činlo an ko liil, kay i efta-desha phoureder dren činlo hi. Yon ačan pash i plarhtene khera oun djan gar vin pash o Debleskro kheer. Oun o Debleskro dourho vas ninna pral lende. Oun ap i platsa mank i khera kharan le laba vin har kol Debleskre rakepangre.

²⁷ Koy nashas i terno morsh pash o Moseste oun penas: “O Eldad oun o Medad kharenn laba vin har kol Debleskre rakepangre!”

²⁸ Koy his o Yosua, koleskro dad o Noun hi, kova boudras o Moseske foun tiknes pre. Oun yob penas leske: “Mose, miro ray, pen te moukenn le kova!”

²⁹ O Mose penas ap leste: “Kreh tou kova mange? Me kamoms, te dals o baro Devel peskre tsele menshende peskro dourho, te vans le halauter Debleskre rakepangre, kay leskre laba vin kharenna.”

³⁰ Pal kova djas o Mose pale pash i plarhtene khera oun kol Israeleskre phoureder djan leha.

O baro Devel moukell pesse čirklen ap i phoub te perell

³¹ Koy bičras o baro Devel i baro dourho pral o them, hoy vas kotar, kay o baro pani hi, oun anas pesse čirklen peha, oun moukas len ap i platsa te perell, yek dives dour troul i platsa, yaake yek metari pral i phoub.

³² Koy djan kol menshe oun lan kol čirklen khetne o tselo dives, oun i tseli rati, oun ko vavar tselo dives. Oun ninna koles, kay gar boud khetne las, his yaake yek zero kilogramme. Oun yon čivan kol čirklen troul i platsa, te venn le trouk, te rikrell pes o mass.

³³ Oun har yon ko mass rhan oun kova gomme mashkral lengre danda his, vas o baro Debleskri rholi pral i menshende, oun yob das len i phari phagi oun boud lendar meran.

³⁴ Oun yon kharan koy platsa Kibrot-Taava. Kote van kolla paskedo, kolen rhanč hi pal o mass.

³⁵ Oun yon moukan Kibrot-Taava pal pende oun djan doureder an Hazerot, oun yon ačan kote.